കുവൈത്തിൽ രണ്ടിടത്ത് തീപിടുത്തം

ജാബർ അൽ അഹമ്മദ്, അൽ വഫ്ര ഏരിയകളിലാണ് തീപിടുത്തമുണ്ടായത്

കുവൈത്ത് സിറ്റി: കുവൈത്തിൽ രണ്ടിടത്ത് തീപിടിച്ചു. ജാബർ അൽ അഹമ്മദ്, അൽ വഫ്ര ഏരിയകളിലാണ് കഴിഞ്ഞദിവസം തീപിടുത്തമുണ്ടായത്. ജാബർ അൽ അഹമ്മദ് ഏരിയയിലെ താമസ കെട്ടിടത്തിനാണ് തീപിടിച്ചത്. സംഭവത്തിൽ നാലു പേർക്ക് പരിക്കേൽക്കുകയും ചെയ്തു. സംഭവസ്ഥലത്തെത്തിയ അ​ഗ്നിരക്ഷാ സേന ഉടൻ രക്ഷാപ്രവർത്തനം നടത്തുകയും വീട്ടിൽ ഉണ്ടായിരുന്നവരെ സുരക്ഷിതമായി ഒഴിപ്പിക്കുകയും ചെയ്തു. തീ വ്യാപിക്കുന്നതും കൂടുതൽ നാശനഷ്ടങ്ങൾ ഉണ്ടാകുന്നതും ഒഴിവാക്കി. അൽ സൂർ, അൽ തഹ് രിർ കേന്ദ്രങ്ങളിൽ നിന്നുള്ള അ​ഗ്നിരക്ഷാ സേനയെത്തിയാണ് തീ നിയന്ത്രണവിധേയമാക്കിയത്. പരിക്കേറ്റവരെ ചികിത്സക്കായി ആശുപത്രികളിൽ പ്രവേശിപ്പിക്കുകയും ചെയ്തു. തീ പിടുത്തത്തിന്റെ കാരണം അധികൃതർ അന്വേഷിച്ചു വരികയാണ്. 

അൽ വഫ്രയിൽ ഒരു ഫാമിലെ തൊഴിലാളികളുടെ താമസ സ്ഥലത്താണ് തീപിടിച്ചത്. അൽ വഫ്ര, അൽ നുവൈസീബ് എന്നിവിടങ്ങളിൽ നിന്നുള്ള അ​ഗ്നിരക്ഷാ സേനകൾ എത്തിയാണ് തീ നിയന്ത്രണവിധേയമാക്കിയത്. സംഭവത്തിൽ പരിക്കുകളൊന്നും റിപ്പോർട്ട് ചെയ്തിട്ടില്ല.