കുവൈത്തിലെ ഫ്രൈഡേ മാർക്കറ്റിൽ വൻ സുരക്ഷാ പരിശോധന; താമസ-തൊഴിൽ നിയമലംഘകർ ഉൾപ്പെടെ 52 പേർ പിടിയിൽ

കുവൈത്തിലെ ഫ്രൈഡേ മാർക്കറ്റിൽ വൻ സുരക്ഷാ പരിശോധന. താമസ-തൊഴിൽ നിയമലംഘകർ ഉൾപ്പെടെ 52 പേർ പിടിയിൽ. പരിശോധനയിൽ ഇഖാമ, തൊഴിൽ നിയമലംഘനങ്ങൾ നടത്തിയ 52 പേർ സുരക്ഷാസേനയുടെ പിടിയിലായി. ഇവർക്കെതിരെ തുടർ നിയമനടപടികൾ സ്വീകരിച്ചു വരികയാണ്.

കുവൈത്ത് സിറ്റി: കുവൈത്തിലെ ഫർവാനിയയിൽ അൽ റായ് പ്രദേശത്തെ ഫ്രൈഡേ മാർക്കറ്റിൽ സുരക്ഷാ പരിശോധന. കഴിഞ്ഞ വെള്ളിയാഴ്ചയാണ് ഗവർണറേറ്റ് സെക്യൂരിറ്റി ഡയറക്ടറേറ്റ് വിപുലമായ പരിശോധന നടത്തിയത്.

പൊതുസുരക്ഷയും ക്രമസമാധാനവും ഉറപ്പുവരുത്തുന്നതിനും നിയമലംഘകരെയും പിടികിട്ടാപ്പുള്ളികളെയും കണ്ടെത്താനുമായി ഫർവാനിയ ഗവർണറേറ്റ് ക്രിമിനൽ ഇൻവെസ്റ്റിഗേഷൻ ഡിപ്പാർട്ട്‌മെന്റുമായി ഏകോപിപ്പിച്ച് നടത്തിയ പരിശോധനയിൽ കുവൈത്ത് മുനിസിപ്പാലിറ്റി, വൈദ്യുതി-ജല-പുനരുപയോഗ ഊർജ്ജ മന്ത്രാലയം, വാണിജ്യ-വ്യവസായ മന്ത്രാലയം, പബ്ലിക് അതോറിറ്റി ഫോർ മാൻപവർ, പബ്ലിക് അതോറിറ്റി ഫോർ ഫുഡ് ആൻഡ് ന്യൂട്രീഷൻ എന്നീ വകുപ്പുകളും പങ്കെടുത്തു. വിവിധ വകുപ്പുകളുടെ ഏകോപനത്തോടെ നടന്ന ഈ കർശന പരിശോധനയിൽ ആകെ 52 പേരാണ് അറസ്റ്റിലായത്.

ഒളിവിൽ പോയെന്ന പരാതി നിലനിൽക്കുന്ന 25 പേർ, ഇഖാമ കാലാവധി കഴിഞ്ഞതുമായി ബന്ധപ്പെട്ട് പിടികിട്ടാപ്പുള്ളികളായിരുന്ന 16 പേർ, തൊഴിൽ നിയമങ്ങൾ ലംഘിച്ച 8 പേർ, സന്ദർശക വിസ കാലാവധി കഴിഞ്ഞിട്ടും രാജ്യത്ത് തുടർന്ന 3 പേർ എന്നിവരാണ് സുരക്ഷാസേനയുടെ പിടിയിലായത്. പിടിയിലായവർക്കെതിരെ തുടർ നിയമനടപടികൾ സ്വീകരിച്ചു വരികയാണെന്ന് അധികൃതർ വ്യക്തമാക്കി.