റബ് അൽ ഖാലി മരുഭൂമിയില്‍ കണ്ടെത്തിയത് 5000 വ‍‍‍‍ർഷം പഴക്കമുള്ള നാ​ഗരികതയുടെ അവശേഷിപ്പുകള്‍!

റബ് അൽ ഖാലി മരുഭൂമിയിലുള്ള സറൂഖ് അൽ ഹദീദ് പുരാവസ്തു മേഖലയിൽ നിന്നുമാണ് 5,000 വർഷം പഴക്കം ചെന്ന നാ​ഗരികതയുടെ തെളിവുകൾ കണ്ടെത്തിയിരിക്കുന്നത്

അബുദാബി: ദശാബ്ദങ്ങളായിട്ടില്ലെങ്കിലും വർഷങ്ങളായി ആർട്ടിഫിഷ്യൽ ഇന്റലിജൻസ് ഒരു ചർച്ചാ വിഷയമാണ്. ഓരോ മേഖലകളിലും എങ്ങനെയൊക്കെ എഐ ഉപയോ​ഗ പ്രദമാക്കാം എന്നത് ഇപ്പോഴും ചർച്ച ചെയ്യപ്പെടുന്നു. ഇപ്പോഴിതാ ഭൂതകാലത്തിന്റെ അവശേഷിപ്പുകൾ കണ്ടെത്താനും ഭാവിയിൽ വിപ്ലവമാകുന്ന ആർട്ടിഫിഷ്യൽ ഇന്റലിജൻസ് ഉപയോ​ഗിക്കുകയാണ്. ലോകത്തിലെ ഏറ്റവും വലിയ മരുഭൂമിയിലെ മണൽക്കൂനകൾക്കടിയിൽ നിന്നും 5000 വർഷം പഴക്കമുള്ള നാ​ഗരികതയുടെ അവശേഷിപ്പുകൾ കണ്ടെത്തിയിരിക്കുകയാണ്. അബുദാബിയിലെ ഖലീഫ യൂണിവേഴ്സിറ്റി ​ഗവേഷകരാണ് ഈ കണ്ടെത്തലിനു പിന്നിൽ. ആർട്ടിഫിഷ്യൽ ഇന്റലിജൻസ് ഉപയോ​ഗിച്ചാണ് ഇത് സാധ്യമാക്കിയിരിക്കുന്നത്. 

ജിയോസയൻസ് പ്രസിദ്ധീകരിച്ച പഠനപ്രകാരം, റബ് അൽ ഖാലി മരുഭൂമിയിലുള്ള സറൂഖ് അൽ ഹദീദ് പുരാവസ്തു മേഖലയിൽ നിന്നുമാണ് 5,000 വർഷം പഴക്കം ചെന്ന നാ​ഗരികതയുടെ തെളിവുകൾ കണ്ടെത്തിയിരിക്കുന്നത്. സിന്തറ്റിക് അപ്പർച്ചർ റഡാർ അല്ലെങ്കിൽ എസ്എആർ സാങ്കേതിക വിദ്യ ഉപയോ​ഗിച്ച് ​ഗവേഷക സംഘം ആർട്ടിഫിഷ്യൽ ഇന്റലിജൻസും ഉപ​ഗ്രഹ ഇമേജറിയും സമന്വയിപ്പിച്ചാണ് പ്രദേശം കണ്ടെത്തിയിരിക്കുന്നത്. അറേബ്യൻ പെനിൻസുലയിൽ 2,50,000 മൈലുകൾ വ്യാപിച്ചുകിടക്കുന്ന മരുഭൂമിയാണ് റബ് അൽ ഖാലി. തുടർച്ചയായ മരുഭൂ പ്രദേശമായതിനാൽ പുരാവസ്തു ​ഗവേഷണം നടത്തുന്നത് സങ്കീർണമാണ്. മണൽക്കൂനകളുടെ പാറ്റേണുകൾ അനുസരിച്ച് ഇവിടുത്തെ ഭൂപ്രകൃതിയും മാറിക്കൊണ്ടിരിക്കും. പുരാവസ്തു സർവേയിൽ സാധാരണയായി നടത്തുന്ന പ്രാരംഭ ഘട്ടങ്ങൾക്കു പോലും മരുഭൂമിയുടെ ഈ ഒരു സവിശേഷത വെല്ലുവിളികൾ ഉയർത്താറുണ്ട്.

രാജ്യത്തിന്റെ ഭൂരിഭാ​ഗവും മരുഭൂമിയാണ്. അതുകൊണ്ടുതന്നെ മണൽക്കൂനകൾക്കടിയിലേക്ക് ആഴത്തിലുള്ള പരിശോധനകൾ പ്രയാസമേറിയതാണെന്ന് ഖലീഫ സർവകലാശാലയിലെ പരിസ്ഥിതി, ജിയോഫിസിക്കൽ സയൻസസ് ലാബ് മേധാവി ഡയാന ഫ്രാൻസിസ് പറയുന്നു. ഈ ഒരു സാഹചര്യത്തിലാണ് ഉപ​ഗ്രഹ ഡാറ്റ സഹായകമായത്. പിന്നീട് മണലിനടിയിലെ കാഴ്ചകൾ കാണാൻ കഴിയുന്ന തരത്തിൽ ആർട്ടിഫിഷ്യൽ ഇന്റലിജൻസും ഉപ​ഗ്രഹ ഇമേജറിയും സമന്വയിപ്പിച്ചു. തുടർന്നാണ് മണൽക്കൂനകൾക്കടിയിലെ ദൃശ്യങ്ങളുടെ ത്രിമാന മോഡലുകൾ കൂടി ലഭ്യമായത്. പ്രദേശത്തെ പുരാവസ്തു മേഖലകളുടെ മേൽനോട്ട ചുമതലയുള്ള ​സർക്കാർ ഏജൻസിയായ ദുബൈ കൾച്ചർ ഇവിടെ ഖനനത്തിന് അം​ഗീകാരം നൽകിയിട്ടുണ്ട്. അറബ് മേഖലയിലെ പുരാവസ്തു കണ്ടെത്തലുകളിൽ വലിയ സംഭാവന തന്നെയാകും ഇതെന്ന് ഡയാന ഫ്രാൻസിസ് പറഞ്ഞു.