പരിശോധന ശക്തമാക്കി അധികൃതര്; ഒരാഴ്ചക്കിടെ നാടുകടത്തിയത് 39,571 വിദേശികളെ
Synopsis
നിലവില് 50,132 നിയമലംഘകരാണ് നടപടിക്രമങ്ങള്ക്ക് വിധേയരായത്. ഇവരില് 46,416 പേര് പുരുഷന്മാരും 3,716 പേര് സ്ത്രീകളുമാണ്. 39,571 പേര്ക്ക് താല്ക്കാലിക യാത്രാ രേഖകള് സംഘടിപ്പിക്കാന് എംബസികളുമായും കോണ്സുലേറ്റുകളുമായും സഹകരിക്കുന്നു.
റിയാദ്: സൗദി അറേബ്യയുടെ വിവിധ പ്രവിശ്യകളില് ഒരാഴ്ചക്കിടെ സുരക്ഷാ വകുപ്പുകള് നടത്തിയ റെയ്ഡുകളില് 16,243 പ്രവാസി നിയമ ലംഘകര് പിടിയിലായതായി ആഭ്യന്തര മന്ത്രാലയം അറിയിച്ചു. ഒക്ടോബര് 6 മുതല് ഒക്ടോബര് 12 വരെയുള്ള ദിവസങ്ങളില് നടത്തിയ റെയ്ഡുകളില് പിടിയിലായവരില് 9,402 പേര് ഇഖാമ നിയമ ലംഘകരും 4,225 പേര് നുഴഞ്ഞുകയറ്റക്കാരും 2,616 പേര് തൊഴില് നിയമ ലംഘകരുമാണ്.
ഇക്കാലയളവില് അതിര്ത്തികള് വഴി രാജ്യത്ത് നുഴഞ്ഞുകയറാന് ശ്രമിച്ച 301 പേരും അറസ്റ്റിലായി. ഇവരില് 37 ശതമാനം പേര് യെമന് സ്വദേശികളാണ്. 58 ശതമാനം പേര് എത്യോപ്യക്കാര് അഞ്ച് ശതമാനം മറ്റ് രാജ്യങ്ങളില് നിന്നുള്ളവരുമാണ്. അതിര്ത്തികള് വഴി അനധികൃത രീതിയില് രാജ്യം വിടാന് ശ്രമിച്ച 16 പേരും ഇഖാമ, തൊഴില് നിയമ ലംഘകര്ക്കും നുഴഞ്ഞുകയറ്റക്കാര്ക്കും ജോലിയും താമസവും യാത്രാ സൗകര്യവും നല്കിയ 18 പേരും അറസ്റ്റിലായി.
Read More- മതില് ചാടികടക്കാന് ശ്രമിക്കുന്നതിനിടെ വീണ് പരിക്കേറ്റ പ്രവാസി മലയാളിയെ നാട്ടിലെത്തിച്ചു
നിലവില് 50,132 നിയമലംഘകരാണ് നടപടിക്രമങ്ങള്ക്ക് വിധേയരായത്. ഇവരില് 46,416 പേര് പുരുഷന്മാരും 3,716 പേര് സ്ത്രീകളുമാണ്. 39,571 പേര്ക്ക് താല്ക്കാലിക യാത്രാ രേഖകള് സംഘടിപ്പിക്കാന് എംബസികളുമായും കോണ്സുലേറ്റുകളുമായും സഹകരിക്കുന്നു. സ്വദേശങ്ങളിലേക്ക് തിരിച്ചയക്കുന്നതിനു മുന്നോടിയായി 2,871 പേര്ക്ക് ടിക്കറ്റ് ബുക്ക് ചെയ്യാന് നടപടികള് സ്വീകരിക്കുന്നു. ഒരാഴ്ചക്കിടെ 39,571 നിയമ ലംഘകരെ സൗദിയില് നിന്ന് നാടുകടത്തിയതായും ആഭ്യന്തര മന്ത്രാലയം അറിയിച്ചു.
Read More - സൗദിയില് വന് ലഹരിമരുന്ന് വേട്ട; 772 കിലോ ഹാഷിഷ് പിടികൂടി, 80 പേര് അറസ്റ്റില്
അതിര്ത്തി സുരക്ഷാ ചട്ടങ്ങള് ലംഘിച്ച് ആര്ക്കെങ്കിലും രാജ്യത്തേക്ക് പ്രവേശിക്കാന് സൗകര്യം ചെയ്തുകൊടുക്കുകയോ അല്ലെങ്കില് അദ്ദേഹത്തിന് ഗതാഗതമോ പാര്പ്പിടമോ എന്തെങ്കിലും സഹായമോ സേവനമോ നല്കുകയോ ചെയ്താല് പരമാവധി 15 വര്ഷം വരെ തടവ് ലഭിക്കുമെന്ന് ആഭ്യന്തര മന്ത്രാലയം മുന്നറിയിപ്പ് നല്കി. കൂടാതെ, ഒരു ദശലക്ഷം റിയാല് വരെ പിഴ, വാഹനങ്ങള് അഭയം നല്കിയ സ്ഥലം എന്നിവ കണ്ടുകെട്ടല് എന്നീ നടപടികള് ഇവര്ക്കെതിരെ സ്വീകരിക്കുമെന്നും അവരുടെ പേരുകള് പ്രാദേശിക മാധ്യമങ്ങളില് വെളിപ്പെടുത്തുമെന്നും മുന്നറിയിപ്പുണ്ട്.
ഏഷ്യാനെറ്റ് ന്യൂസ് മലയാളത്തിലൂടെ Pravasi Malayali News ലോകവുമായി ബന്ധപ്പെടൂ. Gulf News in Malayalam ജീവിതാനുഭവങ്ങളും, അവരുടെ വിജയകഥകളും വെല്ലുവിളികളുമൊക്കെ — പ്രവാസലോകത്തിന്റെ സ്പന്ദനം നേരിട്ട് അനുഭവിക്കാൻ Asianet News Malayalam