കേരളത്തെ സഹായിക്കണം; മോദിക്ക് രാഹുല്‍ ഗാന്ധിയുടെ കത്ത്

കേരളത്തിലെ കാലവര്‍ഷക്കെടുതികളുടെ ഭീകരത കൃത്യമായി ബോധ്യപ്പെടുത്തിക്കൊണ്ടാണ് രാഹുല്‍ പ്രധാനമന്ത്രിക്ക് കത്തയച്ചിരിക്കുന്നത്

ദില്ലി: കേരളത്തിന്‍റെ ചരിത്രത്തിലെ തന്നെ ഏറ്റവും വലിയ പ്രളയമായി മാറിയ കാലവര്‍ഷ കാലവര്‍ഷക്കെടുതിയില്‍ അടിയന്തിര സഹായം അനുവദിക്കണമെന്നാവശ്യപ്പെട്ട് പ്രധാനമന്ത്രി നരേന്ദ്രമോദിക്ക് കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയുടെ കത്ത്. പ്രളയം തകര്‍ക്കുന്ന കേരളത്തിന് വേണ്ട എല്ലാവിധ സഹായങ്ങളും കേന്ദ്രസര്‍ക്കാരിന്‍റെ ഭാഗത്ത് നിന്നുണ്ടാകണമെന്ന് അദ്ദേഹം കത്തിലൂടെ ആവശ്യപ്പെട്ടു.

ഓഖി ദുരന്തത്തില്‍ നിന്ന് കരകയറുന്നതിനിടെയെത്തിയ കാലവര്‍ഷകെടുതി കേരളത്തെ പൂര്‍ണമായും ദുരിതത്തിലാക്കിയിരിക്കുകയാണ്. കാലവര്‍ഷം ഇപ്പോഴും കലിതുള്ള നില്‍ക്കുന്ന സാഹചര്യത്തില്‍ കേന്ദ്രത്തിന്‍റെ ഭാഗത്ത് നിന്ന് വലിയ തോതിലുള്ള സഹായം സംസ്ഥാനത്തിന് ലഭ്യമാക്കണമെന്നും രാഹുല്‍ ആവശ്യപ്പെട്ടു.  

കേരളം നേരിടുന്ന പ്രതികൂല സാഹചര്യത്തെ മറികടക്കാന്‍ അടിയന്തിര ധനസഹായമടക്കമുള്ള സഹായങ്ങളുണ്ടാകണം. സംസ്ഥാനം നേരിടുന്ന പ്രളയത്തില്‍ സഹായഹസ്തവുമായി എല്ല കോണ്‍ഗ്രസ് പ്രവര്‍ത്തകരും രംഗത്തെത്തണമെന്ന് നേരത്തെ രാഹുല്‍ ആഹ്വാനം ചെയ്തിരുന്നു.