കോൺ​ഗ്രസിന് 'OROP'എന്നാല്‍ 'ഒണ്‍ലി രാഹുലും ഒണ്‍ലി പ്രിയങ്ക'യും: അമിത് ഷാ

''മോദി, നമ്മുടെ സൈനികർക്ക് വേണ്ടിയാണ് ഒരേ റാങ്ക് ഒരേ പെൻഷൻ‌ പദ്ധതി നടപ്പിലാക്കിയത്. എന്നാൽ കോൺ​ഗ്രസും അതേ രീതിയിൽ ഒആർഒപി പിന്തുടരുന്നുണ്ട്. അത് ഒൺലി രാഹുൽ, ഒൺലി പ്രിയങ്ക ആണെന്ന് മാത്രം.'' അമിത് ഷാ പറഞ്ഞു. 

ഹിമാചല്‍പ്രദേശ്: ഒരേ റാങ്ക് ഒരേ പെൻഷൻ പദ്ധതി (OROP) എന്നത് കോൺ​ഗ്രസിനെ സംബന്ധിച്ച് ഒൺലി രാഹുൽ, ഒൺലി പ്രിയങ്ക ആണെന്ന് ബിജെപി ദേശീയ അദ്ധ്യക്ഷൻ അമിത് ഷാ. കോൺ​ഗ്രസ് അധ്യക്ഷൻ രാഹുൽ ​ഗാന്ധിയെയും സഹോ​ദരി പ്രിയങ്ക ​ഗാന്ധിയെയും ലക്ഷ്യമാക്കിയാണ് അമിത് ഷാ ഇത്തരമൊരു പരിഹാസ വ്യാഖ്യാനം ഒആർഒപിയ്ക്ക് നൽകിയത്. ഹിമാചൽപ്രദേശിൽ ഒരു പൊതുപരിപാടിയിൽ പ്രസം​ഗിക്കുകയായിരുന്നു അമിത് ഷാ.

മോദി സർക്കാർ അധികാരത്തിൽ വന്നതിന് ശേഷമാണ് സേനാ വിഭാ​ഗത്തിലെ ഒരേ റാങ്കിലുള്ള സൈനികർക്ക് ഒരേ പെൻഷൻ പദ്ധതി പ്രാവർത്തികമാക്കിയത്. കഴിഞ്ഞ എഴുപത് വർഷങ്ങളിലായി സൈനികരെ ആരും തിരിഞ്ഞു നോക്കിയിട്ടില്ല. മോദി, നമ്മുടെ സൈനികർക്ക് വേണ്ടിയാണ് ഒരേ റാങ്ക് ഒരേ പെൻഷൻ‌ പദ്ധതി നടപ്പിലാക്കിയത്. എന്നാൽ കോൺ​ഗ്രസും അതേ രീതിയിൽ ഒആർഒപി പിന്തുടരുന്നുണ്ട്. അത് ഒൺലി രാഹുൽ ഒൺലി പ്രിയങ്ക ആണെന്ന് മാത്രം അമിത് ഷാ പറഞ്ഞു. 

ഉനയിൽ പാർട്ടി പ്രവർത്തകരോട് സംസാരിക്കുമ്പോഴാണ് കോൺ​ഗ്രസിനെതിരെ അമിത് ഷാ പരിഹാസ വാക്കുകൾ ഉന്നയിച്ചത്. കഴിഞ്ഞ ആഴ്ചയാണ് ഉത്തർപ്രദേശിൽ പാർട്ടി ജനറൽ സെക്രട്ടറിയായി പ്രിയങ്ക ​ഗാന്ധിയെ നിയമിച്ചത്. ഈ നിയമനം വിവിധ രാഷ്ട്രീയ പാർട്ടികളിൽ നിന്നും സമ്മിശ്ര പ്രതികരണത്തിന് കാരണമായിരുന്നു.