ദീപ കര്‍മാകറിന് ഒളിംപിക് യോഗ്യത; ഇതു ചരിത്ര നേട്ടം..!

ദില്ലി: ജിംനാസ്റ്റിക് താരം ദീപ കര്‍മാകറിന് റിയോ ഒളിംപിക്‌സ് യോഗ്യത. ഒളിംപിക് യോഗ്യത നേടുന്ന ആദ്യ ഇന്ത്യന്‍ വനിതാ ജിംനാസ്റ്റ് ആണ് ദീപ. ത്രിപുര സ്വദേശിയാണ് ഈ 22കാരി.

യോഗ്യതാ മത്സരത്തില്‍ 52.698 പോയിന്റ് നേടിയാണ് ദീപ ഒളിംപിക് യോഗ്യത നേടിയത്. സ്വാതന്ത്ര്യലബ്ധിക്കു ശേഷം 11 ഇന്ത്യന്‍ ജിംനാസ്റ്റുകളാണ് ഒളിംപിക്സില്‍ മത്സരിച്ചിട്ടുള്ളത്. അവസാനമായി മത്സരിച്ചത് 1964ല്‍. ഇവരെല്ലാം പുരുഷന്മാരായിരുന്നു.

52 വര്‍ഷത്തിനു ശേഷം ഇന്ത്യയില്‍നിന്ന് ഒരാള്‍ ഒളിംപിക്സില്‍ ജിംനാസ്റ്റിക് മത്സരത്തിനിറങ്ങുന്നുവെന്നതും ദീപയുടെ നേട്ടത്തിന്റെ പ്രത്യേകത.