സൗദി ദക്ഷിണ മേഖലയ്ക്ക് നേരെയുണ്ടായ ഹൂതി ആക്രമണങ്ങൾ സഖ്യസേന തകർത്തു; മാരിബിൽ യെമൻ സൈന്യത്തിന്‍റെ നീക്കം ശക്തം

Published : Nov 20, 2026, 11:02 AM ISTUpdated : Nov 20, 2026, 11:04 AM IST
drone attack

Synopsis

ദക്ഷിണ മേഖലയെ ലക്ഷ്യമിട്ട് ഹൂതികൾ അയച്ച ഡ്രോണുകളും മിസൈലും വ്യോമപ്രതിരോധ സേന തകർത്തു. റിയാദിന് നേരെയുണ്ടായ ആക്രമണ ശ്രമവും സൈന്യം പരാജയപ്പെടുത്തി. മാരിബ് പ്രവിശ്യയിൽ യെമൻ സൈന്യം ശക്തമായ പോരാട്ടം തുടരുകയാണ്.

റിയാദ്: ദക്ഷിണ മേഖലയെ ലക്ഷ്യമിട്ട് ഹൂതി വിമതർ അയച്ച രണ്ട് ഡ്രോണുകളും ഒരു ബാലിസ്റ്റിക് മിസൈലും വ്യോമപ്രതിരോധ സേന ആകാശത്തുവെച്ച് തന്നെ തകർത്തു. യെമനിലെ നിയമസാധുതയുള്ള സർക്കാരിനെ പിന്തുണയ്ക്കുന്ന സഖ്യസേനയുടെ വക്താവ് മേജർ ജനറൽ തുർക്കി അൽ-മാലികിയാണ് ഇക്കാര്യം അറിയിച്ചത്.

ദക്ഷിണ മേഖലയ്ക്ക് നേരെ ഹൂതികൾ തൊടുത്തുവിട്ട നാല് ബാലിസ്റ്റിക് മിസൈലുകളും ഒരു ക്രൂയിസ് മിസൈലും ഇന്നലെയും സൈന്യം തകർത്തിരുന്നു. കൂടാതെ, തലസ്ഥാന നഗരമായ റിയാദിന് നേരെയുണ്ടായ മിസൈൽ ആക്രമണ ശ്രമവും സൈന്യം വിജയകരമായി തടഞ്ഞിരുന്നു. അതേസമയം, മാരിബ് പ്രവിശ്യയുടെ വടക്കൻ ഭാഗങ്ങളിൽ ഹൂതി സായുധ സംഘങ്ങളെ തുരത്തുന്നതിനായി യെമൻ സൈന്യം ശക്തമായ നീക്കങ്ങൾ തുടരുകയാണ്. പ്രവിശ്യയുടെ വടക്കൻ അതിർത്തികളിലെ വിവിധ കേന്ദ്രങ്ങളിൽ സൈനികർ നേരിട്ടുള്ള ഏറ്റുമുട്ടലുകളിലും പരിശോധനകളിലും ഏർപ്പെട്ടിട്ടുണ്ടെന്ന് യെമൻ സായുധ സേനാ മീഡിയ സെന്റർ അറിയിച്ചു. ഏത് സാഹചര്യവും നേരിടാൻ സൈനികർ പൂർണ്ണ സജ്ജരാണെന്ന് വ്യക്തമാക്കുന്ന വീഡിയോ ദൃശ്യങ്ങളും മീഡിയ സെന്റർ പുറത്തുവിട്ടിട്ടുണ്ട്. യെമൻ സർക്കാർ സൈന്യവും ഹൂതി വിമതരും തമ്മിൽ നിലനിൽക്കുന്ന സംഘർഷങ്ങളുടെ ഭാഗമായി മാരിബ് മേഖലയിൽ ഇടയ്ക്കിടെ ഇത്തരം സൈനിക നീക്കങ്ങളും ഏറ്റുമുട്ടലുകളും നടക്കാറുണ്ട്.

നേരത്തെ, ഹൂതികളുടെ സൈനിക ശക്തി തകർക്കാൻ സഖ്യസേന നടത്തിയ പ്രത്യേക ഓപ്പറേഷനിൽ സനാ, ഹൊദൈദ, അമ്രാൻ, സാദ എന്നീ പ്രവിശ്യകളിലായി ഇവരുടെ 60 സൈനിക കേന്ദ്രങ്ങൾ തകർത്തിരുന്നു. അതേസമയം, യെമൻ സൈന്യം നടത്തിയ ശക്തമായ തിരിച്ചടിയിൽ ഹൂതികളുടെ നേതാക്കളും പോരാളികളും ഉൾപ്പെടെ 142 പേർ കൊല്ലപ്പെട്ടു. കഴിഞ്ഞ ഏതാനും മണിക്കൂറുകൾക്കുള്ളിൽ വിവിധ യുദ്ധമുന്നണികളിലെ ഹൂതി താവളങ്ങൾക്കും ഒളിത്താവളങ്ങൾക്കും നേരെ സൈന്യം 746 ആക്രമണങ്ങളാണ് നടത്തിയത്.

PREV

ഏഷ്യാനെറ്റ് ന്യൂസ് മലയാളത്തിലൂടെ Pravasi Malayali News ലോകവുമായി ബന്ധപ്പെടൂ. Gulf News in Malayalam  ജീവിതാനുഭവങ്ങളും, അവരുടെ വിജയകഥകളും വെല്ലുവിളികളുമൊക്കെ — പ്രവാസലോകത്തിന്റെ സ്പന്ദനം നേരിട്ട് അനുഭവിക്കാൻ Asianet News Malayalam

 

Read more Articles on
click me!

Recommended Stories

യാത്രക്കാരുടെ സംശയങ്ങൾക്ക് ഉടൻ മറുപടി; പുതിയ ഓട്ടോമാറ്റിക് സംവിധാനവുമായി 'മദീന ബസസ്'
ദേശീയ ദിനം; ദുബായിലെ സ്വകാര്യ സ്കൂളുകൾക്കും സർവകലാശാലകൾക്കും മൂന്ന് ദിവസത്തെ അവധി, വാരാന്ത്യ അവധി ഉൾപ്പെടെ ആകെ അഞ്ച് ദിവസം ലഭിക്കും