രാഷ്ട്രീയ അൽപ്പത്തം കാണിക്കരുത്; ബിജെപിക്കെതിരെ ആഞ്ഞടിച്ച് വിഎസ് സുനിൽകുമാര്‍

സംസ്ഥാന സർക്കാരിനെ അറിയിക്കാതെയാണ് പ്രധാനമന്ത്രി കിസാൻ പദ്ധതിയുടെ തിരുവനന്തപുരത്തെ  ഉത്ഘാടനം നടക്കുന്നത്. ബിജെപി രാഷ്ട്രീയ അൽപ്പത്തം കാണിക്കരുതെന്ന് വിഎസ് സുനിൽ കുമാര്‍ 

കോട്ടയം: പ്രധാൻ മന്ത്രി കിസാൻ സമ്മാൻ നിധിയുടെ പേരിൽ ബിജെപി സര്‍ക്കാര്‍ രാഷ്ട്രീയ അൽപ്പത്തം കാണിക്കുകയാണെന്ന് കൃഷിമന്ത്രി വിഎസ് സുനിൽ കുമാര്‍. കേന്ദ്ര പദ്ധതിയുടെ ഉദ്ഘാടനം ജില്ലാ ആസ്ഥാനങ്ങളിലും ബ്ലോക്ക് പഞ്ചായത്ത് ആസ്ഥാനത്തുമൊക്കെയായി നടക്കുന്നുണ്ട്. അതിനിടെയാണ് ഔദ്യോഗിക ഉദ്ഘാടനമെന്ന പേരിൽ തിരുവനന്തപുരം കഴക്കൂട്ടത്ത് കേന്ദ്രമന്ത്രി അൽഫോൺസ് കണ്ണന്താനം പങ്കെടുക്കുന്ന പരിപാടി നടക്കുന്നത്. ഇത് സംബന്ധിച്ച് സംസ്ഥാന സര്‍ക്കാരിന് ഒരറിവും കിട്ടിയിട്ടില്ലെന്നാണ് കൃഷി മന്ത്രി വിഎസ് സുനിൽ കുമാറിന്‍റെ ആരോപണം. 

സംസ്ഥാന സര്‍ക്കാര്‍ വഴി നടപ്പാക്കുന്ന പദ്ധതിയുടെ ഉദ്ഘാടനം സംസ്ഥാന സര്‍ക്കാര്‍ അറിയാതെ നടത്തുന്നത് ബിജെപിയുടെ രാഷ്ട്രീയ അൽപ്പത്തമാണെന്ന് കൃഷിമന്ത്രി കോട്ടയത്ത് ആഞ്ഞടിച്ചു. സര്‍ക്കാര്‍ പദ്ധതികളെ രാഷ്ട്രീയ വേദികളാക്കാൻ ബിജെപി തുനിയുന്നത് തരംതാഴ്ന്ന നടപടിയാണെന്നും സുനിൽ കുമാര്‍ പറഞ്ഞു.

സാമാന്യ മര്യാദ പോലും പാലിക്കാതെയാണ് ബിജെപി ഇടപെടുന്നതെന്നും വിഎസ് സുനിൽ കുമാര്‍ കുറ്റപ്പെടുത്തി. ഫെഡറൽ സംവിധാനത്തെ ആകെ ബിജെപി വെല്ലുവിളിക്കുകയാണെന്നും ഇത് അംഗീകരിക്കാനാകില്ലെന്നും മന്ത്രി പറഞ്ഞു