പുള്ളിപ്പുലിയുടെ ആക്രമണം, നാലു മാസം പ്രായമുള്ള കുഞ്ഞിന് പരിക്ക്

വിക്രം രത്വ, ഭാര്യ സപ്ന എന്നിവരും അവരുടെ നാലു മാസം പ്രായമുള്ള മകനും ഇരുചക്രവാഹനത്തില്‍ വരുമ്പോള്‍ ചാടിയെത്തിയ പുള്ളിപ്പുലി  സപ്നയെ പരിക്കേല്‍പ്പിച്ച ശേഷം മകനായ ആയൂഷിനെ വലിച്ചെടുത്തു

വഡോദര: ഇരുചക്രവാഹനത്തില്‍ സഞ്ചരിച്ച കുടുംബത്തെ പുള്ളിപ്പുലി ആക്രമിച്ചു. ഇവരുടെ നാലു മാസം പ്രായമുള്ള മകനെ തട്ടിയെടുത്ത് കൊണ്ടു പോകാനുള്ള ശ്രമത്തില്‍ കുഞ്ഞിന് സാരമായി പരിക്കേറ്റിട്ടുണ്ട്. ഗുജറാത്തിലെ ആദിവാസി സമൂഹം താമസിക്കുന്ന ചോഠാപൂര്‍ ഉദയ്പൂര്‍ ജില്ലയിലാണ് സംഭവം. വിക്രം രത്വ, ഭാര്യ സപ്ന എന്നിവരും അവരുടെ നാലു മാസം പ്രായമുള്ള മകനും ഇരുചക്രവാഹനത്തില്‍ വരുമ്പോള്‍ ഇന്നലെ പുള്ളിപ്പുലി ആക്രമിക്കുകയായിരുന്നുവെന്ന് അധികൃതര്‍ പറഞ്ഞു.

ഇന്നലെ രാത്രി വണ്ടിയില്‍ വരുമ്പോള്‍ ചാടിയെത്തിയ പുള്ളിപ്പുലി  സപ്നയെ പരിക്കേല്‍പ്പിച്ച ശേഷം മകനായ ആയൂഷിനെ വലിച്ചെടുത്തു കൊണ്ടുപോവുകയായിരുന്നുവെന്ന് വിക്രം രത്വ പറഞ്ഞു. തന്‍റെ ഉറക്കെയുള്ള നിലവിളി കേട്ട് ഗ്രാമവാസികള്‍ ഓടിയെത്തി. പുള്ളിപ്പുലിയെ ഭയപ്പെടുത്തിയതോടെ കുഞ്ഞിനെ ഉപേക്ഷിച്ച അത് പോവുകയായിരുന്നുവെന്നും അദ്ദേഹം പറഞ്ഞു. തുടര്‍ന്ന് മൂവരെയും  ആശുപത്രിയില്‍ പ്രവേശിപ്പിച്ചിരിക്കുകയാണ്. കുഞ്ഞിന്‍റെ കാലിനും പിന്നിലുമെല്ലാം പരിക്കുകളേറ്റിട്ടുണ്ട്.