രണ്ടു മണിക്കൂറിനിടെ ആറുപേരെ കൊലപ്പെടുത്തിയ ആള്‍ പിടിയിൽ

റോത്തക്ക്: ഇന്നു പുലര്‍ച്ചെ രണ്ടു മണിക്കൂറിനിടയിൽ ആറുപേരെ ഇരുമ്പ് ദണ്ഡിന് അടിച്ചുകൊലപ്പെടുത്തിയ ആളെ പിടികൂടി. ഹരിയാനയിലെ പൽവാളിലാണ് സംഭവം. ഇന്നു പുലര്‍ച്ചെ രണ്ടു മണിക്കും നാലു മണിക്കും ഇടയിലാണ് ആറു കൊലപാതകങ്ങളും നടന്നത്. ഉറങ്ങിക്കിടന്നവരാണ് കൊലചെയ്യപ്പെട്ടത്. കേരളത്തിലെ റിപ്പര്‍ മോഡൽ കൊലപാതകത്തിന് സമാനമായ സംഭവമാണ് ഉണ്ടായിരിക്കുന്നത്. പൽവാളിലെ ആദര്‍ശ് കോളനിയിൽനിന്ന് പരിക്കേറ്റ നിലയിലാണ് കൊലപാതകിയെ പൊലീസ് പിടികൂടിയത്. അറസ്റ്റ് ചെയ്യാനെത്തിയ പൊലീസിനെയും ഇയാള്‍ അക്രമിക്കാൻ ശ്രമിച്ചു. ഗുരുതരമായി പരിക്കേറ്റിട്ടുള്ള ഇയാളെ ഫരീദാബാദിലെ ആശുപത്രിയിൽ പ്രവേശിപ്പിച്ചിരിക്കുകയാണ്. സംഭവത്തെക്കുറിച്ച് വിശദമായ അന്വേഷണം നടന്നുവരികയാണ്.