ജിദ്ദ ചേരിവികസനം; കെട്ടിടം പൊളിക്കല്‍ പുനരാരംഭിച്ചു

നഗരത്തിലെ 12 ഡിസ്ട്രിക്ടുകളിലെ കെട്ടിടങ്ങള്‍ പൊളിക്കുന്ന ജോലികളാണ് വീണ്ടും ആരംഭിച്ചത്.

ജിദ്ദ: സൗദി അറേബ്യയിലെ ജിദ്ദയില്‍ ചേരിവികസന പദ്ധതിയുടെ ഭാഗമായ കെട്ടിടം പൊളിക്കല്‍ ജോലികള്‍ പുനരാരംഭിച്ചതായി ചേരി വികസന കമ്മറ്റി. റമദാനില്‍ പൊളിക്കല്‍ ജോലികള്‍ താല്‍ക്കാലികമായി നിര്‍ത്തിവെച്ചിരുന്നു. 

നഗരത്തിലെ 12 ഡിസ്ട്രിക്ടുകളിലെ കെട്ടിടങ്ങള്‍ പൊളിക്കുന്ന ജോലികളാണ് വീണ്ടും ആരംഭിച്ചത്. പൊളിക്കുന്നതിന് മുന്നോടിയായി കെട്ടിടങ്ങള്‍ ഒഴിയാന്‍ ആവശ്യപ്പെട്ട് ഉടമകള്‍ക്കും താമസക്കാര്‍ക്കും ചേരിവികസന കമ്മറ്റി നോട്ടീസുകള്‍ നല്‍കി തുടങ്ങി. ബനീമാലിക്, അല്‍വുറൂദ്, മുശ്രിഫ, ജാമിഅ, അല്‍രിഹാബ്, അസീസിയ, അല്‍റവാബി, അല്‍റബ്വ, അല്‍മുന്‍തസഹാത്ത്, ഖുവൈസ, അല്‍അദ്ര്‍, അല്‍ഫദ്ര്‍, ഉമ്മുസലം, കിലോ 14 എന്നീ ഡിസ്ട്രിക്ടുകളിലാണ് പൊളിക്കല്‍ ജോലികള്‍ പുനരാരംഭിച്ചത്. ഓഗസ്റ്റ് 27ന് പൊളിക്കല്‍ ജോലികള്‍ പൂര്‍ത്തിയാക്കും. 

റിയാദ്: ചെറിയ പെരുന്നാളിന് ശേഷം ജിദ്ദയിൽ 12 ചേരികൾ കൂടി ഒഴിപ്പിക്കും. ഈ ചേരികളിൽ കഴിയുന്നവർക്ക് ജിദ്ദ നഗരസഭ മുന്നറിയിപ്പ് നൽകി. നഗരവികസനത്തിന്‍റെ ഭാഗമായാണ് ജിദ്ദയിൽ ചേരിപ്രദേശങ്ങൾ പൊളിച്ചുനീക്കുന്നത്. 12 ചേരിപ്രദേശങ്ങളിലെ താമസക്കാർക്ക് ബദൽ താമസസൗകര്യത്തിന് നഗരസഭ ആവിഷ്കരിച്ച പദ്ധതി പ്രയോജനപ്പെടുത്താനാണ് നഗരസഭ മുന്നറിയിപ്പ് നൽകിയത്. 

അംഗീകൃത താമസക്കാരായ കുടുംബങ്ങൾക്കും രേഖകളുള്ള കെട്ടിടങ്ങൾ നീക്കം ചെയ്യുന്ന കെട്ടിട ഉടമകൾക്കും ഡവലപ്‌മെന്‍റ് ഹൗസിങ് യൂനിറ്റുകൾ പ്രയോജനപ്പെടുത്താം. എന്നാൽ സാമൂഹിക സുരക്ഷയുടെ ഗുണഭോക്താക്കളല്ലാത്ത, രേഖകൾ ഇല്ലാത്ത ഇത്തരം ചേരികളിൽ താമസിക്കുന്ന പൗരന്മാരുടെ കാര്യം പഠിച്ചുവരുന്നതായി നഗരസഭ അറിയിച്ചു. ബനി മാലിക്, അൽവുറൂദ്, ജാമിഅ, റിഹാബ്, റവാബി, അസീസിയ, റബുഅ, അൽ മുന്ദസഹാത്ത്, ഖുവൈസ, അൽഅദ്ൽ വൽഫദ്ൽ, ഉമ്മു അൽസലാം, കിലോ 14 എന്നിവിടങ്ങളാണ് ഈദിന് ശേഷം പൊളിച്ചുനീക്കുന്ന പ്രദേശങ്ങൾ.