കുവൈത്തിലെ അഹമ്മദി 'ഔർ ലേഡി ഓഫ് അറേബ്യ' ദേവാലയം മൈനർ ബസിലിക്ക പദവിയിലേക്ക്, ഗൾഫ് മേഖലയിൽ ആദ്യം

ഔദ്യോഗിക പ്രഖ്യാപനത്തിനുള്ള തീയതി പിന്നീട് അറിയിക്കുമെന്ന് അധിക്രതർ അറിയിച്ചു.

കുവൈത്ത് സിറ്റി: കുവൈത്തിലെ കത്തോലിക്കാ പള്ളിയായ അൽ-അഹമ്മദിയിലെ ഔവർ ലേഡി ഓഫ് അറേബ്യ ചർച്ച് മൈനർ ബസിലിക്കയായി ഉയർത്തി. ഇതോടെ ഗൾഫിലെ ആദ്യ മൈനർ ബസിലിക്ക എന്ന പദവി ഈ പള്ളിക്ക് ലഭിച്ചു. വടക്കൻ അറേബ്യയുടെ അപ്പസ്തോലിക് വികാരി ബിഷപ്പ് ആൽഡോ ബെരാർഡിയുടെ അഭ്യർത്ഥനയെ തുടർന്ന് ഫ്രാൻസിസ് മാർപാപ്പയാണ് ഈ പദവി നൽകിയത്. ചരിത്രപരവും ആത്മീയപരവും ഇടയസംബന്ധവുമായ പ്രാധാന്യം കണക്കിലെടുത്താണ് പള്ളിയെ ബസിലിക്കയായി ഉയർത്തിയത്. ഗൾഫ് മേഖലയിലുടനീളമുള്ള കത്തോലിക്കർക്ക് ഈ പള്ളിക്ക് വലിയ പ്രാധാന്യമുണ്ട്.

1948-ൽ കർമ്മലീത്ത സഭ സ്ഥാപിച്ച ഈ പള്ളി, പിന്നീട് കുവൈത്ത് ഓയിൽ കമ്പനി തൊഴിലാളികൾക്ക് വേണ്ടിയാണ് നിർമ്മിച്ചത്. ഇവിടെ സ്ഥാപിച്ചിട്ടുള്ള ഔവർ ലേഡി ഓഫ് അറേബ്യയുടെ തിരുസ്വരൂപം 1949-ൽ പന്ത്രണ്ടാം പീയൂസ് മാർപാപ്പ ആശീർവദിച്ചതായിരുന്നു. ഗൾഫ് യുദ്ധസമയത്ത് പോലും വിശ്വാസികളുടെ ആത്മീയ അഭയകേന്ദ്രമായിരുന്നു ഈ പള്ളി. അറേബ്യൻ ഉപദ്വീപിലെ കത്തോലിക്കാ സമൂഹത്തിന്റെ ഊർജ്ജസ്വലമായ ആത്മീയ ജീവിതത്തിനുള്ള ഒരു അംഗീകാരമാണ് ഈ പദവി കണക്കാക്കുന്നത്. ഔദ്യോഗിക പ്രഖ്യാപനത്തിനുള്ള തീയതി പിന്നീട് അറിയിക്കുമെന്ന് അധികൃതര്‍ അറിയിച്ചു.

1949-ൽ പയസ് പന്ത്രണ്ടാമൻ മാർപ്പാപ്പ അനുഗ്രഹിച്ചതും 2011-ൽ ബെനഡിക്റ്റ് പതിനാറാമൻ മാർപ്പാപ്പയ്ക്ക് വേണ്ടി കർദ്ദിനാൾ അന്റോണിയോ കാനിസാറസ് ലോവേര കിരീടധാരണം ചെയ്തതുമായ അറേബ്യൻ മാതാവിന്റെ പ്രതിമ ഈ പള്ളിയിലാണ് സ്ഥിതി ചെയ്യുന്നത്. കുവൈത്തിലും അറേബ്യൻ ഉപദ്വീപിലുടനീളമുള്ള കത്തോലിക്കരുടെ ആത്മീയ ജീവിതത്തിൽ സഭയുടെ നേതൃത്വപരമായ പങ്ക് അംഗീകരിച്ചുകൊണ്ട് ബിഷപ്പ് ബെരാർഡിയുടെ ഔപചാരിക അഭ്യർത്ഥനയെ തുടർന്നാണ് ഉന്നതി പ്രഖ്യാപനം (നമ്പർ 18/25). കപ്പുച്ചിൻ ഫാദർ റോസ്വിൻ റെഡെന്റോ ആഗ്നെലോ പിയേഴ്‌സിന്റെ നേതൃത്വത്തിലുള്ള വൈദികരുടെയും പാരിഷ് കൗൺസിലിന്റെയും പാസ്റ്ററൽ പ്രവർത്തനം പദവി നേടുന്നതിൽ നിർണായക പങ്കുവഹിച്ചു.