ഖത്തറിൽ കടൽ ഉത്സവം, 11ാമത് സെൻയാർ ഫെസ്റ്റിവലിന് തുടക്കമാകുന്നു

മുത്തുവാരലായ ലിഫ, മീൻ പിടുത്തമായ ഹദ്ദാഖ് എന്നീ മത്സരങ്ങളാണ് സെൻയാർ ഫെസ്റ്റിവലിന്റെ ഭാ​ഗമായി നടക്കുന്നത്. 

ദോഹ: ഖത്തറിൽ സെൻയാർ ആഘോഷത്തിന് തുടക്കമാകുന്നു. പരമ്പരാ​ഗത കടൽ ജീവിതത്തിന്റെ ആഘോഷമായ ഈ ഫെസ്റ്റിവൽ ഏപ്രിൽ 16ന് ആരംഭിക്കും. കതാറ ബീച്ചിൽ നടക്കുന്ന ഫെസ്റ്റിവലിന്റെ പതിനൊന്നാമത് പതിപ്പാണ് ആരംഭിക്കുന്നത്. ഇതിന്റെ രജിസ്ട്രേഷൻ പരിപാടികൾ ആരംഭിച്ചതായി സംഘാടകർ അറിയിച്ചു. പരമ്പരാ​ഗത മുത്തുവാരലായ ലിഫ, മീൻ പിടുത്തമായ ഹദ്ദാഖ് എന്നീ മത്സരങ്ങളാണ് സെൻയാർ ഫെസ്റ്റിവലിന്റെ ഭാ​ഗമായി നടക്കുന്നത്. 

തത്സമയ സം​ഗീത പരിപാടി, നാടോടി നൃത്ത കലാ പ്രകടനങ്ങൾ, പരമ്പരാ​ഗത ഭക്ഷണങ്ങളും കര കൗശല വസ്തുക്കളും ലഭിക്കുന്ന സ്റ്റാളുകൾ എന്നിവയും ഫെസ്റ്റിവലിൽ ഉണ്ടാകും. സെൻയാർ ഫെസ്റ്റിവലിന്റെ ഔദ്യോഗിക വെബ്‌സൈറ്റ് വഴിയോ ദോഹയിലെ നിശ്ചിത കൗണ്ടറുകൾ വഴിയോ പരിപാടിയിൽ പങ്കെടുക്കുന്നവർക്ക് രജിസ്റ്റർ ചെയ്യാവുന്നതാണ്.