Tawakkalna App: ഡ്രോണോ മിസൈലോ കണ്ടാൽ റിപ്പോർട്ട് ചെയ്യാം, പുതിയ സംവിധാനമൊരുക്കി സൗദി

ഗൾഫ് രാജ്യങ്ങൾക്ക് നേരെയുള്ള ഇറാൻ്റെ ആക്രമണങ്ങളുടെ പശ്ചാത്തലത്തിൽ, സംശയാസ്പദമായ ഡ്രോണുകളും മിസൈലുകളും റിപ്പോർട്ട് ചെയ്യാൻ സൗദി പ്രതിരോധ മന്ത്രാലയം 'തവക്കൽന' ആപ്പിൽ പുതിയ സേവനം ആരംഭിച്ചു. ദേശീയ സുരക്ഷയിൽ പൊതുജനങ്ങളെ പങ്കാളികളാക്കി, വേഗത്തിൽ പ്രതിരോധ നടപടികൾ സ്വീകരിക്കുകയാണ് ഈ നീക്കത്തിലൂടെ ലക്ഷ്യമിടുന്നത്.

റിയാദ്: ഗൾഫ് രാജ്യങ്ങൾക്ക് നേരെ ഇറാൻ നടത്തിവരുന്ന മിസൈൽ-ഡ്രോൺ ആക്രമണങ്ങളുടെ പശ്ചാത്തലത്തിൽ, സംശയാസ്പദമായ വ്യോമ കാഴ്ചകൾ റിപ്പോർട്ട് ചെയ്യാൻ പൗരന്മാരെയും പ്രവാസികളെയും സഹായിക്കുന്ന പുതിയ സേവനം സൗദി പ്രതിരോധ മന്ത്രാലയം ആരംഭിച്ചു. 'തവക്കൽന' (Tawakkalna) ആപ്പ് വഴിയാണ് ഡ്രോണുകളെയും മിസൈലുകളെയും കുറിച്ചുള്ള വിവരങ്ങൾ അധികൃതരെ അറിയിക്കാൻ സാധിക്കുക.

ദേശീയ സുരക്ഷയിൽ പൊതുജനങ്ങളെ കൂടി പങ്കാളികളാക്കുന്ന ഈ നീക്കം ​ഗുണകരമായ ചുവടുവെപ്പാണെന്നാണ് മന്ത്രാലയം വക്താവ് മേജർ ജനറൽ തുർക്കി അൽ-മാലിക്കി വിശേഷിപ്പിച്ചത്. രാജ്യത്തിന് നേരെയുള്ള ഏത് വ്യോമാക്രമണത്തെയും പ്രതിരോധിക്കാനുള്ള ശേഷി സൗദി സായുധ സേനയ്ക്കുണ്ടെന്നും അദ്ദേഹം കൂട്ടിച്ചേർത്തു. വിവരങ്ങൾ വേഗത്തിൽ കൈമാറാനും രാജ്യത്തെ സംരക്ഷിക്കാനായി വേ​ഗത്തിലുള്ള പ്രതികരണം നടത്താനും റിപ്പോർട്ടിങ് സേവനം വഴിയൊരുക്കുമെന്നാണ് സൗദി അധികൃതർ വ്യക്തമാക്കുന്നത്.

പശ്ചാത്തലം

ഇറാനുനേരെ അമേരിക്കയും ഇസ്രായേലും നടത്തിയ ആക്രമണങ്ങൾക്ക് തിരിച്ചടിയായാണ് ഇറാൻ ഗൾഫ് മേഖലയിലുടനീളം സൈനിക-വ്യവസായ കേന്ദ്രങ്ങളെ ലക്ഷ്യമിട്ട് ആക്രമണം തുടങ്ങിയത്. ഇറാൻ്റെ ആണവപദ്ധതിയെക്കുറിച്ച് യുഎസ് പ്രസിഡന്റ് ഡൊണാൾഡ് ട്രംപ് ആരംഭിച്ച ചർച്ചകൾ പരാജയപ്പെട്ടതിനെത്തുടർന്ന് ഫെബ്രുവരി 28-നാണ് യുഎസ്-ഇസ്രായേൽ സഖ്യം ഇറാനിൽ ആക്രമണം നടത്തിയത്.

നാശനഷ്ടങ്ങളും പ്രതിരോധവും

യുദ്ധം തുടങ്ങിയ ശേഷം ഏകദേശം 200 ഡ്രോണുകളും 30-ലധികം മിസൈലുകളും സൗദി വ്യോമ പ്രതിരോധ സേന വെടിവെച്ചിട്ടു. അയൽരാജ്യങ്ങളിൽ ഇതിലും വലിയ തോതിലുള്ള ആക്രമണങ്ങളാണ് റിപ്പോർട്ട് ചെയ്തിരിക്കുന്നത്. ബഹറൈൻ 125 മിസൈലുകളും 203 ഡ്രോണുകളും തകർത്തു. ആക്രമണങ്ങളിൽ രണ്ട് പേർ കൊല്ലപ്പെട്ടു. യുഎഇ 294 ബാലിസ്റ്റിക് മിസൈലുകൾ, 15 ക്രൂയിസ് മിസൈലുകൾ, 1,600 ഡ്രോണുകൾ എന്നിവ പ്രതിരോധിച്ചു. ആറ് പേർ ഇവിടെ കൊല്ലപ്പെട്ടു. മേഖലയിലുടനീളമായി ഇതുവരെ 24 പേർ കൊല്ലപ്പെട്ടതായാണ് റിപ്പോർട്ട്. രാത്രികാലങ്ങളിൽ ആക്രമണം നടത്തുകയും പകൽ സമയം ഇടവേള നൽകുകയും ചെയ്യുന്ന രീതിയാണ് ഇറാൻ പിന്തുടരുന്നത്.

ഇറാന്റെ വാദം

ആക്രമണങ്ങളുടെ ഉത്തരവാദിത്തത്തിൽ നിന്ന് ഒഴിയാനാണ് ഇറാൻ ശ്രമിക്കുന്നത്. ഇറാന്റെ 'ഷാഹീദ്' (Shahed) ഡ്രോണുകൾക്ക് സമാനമായ 'ലൂക്കാസ് ഡ്രോണുകൾ' (Lucas drone) ശത്രുപക്ഷമാണ് വിന്യസിക്കുന്നതെന്ന് സൗദിയിലെ ഇറാൻ അംബാസഡർ അലിറെസ ഇനായത്തി അവകാശപ്പെട്ടു. എന്നാൽ, ഗൾഫ് രാജ്യങ്ങളിലെ അമേരിക്കൻ ഇതര കേന്ദ്രങ്ങളെ ആക്രമിക്കുമെന്ന് ഇറാന്റെ സൈന്യം നേരത്തെ തന്നെ പരസ്യമായി ഭീഷണിപ്പെടുത്തിയിരുന്നതിനാൽ ഈ വാദത്തെ ലോകരാജ്യങ്ങൾ സംശയത്തോടെയാണ് കാണുന്നത്.