യുഎഇയില് 275 പേര്ക്ക് കൂടി കൊവിഡ്; 51 ദിവസമായി ഒരു കൊവിഡ് മരണം പോലും റിപ്പോര്ട്ട് ചെയ്തിട്ടില്ല
Synopsis
പുതിയതായി നടത്തിയ 2,82,907 കൊവിഡ് പരിശോധനകളില് നിന്നാണ് പുതിയ രോഗികളെ കണ്ടെത്തിയത്.
അബുദാബി: യുഎഇയില് ഇന്ന് 275 പേര്ക്ക് കൊവിഡ് വൈറസ് ബാധ സ്ഥിരീകരിച്ചതായി ആരോഗ്യ - പ്രതിരോധ മന്ത്രാലയം അറിയിച്ചു. കഴിഞ്ഞ 24 മണിക്കൂറിനിടെ ചികിത്സയിലായിരുന്ന 334 പേരാണ് രോഗമുക്തരായത്. രാജ്യത്ത് കൊവിഡ് ബാധിച്ച് ഇന്നും പുതിയ മരണങ്ങളൊന്നും റിപ്പോര്ട്ട് ചെയ്യപ്പെട്ടിട്ടില്ല. വാക്സിനേഷനില് കൈവരിച്ച അതുല്യ നേട്ടമാണ് കൊവിഡ് കേസുകള് കുത്തനെ കുറയുന്നതിലേക്കും രാജ്യത്ത് കൊവിഡ് മരണങ്ങള് സംഭവിക്കുന്നത് തടയാനും സഹായകമായത്.
പുതിയതായി നടത്തിയ 2,82,907 കൊവിഡ് പരിശോധനകളില് നിന്നാണ് പുതിയ രോഗികളെ കണ്ടെത്തിയത്. ഇതുവരെയുള്ള കണക്കുകള് പ്രകാരം ആകെ 8,98,045 പേര്ക്ക് യുഎഇയില് കൊവിഡ് വൈറസ് ബാധ സ്ഥിരീകരിച്ചിട്ടുണ്ട്. ഇവരില് 8,81,148 പേര് ഇതിനോടകം തന്നെ രോഗമുക്തരായി. 2,302 പേരാണ് രാജ്യത്ത് ആകെ കൊവിഡ് ബാധിച്ച് മരണപ്പെട്ടത്. നിലവില് രാജ്യത്ത് 14,595 കൊവിഡ് രോഗികളാണ് ചികിത്സയിലുള്ളത്.
ജനുവരി ആദ്യത്തില് പ്രതിദിന കൊവിഡ് കേസുകള് മൂവായിരത്തിന് മുകളിലെത്തിയിരുന്നെങ്കിലും പിന്നീട് വളരെ വേഗത്തില് കൊവിഡ് ബാധിതരുടെ എണ്ണം നിയന്ത്രിക്കാന് സാധിച്ചു. പരിശോധന, യാത്രാ നിബന്ധനകള്, ആളുകള് കൂട്ടം ചേരുന്നതിന് ഓരോ സമയത്തും കൊണ്ടുവന്ന നിയന്ത്രണങ്ങള്, സമ്പര്ക്ക പട്ടിക തയ്യാറാക്കിയുള്ള പരിശോധനകള് എന്നിവയിലൂടെയാണ് രോഗവ്യാപനം തടയാന് സാധിച്ചത്. അടച്ചിട്ട സ്ഥലങ്ങളിലും പൊതുഗതാഗത സംവിധാനങ്ങള് ഉപയോഗിക്കുമ്പോഴും മാസ്ക് ധരിക്കേണ്ടതുണ്ടെങ്കിലും ഭൂരിഭാഗം കൊവിഡ് നിയന്ത്രണങ്ങളും രാജ്യത്ത് ഇതിനോടകം പിന്വലിച്ചിട്ടുണ്ട്. വാക്സിനെടുത്തവര്ക്ക് പിസിആര് പരിശോധനയിലും ഇളവ് നല്കി. സ്കൂളുകള് എല്ലാ കുട്ടികളെയും പ്രവേശിപ്പിച്ച് അധ്യയനം നടത്തുകയാണ്.
ഏഷ്യാനെറ്റ് ന്യൂസ് മലയാളത്തിലൂടെ Pravasi Malayali News ലോകവുമായി ബന്ധപ്പെടൂ. Gulf News in Malayalam ജീവിതാനുഭവങ്ങളും, അവരുടെ വിജയകഥകളും വെല്ലുവിളികളുമൊക്കെ — പ്രവാസലോകത്തിന്റെ സ്പന്ദനം നേരിട്ട് അനുഭവിക്കാൻ Asianet News Malayalam