ഇടുക്കി അണക്കെട്ട് തുറക്കില്ല; വൈകിട്ട് കെഎസ്ഇബി അധികൃതരുടെ യോഗം

ജലനിരപ്പ്  2387 അടിയിലേക്ക് ഉയര്‍ന്നിരുന്നു. ഇതിന് പിന്നാലെയാണ് നാല് മണിക്ക് ഷട്ടര്‍ തുറക്കുമെന്ന് പറ‍ഞ്ഞത്.  

ഇടുക്കി:ഇടുക്കി അണക്കെട്ട് ഇന്ന് തുറക്കില്ല. ഇടുക്കി അണക്കെട്ടില്‍ ജലനിരപ്പ് നേരിയ തോതില്‍ ഉയരുന്നതിനെ തുടര്‍ന്ന് മുന്‍കരുതലിന്‍റെ ഭാഗമായി  ചെറുതോണി അണക്കെട്ടിന്‍റെ ഒരു ഷട്ടര്‍ തുറക്കുമെന്നായിരുന്നു നേരത്തേ പറഞ്ഞിരുന്നത്. എന്നാല്‍ വൈകിട്ട് കെഎസ്ഇബി അധികൃതര്‍ യോഗം ചേര്‍ന്ന് സ്ഥിതി വിലയിരുത്തും.

ഇതിനുശേഷം കാലാവസ്ഥ മുന്നറിയിപ്പുകള്‍ പരിശോധിച്ച ശേഷമായിരിക്കും തീരുമാനം. ജലനിരപ്പ്  2387 അടിയിലേക്ക് ഉയര്‍ന്നിരുന്നു. ഇതിന് പിന്നാലെയാണ് നാല് മണിക്ക് ഷട്ടര്‍ തുറക്കുമെന്ന് പറ‍ഞ്ഞത്. മുല്ലപ്പെരിയാറിലെ ജലനിരപ്പ് ഉയരുന്നതും നിരീക്ഷിക്കുന്നുണ്ട്. 131.3 അടിയാണ് നിലവിലെ ജലനിരപ്പ്. പരമാവധി സംഭരണശേഷി 142 അടിയാണ്. മഴയുടെ പശ്ചാത്തലത്തിൽ മാട്ടുപ്പെട്ടി, പൊൻമുടി, മലങ്കര അണക്കെട്ടുകളിൽ നിന്നുള്ള ജലമൊഴുക്ക് കൂട്ടിയിരിക്കുകയാണ്. മുതിരപ്പുഴയാർ, പന്നിയാർ, തൊടുപുഴയാർ എന്നിവയുടെ തീരത്തുള്ളവർക്ക് ജാഗ്രത നിർദ്ദേശം നൽകി.

ഉരുൾപൊട്ടലിനും മണ്ണിടിച്ചിലിനും സാധ്യതയുള്ളതിനാൽ ജില്ലയിലെ വിനോദ സഞ്ചാരകേന്ദ്രങ്ങളിലേക്ക് സഞ്ചാരികൾക്കുള്ള നിരോധനം തുടരുകയാണ്. മലയോര മേഖലയിലെ രാത്രിയാത്രയ്ക്കും നിയന്ത്രണം ഏർപ്പെടുത്തിയിട്ടുണ്ട്.