ഭിന്നശേഷിക്കാർക്കുള്ള സ്ഥലങ്ങളിൽ വാഹനം പാർക്ക് ചെയ്താൽ 1,000 ദിനാര്‍ വരെ പിഴ, കുവൈത്തില്‍ മുന്നറിയിപ്പ്

നിയമലംഘനം ജുഡീഷ്യറിക്ക് കൈമാറുകയാണെങ്കിൽ, ഒരു വർഷത്തിൽ കൂടുതൽ തടവ് ശിക്ഷ ചുമത്താനും കോടതിക്ക് അധികാരമുണ്ട്

കുവൈത്ത് സിറ്റി: ഭിന്നശേഷിക്കാർക്കായി നിശ്ചയിച്ചിട്ടുള്ള സ്ഥലങ്ങളിൽ വാഹനം പാർക്ക് ചെയ്യുന്ന വ്യക്തികൾക്ക് കടുത്ത പിഴ ചുമത്തി കുവൈത്ത്. കർശനമായി നടപ്പാക്കുന്ന പുതിയ ചട്ടങ്ങൾ പ്രകാരം, ഈ സ്ഥലങ്ങളിൽ അനധികൃതമായി പാർക്ക് ചെയ്യുന്നവർക്ക് 150 കുവൈറ്റ് ദിനാർ പിഴ ചുമത്തും. ശിക്ഷകൾ അവിടെ അവസാനിക്കുന്നില്ല. നിയമലംഘനം ജുഡീഷ്യറിക്ക് കൈമാറുകയാണെങ്കിൽ, ഒരു വർഷത്തിൽ കൂടുതൽ തടവ് ശിക്ഷ ഉൾപ്പെടെയുള്ള ഗുരുതരമായ ശിക്ഷകൾ ചുമത്താൻ കോടതിക്ക് അധികാരമുണ്ട്.

മൂന്ന് വർഷത്തിൽ കൂടാത്ത ജയിൽ ശിക്ഷയ്ക്ക് പുറമേ, 600 ദിനാർ മുതൽ 1,000 ദിനാർ  വരെ പിഴ ഈടാക്കാം. അല്ലെങ്കിൽ കോടതി ഈ പിഴകളിൽ ഏതെങ്കിലും  ഒന്ന് ചുമത്താം. ഭിന്നശേഷിയുള്ള വ്യക്തികളോടുള്ള ആദരവ് ഉറപ്പുവരുത്തുന്നതിനും നിയുക്ത പാർക്കിംഗ് നിയമങ്ങൾ പാലിക്കേണ്ടതിൻ്റെ പ്രാധാന്യത്തെക്കുറിച്ച് പൊതുജനങ്ങളിൽ കൂടുതൽ അവബോധം വളർത്തുന്നതിനും ആഭ്യന്തര മന്ത്രാലയത്തിൻ്റെ തുടർച്ചയായ ശ്രമങ്ങളുടെ ഭാഗമാണ് ഈ നീക്കം.