ട്രംപിന്‍റെ പുതിയ യാ​ത്രാനിരോധന നിയമവും കോടതി വിലക്കി

വാഷിങ്​ടൺ: അമേരിക്കൻ പ്രസിഡൻറ്​ ഡോണാൾഡ്​ ട്രംപിന്‍റെ പുതിയ യാ​ത്രാനിരോധന നിയമത്തിനും ഫെഡറല്‍ കോടതിയുടെ വിലക്ക്​. ആറ്​ മുസ്​ലിം ഭൂരിപക്ഷ രാജ്യങ്ങളിൽ നിന്നുള്ള കുടിയേറ്റക്കാർക്ക്​ വിസാ നിരോധനം ഏർ​പ്പെടുത്താനുള്ള ട്രംപി​ന്‍റെ പുതിയ വിസാനിയമമാണ് ഹവായ്​ ഫെഡറൽ ജഡ്​ജ്​ മരവിപ്പിച്ചത്​. ​

വ്യാഴാഴ്​ച അർധരാത്രി മുതൽ നടപ്പിൽ വരുത്താനായിരുന്നു തീരുമാനം. നടപ്പിലാക്കുന്നതിന്​ തൊട്ടുമുമ്പ് നിയമം മരവിപ്പിച്ച്​ ഫെഡറൽ കോടതി ഉത്തരവിറക്കിയത് ട്രംപിന് കനത്ത തിരിച്ചടിയായി.

ദേശീയ സുരക്ഷക്ക്​ വേണ്ടിയാണ്​ യാത്രാ വിലക്ക്​ ഏർപ്പെടുത്തുന്നത്​ എന്ന സർക്കാർ വാദത്തെ ചോദ്യം ചെയ്​താണ്​ ഹവായ്​ ഫെഡറൽ ജഡ്​ജ്​ ഡെറിക്​ വാറ്റ്​സൺ നിയമം മരവിപ്പിച്ചത്​.

ആറ്​ മുസ്​ലിം ഭൂരിപക്ഷ രാജ്യങ്ങളിൽ നിന്നുള്ള പൗരൻമാരെ​ 90 ദിവസത്തേക്കും അഭയാർഥികളെ 120 ദിവസത്തേക്കും വിലക്കുന്ന നിയമമാണ്​ നടപ്പാക്കാൻ തീരുമാനിച്ചിരുന്നത്​.

ഇതു സംബന്ധിച്ച്​ നേരത്തെ ട്രംപ്​ ഇറക്കിയിരുന്ന ഉത്തരവ്​ സീറ്റിൽ ജഡ്​ജ്​ സ്​റ്റേ ചെയ്​തിരുന്നു. തുടർന്നാണ്​ പുതിയ നിയമം ഏർപ്പെടുത്താത്തിയത്​. എന്നാല്‍ ജഡ്​ജിയുടെ തീരുമാനം  ജുഡീഷ്യൽ അധികാരപരിധിയുടെ ലംഘനമാണെന്നാണ്​​ ട്രംപിന്‍റെ പ്രതികരണം.