വിദേശത്ത് യുപിഐ പേയ്‌മെന്റുകൾ അനുവദിക്കുന്ന ആദ്യത്തെ ഇന്ത്യൻ ഫിൻടെക് ആയി ഫോണ്‍പേ. ഇനി ഫോൺ നമ്പർ മാറ്റാതെ തന്നെ പേയ്‌മെന്റുകൾ നടത്താം.
ദില്ലി: ഇന്ത്യയില്‍ നിന്നും വിദേശത്തെത്തിയവര്‍ക്ക് ഫോണ്‍പേ വഴി പണമിടപാടുകൾ നടത്താം. വിദേശത്ത് എത്തുന്നവർക്ക് യൂണിഫൈഡ് പേയ്മെന്റ് ഇന്റര്‍ഫേസ് (UPI) ഉപയോഗിച്ച് വിദേശ വ്യാപാരികള്‍ക്ക് പണം നല്കാൻ കഴിയും, ഈ സേവനം ആദ്യം ഉപയോഗിക്കുന്ന ഇന്ത്യന്‍ സാമ്പത്തിക സാങ്കേതിക ആപ്പാണ് ഫോണ്‍പേ.
യുപിഐ ഇടപാടുകളുടെ എണ്ണത്തിൽ ഏറ്റവും കൂടുതൽ വിപണി വിഹിതമുള്ള ഫോണ്‍പേ ഇപ്പോൾ അന്താരാഷ്ട്ര പേയ്‌മെന്റുകളെ പിന്തുണയ്ക്കുന്നു. അതിലൂടെ വിദേശത്ത് യാത്ര ചെയ്യുന്ന ഇന്ത്യക്കാർക്ക് യുപിഐ ഉപയോഗിച്ച് വിദേശ വ്യാപാരികൾക്ക് പണം നൽകാം. ഇടപാടുകൾ ഒരു അന്താരാഷ്ട്ര ഡെബിറ്റ് കാർഡ് പോലെ തന്നെ പ്രവർത്തിക്കും, കൂടാതെ വിദേശ കറൻസി ഉപയോക്താവിന്റെ ബാങ്ക് അക്കൗണ്ടിൽ നിന്ന് കുറയ്ക്കുകയും ചെയ്യും.
ഒരു ഫോൺപേ ഉപയോക്താവിന് ആപ്പിൽ യുപിഐ ഇന്റർനാഷണലിനായി യുപിഐയുമായി ലിങ്ക് ചെയ്‌തിരിക്കുന്ന ബാങ്ക് അക്കൗണ്ട് തന്നെ പ്രവർത്തിപ്പിക്കാം. ഈ സൗകര്യം ഉപയോഗിച്ച്, ഒരു ഉപഭോക്താവിന് ഇന്ത്യയ്ക്ക് പുറത്ത് പേയ്‌മെന്റുകൾ നടത്തുന്നതിന് ക്രെഡിറ്റ് കാർഡോ ഫോറെക്‌സ് കാർഡോ ആവശ്യമില്ല.
'ഈ ലോഞ്ച് ഒരു ഗെയിം ചേഞ്ചർ ആണെന്ന് എനിക്ക് ഉറപ്പുണ്ട്, കൂടാതെ വിദേശത്തേക്ക് യാത്ര ചെയ്യുന്ന ഇന്ത്യക്കാർ വിദേശത്ത് നടത്തുന്ന പണമടയ്ക്കുന്ന രീതിയെ പൂർണ്ണമായും ഇത് മാറ്റും, ”കമ്പനിയുടെ സഹസ്ഥാപകനും സിടിഒയുമായ രാഹുൽ ചാരി പറഞ്ഞു.
യുപിഐ ഇന്റർനാഷണൽ കൂടുതൽ രാജ്യങ്ങളിലേക്ക് വ്യാപിപ്പിക്കുമെന്ന് പ്രതീക്ഷിക്കുന്നു. സിംഗപ്പൂർ, ഓസ്‌ട്രേലിയ, കാനഡ, ഹോങ്കോംഗ്, ഒമാൻ, ഖത്തർ, യുഎസ്എ, സൗദി അറേബ്യ, യുഎഇ, യുണൈറ്റഡ് കിംഗ്ഡം എന്നീ 10 രാജ്യങ്ങളിൽ നിന്നുള്ള എൻആർഐകൾക്ക് ഉടൻ തന്നെ ഇന്ത്യൻ ഫോൺ നമ്പർ ഉപയോഗിച്ച് യുപിഐ പേയ്‌മെന്റുകൾ നടത്താൻ അനുമതി നൽകുമെന്ന് നാഷണൽ പേയ്മെന്റ് കോർപ്പറേഷൻ ഓഫ് ഇന്ത്യ കഴിഞ്ഞ മാസം വ്യക്തമാക്കിയിരുന്നു.