ചരിത്രം കുറിച്ച് ബ്ലൂ ഒറിജിന്‍, പുനരുപയോഗിച്ച ന്യൂ ഗ്ലെൻ ബൂസ്റ്റർ വിജയകരമായി ലാന്‍ഡ് ചെയ്‌തു; ദൗത്യത്തിൽ ഭാഗിക തിരിച്ചടിയും

ജെഫ് ബെസോസിന്‍റെ ബ്ലൂ ഒറിജിൻ, ന്യൂ ഗ്ലെൻ റോക്കറ്റിന്‍റെ ബൂസ്റ്റർ വിജയകരമായി പുനരുപയോഗിച്ചും കടലില്‍ ലാന്‍ഡ് ചെയ്യിച്ചും ചരിത്രം സൃഷ്‌ടിച്ചു. എന്നാൽ, രണ്ടാം ഘട്ടത്തിലെ സാങ്കേതിക തകരാർ മൂലം പേലോഡായ ഉപഗ്രഹം നഷ്ടമായത് ദൗത്യത്തിന്‍റെ പൂർണ്ണ വിജയത്തിന് മങ്ങലേൽപ്പിച്ചു. ൃ

ഫ്ലോറിഡ: 2026 ഏപ്രിൽ 19-ന് ബഹിരാകാശ രംഗത്ത് ശ്രദ്ധേയമായ നേട്ടം കൈവരിച്ച് അമേരിക്കന്‍ കമ്പനിയായ ബ്ലൂ ഒറിജിൻ. കമ്പനിയുടെ ന്യൂ ഗ്ലെൻ റോക്കറ്റിൽ മുമ്പ് ഉപയോഗിച്ചിരുന്ന ഒരു ബൂസ്റ്റർ വീണ്ടും പുനരുപയോഗിച്ച് വിജയകരമായ വിക്ഷേപണം നടത്തിയിരിക്കുകയാണ് ജെഫ് ബെസോസിന്‍റെ ഈ ബഹിരാകാശ കമ്പനി. ഫ്ലോറിഡയിലെ കേപ് കാനവറലിൽ നിന്ന് ഏപ്രിൽ 19-ാം തീയതി രാവിലെ 7:25-ന് (ET) നടന്ന ഈ വിക്ഷേപണം, ന്യൂ ഗ്ലെൻ റോക്കറ്റിന്‍റെ മൂന്നാമത്തെ ദൗത്യമായിരുന്നു. ടെക്സസിലെ എഎസ്‍ടി സ്പേസ്മൊബൈൽ കമ്പനിക്കായി ഒരു കമ്മ്യൂണിക്കേഷൻ ഉപഗ്രഹം ബഹിരാകാശത്തിലേക്ക് എത്തിക്കുക എന്നതാണ് ഈ ദൗത്യത്തിന്‍റെ പ്രധാന ലക്ഷ്യം.

നെവർ ടെൽ മി ദി ഓഡ്‍സ്

കുറഞ്ഞ ചെലവിൽ കൂടുതൽ ആവർത്തനക്ഷമമായ ബഹിരാകാശ യാത്രകൾ സംഘടിപ്പിക്കുക എന്ന ലക്ഷ്യത്തിലേക്ക് ബ്ലൂ ഒറിജിൻ കൈവരിച്ച വലിയ ചുവടുവെയ്പ്പായാണ് ഈ നേട്ടം വിലയിരുത്തപ്പെടുന്നത്. "നെവർ ടെൽ മി ദി ഓഡ്‍സ്" (Never Tell Me the Odds) എന്ന് പേരിട്ടിരിക്കുന്ന ഈ ആദ്യഘട്ട ബൂസ്റ്റർ ഇതിനുമുമ്പ് 2025 നവംബറിൽ നടന്ന NG-2 ദൗത്യത്തിൽ ഉപയോഗിച്ചിരുന്നു. അന്ന് ഇത് രണ്ട് നാസ ഉപഗ്രഹങ്ങളെ വിജയകരമായി ഭ്രമണപഥത്തിൽ എത്തിച്ച ശേഷം അറ്റ്ലാന്‍റിക് സമുദ്രത്തിലെ ബ്ലൂ ഒറിജിന്‍റെ ഡ്രോൺ ഷിപ്പിൽ സുരക്ഷിതമായി ലാന്‍ഡ് ചെയ്യുകയായിരുന്നു. പുതിയ ദൗത്യത്തിലും ബൂസ്റ്റർ മുകളിലെ ഘട്ടത്തിൽ നിന്ന് വേർപെട്ടതിന് ശേഷം ജാക്ക്ലിൻ (Jacklyn) ഫ്ലോട്ടിംഗ് പ്ലാറ്റ്‌ഫോമിൽ കൃത്യമായ പ്രൊപ്പൽഷൻ ലാൻഡിംഗ് നടത്തി.

ഒരു ചരിത്ര വിജയം; ഒരു തിരിച്ചടിയും

കമ്പനിയിലെ എഞ്ചിനീയർമാർ ആവേശത്തോടെ ഈ നേട്ടം ആഘോഷിച്ചു. പരമാവധി 25 പ്രാവശ്യം വരെ ഉപയോഗിക്കാവുന്ന രീതിയിൽ രൂപകൽപ്പന ചെയ്തിരിക്കുന്ന ബൂസ്റ്ററുകൾ, ഭാവിയിൽ ചെലവ് കുറയ്ക്കാനും സ്‍പേസ് എക്‌സിന്‍റെ ഫാൽക്കൺ 9-നോട് കിടപിടിക്കുമെന്നും വിലയിരുത്തപ്പെടുന്നു. എങ്കിലും ഈ വിജയത്തിന് തൊട്ടുപിന്നാലെ ഒരു പ്രധാന പ്രശ‌്‌നവും ബ്ലൂ ഒറിജിന്‍ റിപ്പോർട്ട് ചെയ്തു. ബ്ലുബേർഡ് 7 ഉപഗ്രഹം രണ്ടാം ഘട്ടത്തിൽ ഉണ്ടായ സാങ്കേതിക പിശക് മൂലം പ്രതീക്ഷിച്ചതിലും താഴ്ന്ന ഭ്രമണപഥത്തിലേക്ക് പ്രവേശിക്കുകയും പിന്നീട് ഭൂമിയുടെ അന്തരീക്ഷത്തിലേക്ക് തിരിച്ചുകയറുകയും ചെയ്തതായി എഎസ്‍ടി സ്പേസ്മൊബൈൽ പറയുന്നു. ഇതോടെ ദൗത്യത്തിന്‍റെ പൂർണ്ണ വിജയം സംശയത്തിലായി.

ഭാവിയിൽ നാസയുടെ ചന്ദ്രദൗത്യങ്ങൾക്കും മറ്റ് ഉപഗ്രഹ പദ്ധതികൾക്കും ന്യൂ ഗ്ലെൻ ഉപയോഗിക്കാൻ ബ്ലൂ ഒറിജിൻ പദ്ധതിയിടുന്നതിനാൽ, മുഴുവൻ ദൗത്യത്തിന്‍റെ വിശ്വാസ്യത ഉറപ്പാക്കേണ്ടതിന്‍റെ ആവശ്യകത ഇതോടെ കൂടുതൽ ശക്തമായിരിക്കുകയാണ്.