മനുഷ്യ ഇടപെടൽ ഇല്ല, പൂർണമായ ഓട്ടോമാറ്റിക് വാഹന പരിശോധനാ കേന്ദ്രം കുവൈത്തിൽ ഉടൻ ആരംഭിക്കും

റോഡ് ഉപയോഗിക്കുന്നവരുടെ ജീവൻ അപകടത്തിലാക്കാൻ സാധ്യതയുള്ള വാഹനങ്ങൾക്ക് ലൈസൻസ് നൽകുന്നത് തടയുന്നതാണ് വകുപ്പിന്‍റെ പ്രധാന ദൗത്യം. കണക്കുകൾ പ്രകാരം വെറും ഒരു മാസത്തിൽ 1,06,000-ത്തിലധികം വാഹനങ്ങൾ പരിശോധിക്കപ്പെട്ടതായി കണ്ടെത്തിയിട്ടുണ്ട്.

കുവൈത്ത് സിറ്റി: കുവൈത്തിലെ ക്യാപിറ്റൽ ഗവർണറേറ്റിൽ പുതിയ വാഹന പരിശോധനാ കേന്ദ്രത്തിൽ പൂർണ്ണമായ ഓട്ടോമാറ്റിക് പരിശോധനാ സംവിധാനം ഉടൻ ആരംഭിക്കുന്നതായി അധികൃതർ അറിയിച്ചു. മനുഷ്യ ഇടപെടൽ ഇല്ലാതെ പ്രവർത്തിക്കുന്ന സംവിധാനം കൊണ്ടുവരികയാണെന്നും ഇത് ഗതാഗതസുരക്ഷാ സേവനങ്ങളിൽ വലിയ സാങ്കേതിക ചുവടുമാറ്റമാകുമെന്നും ജനറൽ ട്രാഫിക് ഡിപ്പാർട്ട്മെന്റിലെ ടെക്നിക്കൽ കാര്യങ്ങളുടെ അസിസ്റ്റന്റ് ഡയറക്ടർ ബ്രിഗേഡിയർ ജനറൽ അഹ്മദ് അൽ-നിമ്രാൻ അറിയിച്ചു.

ഈ നീക്കം കാര്യക്ഷമത വർദ്ധിപ്പിക്കുകയും സുരക്ഷാ മാനദണ്ഡങ്ങൾ കൂടുതൽ ശക്തമാക്കുകയും ചെയ്യുകയാണെന്ന് അദ്ദേഹം പറഞ്ഞു. റോഡ് ഉപയോഗിക്കുന്നവരുടെ ജീവൻ അപകടത്തിലാക്കാൻ സാധ്യതയുള്ള വാഹനങ്ങൾക്ക് ലൈസൻസ് നൽകുന്നത് തടയുന്നതാണ് വകുപ്പിന്‍റെ പ്രധാന ദൗത്യമെന്നും അദ്ദേഹം വ്യക്തമാക്കി. കണക്കുകൾ പ്രകാരം വെറും ഒരു മാസത്തിൽ 1,06,000-ത്തിലധികം വാഹനങ്ങൾ പരിശോധിക്കപ്പെട്ടതായി കണ്ടെത്തിയിട്ടുണ്ട്. ഇതിൽ 2,389 വാഹനങ്ങൾ സുരക്ഷാ മാനദണ്ഡങ്ങൾ പാലിക്കാത്തതിനാൽ സ്ക്രാപ് യാർഡിലേക്ക് അയച്ചതായും റിപ്പോർട്ട് ചെയ്തു.

നിലവിൽ 18 സ്വകാര്യ കമ്പനികൾക്ക് വാഹന പരിശോധന നടത്താൻ അനുമതിയുണ്ട്. ഇതുകൂടാതെ ആറ് പുതിയ അപേക്ഷകൾ പരിഗണനയിലാണ്. കൂടാതെ കൂടുതൽ സ്വകാര്യ സ്ഥാപനങ്ങൾക്കും മന്ത്രാലയത്തിന്റെ മേൽനോട്ടത്തിൽ സിസ്റ്റത്തിൽ ചേരാനുള്ള അവസരം ലഭ്യമാക്കുമെന്നും അദ്ദേഹം വ്യക്തമാക്കി. പുതിയ ഓട്ടോമാറ്റിക് സിസ്റ്റം ഉപയോഗിച്ച് പരിശോധനയ്ക്ക് ചെലവാകുന്ന സമയം വെറും ചില മിനിറ്റുകളായി കുറയുമെന്നും ഇതിലൂടെ പൗരന്മാർക്കും പ്രവാസികൾക്കും എളുപ്പത്തിൽ സേവനം ലഭ്യമാക്കാനും കുവൈത്തിന്റെ റോഡ് സുരക്ഷ ശക്തിപ്പെടുത്താനും സാധിക്കുമെന്ന് ബ്രിഗ്. ജൻ. അൽ-നിമ്രാൻ കൂട്ടിച്ചേർത്തു.