ഉച്ചയോടെ പെയ്ത കനത്ത മഴ, മരത്തിനടിയിലേക്ക് ഓടിക്കയറിയ 72 ആടുകള്‍ കൂട്ടത്തോടെ ചത്തു, അപ്രതീക്ഷിതമായുണ്ടായത് ശക്തമായ ഇടിമിന്നൽ

മഴക്കിടെ മരത്തിന് താഴെ കൂട്ടത്തോടെ നില്‍ക്കുകയായിരുന്നു ആടുകൾ. തന്‍റെ 72 ആടുകളും ചത്തെന്നും ഇനിയൊരു ആടു പോലും ബാക്കിയില്ലെന്നും ഉടമ പറഞ്ഞു. 

റിയാദ്: സൗദി അറേബ്യയിലെ അസീര്‍ പ്രവിശ്യയിലെ രിജാല്‍ അല്‍മഇൽ ഇടിമിന്നലില്‍ 72 ആടുകള്‍ ചത്തു. അൽ അഹ്മൽ ഗ്രാമത്തിലാണ് ശക്തമായ ഇടിമിന്നലുണ്ടായത്. ഇടിമിന്നലുണ്ടായപ്പോള്‍ ആട്ടിന്‍ കൂട്ടം മരത്തിനടിയിലായിരുന്നു.

കഴിഞ്ഞ ദിവസം ഉച്ചയോടെയാണ് ഗ്രാമത്തില്‍ കനത്ത മഴയും ഇടിമിന്നലും ഉണ്ടായത്. മഴക്കിടെ മരത്തിന് താഴെ കൂട്ടത്തോടെ നില്‍ക്കുന്നതിനിടെയാണ് ആടുകള്‍ക്ക് ഇടിമിന്നലേറ്റത്. തന്‍റെ 72 ആടുകളും ചത്തെന്നും ഇനിയൊരു ആടു പോലും ബാക്കിയില്ലെന്നും ഉടമയായ സൗദി പൗരന്‍ മുഹമ്മദ് അല്‍ഗമൂര്‍ പറഞ്ഞു. ഗവര്‍ണറേറ്റിന്‍റെ വടക്കുപടിഞ്ഞാറ് ഭാഗത്താണ് അൽ അഹ്മൽ ഗ്രാമം സ്ഥിതി ചെയ്യുന്നത്. കനത്ത മഴ ഈ മേഖലയില്‍ വന്‍ നാശം വിതച്ചിട്ടുണ്ട്.