മലയാളം മിഷൻ ഒമാൻ സംഘടിപ്പിക്കുന്ന സുഗതാഞ്ജലി ഫൈനൽ ജൂൺ 9ന് നടക്കും

മലയാളത്തിന്റെ പ്രിയ കവയിത്രിയും, മലയാളം മിഷൻ ഭരണസമിതി അംഗവുമായിരുന്ന ശ്രീമതി സുഗതകുമാരി ടീച്ചറുടെ സ്മരണാർത്ഥം മലയാളം മിഷൻ എല്ലാ വർഷവും നടത്തി വരുന്ന കാവ്യാലാപന മത്സരമാണ് സുഗതാഞ്ജലി.

മസ്‌ക്കറ്റ്: മലയാളം മിഷൻ ഒമാൻ സുഗതാഞ്ജലി ചാപ്റ്റർ തല ഫൈനൽ മത്സരങ്ങൾ ജൂൺ 9 വെള്ളിയാഴ്ച നടക്കും. മേഖലാ മത്സരങ്ങളിൽ നിന്ന് ഒന്നും രണ്ടും മൂന്നും സ്ഥാനങ്ങൾ നേടിയ കുട്ടികളാണ് ഫൈനലിൽ പങ്കെടുക്കുന്നത്. റൂവി സി ബി ഡിയിലുള്ള ടാലന്റ് സ്‍പേസ് ഹാളിൽ വച്ച് ജൂൺ 9 ന് രാവിലെ പത്തുമണിക്കാണ്  മത്സരങ്ങൾ ആരംഭിക്കുന്നത്.

മലയാളത്തിന്റെ പ്രിയ കവയിത്രിയും, മലയാളം മിഷൻ ഭരണസമിതി അംഗവുമായിരുന്ന ശ്രീമതി സുഗതകുമാരി ടീച്ചറുടെ സ്മരണാർത്ഥം മലയാളം മിഷൻ എല്ലാ വർഷവും നടത്തി വരുന്ന കാവ്യാലാപന മത്സരമാണ് സുഗതാഞ്ജലി. ഇത്തവണത്തെ സുഗതാഞ്ജലിയിൽ ശ്രീ. വൈലോപ്പിള്ളി ശ്രീധരമേനോന്റെ കവിതകളാണ് ഉൾപ്പെടുത്തിയിരിക്കുന്നത്. ലോകമെമ്പാടുമുള്ള മലയാളം മിഷൻ ചാപ്റ്ററുകളിൽ നിന്നുള്ള കുട്ടികൾക്കാണ് പരിപാടിയിൽ പങ്കെടുക്കാൻ സാധിക്കുന്നത്. ഓരോ ചാപ്റ്ററിൽ നിന്നും ആദ്യ മൂന്നു സ്ഥാനങ്ങൾ കിട്ടുന്ന കുട്ടികളെ നാട്ടിൽ വച്ചു നടക്കുന്ന മെഗാ ഫൈനൽ മത്സരത്തിൽ പങ്കെടുപ്പിക്കും.

മലയാളം മിഷൻ ഒമാൻ പരിധിയിലുള്ള മേഖലാ മത്സരങ്ങളിൽ സബ് ജൂനിയർ, ജൂനിയർ വിഭാഗങ്ങളിൽ മത്സരിച്ചു വിജയിച്ച നാൽപ്പതോളം കുട്ടികളാണ് ഫൈനൽ മത്സരങ്ങളിൽ പങ്കെടുക്കുന്നത്. എല്ലാ ഭാഷാസ്നേഹികളേയും, ഭാഷാപ്രവർത്തകരെയും ജൂൺ 9നു നടക്കുന്ന  പ്രസ്തുത പരിപാടിയിലേക്ക് സ്വാഗതം ചെയ്യുന്നതായി സംഘടകസമിതി അറിയിച്ചു.

ഏഷ്യാനെറ്റ്  ന്യൂസ് ലൈവ് യുട്യൂബില്‍ കാണാം...