ഇടിമിന്നല്‍ ബഹിരാകാശ കാലാവസ്ഥയെ എങ്ങനെ സ്വാധീനിക്കുന്നു; രഹസ്യത്തിന്‍റെ ചുരുളഴിക്കാന്‍ നാസ ദൗത്യം

നാസയുടെ പുതിയ ഉപഗ്രഹ ദൗത്യമായ കാൻവാസ്, ഭൂമിയിലെ മിന്നൽ പോലുള്ള പ്രതിഭാസങ്ങൾ ബഹിരാകാശ കാലാവസ്ഥയെ എങ്ങനെ സ്വാധീനിക്കുന്നു എന്ന് പഠിക്കുന്നു. വളരെ താഴ്ന്ന ഫ്രീക്വൻസിയിലുള്ള (VLF) റേഡിയോ തരംഗങ്ങളെ അളക്കുന്ന ഈ ദൗത്യം, ബഹിരാകാശ കാലാവസ്ഥാ മോഡലുകൾ മെച്ചപ്പെടുത്താനും ഭ്രമണപഥത്തിലെ ഉപകരണങ്ങളെ സംരക്ഷിക്കാനും സഹായിക്കും.

ഭൂമിയിലെ മിന്നൽ പ്രഭാവങ്ങൾ ബഹിരാകാശ കാലാവസ്ഥയെ എങ്ങനെ ബാധിക്കുന്നു എന്നതിനെക്കുറിച്ച് കൂടുതൽ വ്യക്തത നേടാൻ അമേരിക്കൻ ബഹിരാകാശ ഏജൻസിയായ നാസ ഒരു പുതിയ ചെറിയ ഉപഗ്രഹ ദൗത്യം ആരംഭിച്ചു. കാൻവാസ് (ക്ലൈമറ്റോളജി ഓഫ് ആന്ത്രോപോജെനിക് ആൻഡ് നാച്ചുറൽ VLF വേവ് ആക്ടിവിറ്റി ഇൻ സ്‌പേസ്) (CANVAS - Climatology of Anthropogenic and Natural VLF Wave Activity in Space) എന്ന ഈ ദൗത്യം, വളരെ താഴ്ന്ന ഫ്രീക്വൻസിയിലുള്ള (VLF) റേഡിയോ തരംഗങ്ങൾ വഴി ഭൂമി–ബഹിരാകാശ ഇടപെടലുകൾ പഠിക്കുകയാണ് ലക്ഷ്യമിടുന്നത്. 2026 ഏപ്രിൽ 7-ന് മിനിച്ചർ (Minotaur IV) റോക്കറ്റിൽ, കാലിഫോർണിയയിലെ വാൻഡൻബർഗ് സ്‌പേസ് ഫോഴ്‌സ് ബേസിൽ നിന്നാണ് 4U ക്യൂബ്‍സാറ്റ് (CubeSat) വിക്ഷേപിച്ചത്.

കാൻവാസ് ഉപഗ്രഹം മിന്നൽ ഡിസ്‌ചാർജുകളും ഭൂമിയിലെ ട്രാൻസ്‌മിറ്ററുകളും സൃഷ്‌ടിക്കുന്ന വിഎൽഎഫ് (VLF) തരംഗങ്ങളെ അളക്കുന്നു. അയോണോസ്‌ഫിയറിലൂടെ മാഗ്നറ്റോസ്‌ഫിയറിലേക്ക് ഒഴുകുന്ന ഊർജത്തിന്‍റെ അളവ് കണ്ടെത്തുക എന്നതാണ് ഇതിന്‍റെ പ്രധാന ലക്ഷ്യം. ഇതുവഴി ഭൂമിക്ക് സമീപമുള്ള ബഹിരാകാശ കാലാവസ്ഥയെക്കുറിച്ചുള്ള അറിവ് കൂടുതൽ വികസിപ്പിക്കാൻ കഴിയും.

ഈ ഉപഗ്രഹത്തിൽ രണ്ട് പ്രധാന ഉപകരണങ്ങളുണ്ട്. മൂന്ന് ആക്‌സിസുകൾ ഉള്ള മാഗ്നറ്റോമീറ്ററും രണ്ട് ആക്‌സിസുകൾ ഉള്ള ഇലക്‌ട്രിക് ഫീൽഡ് സെൻസറും ആണ് ഇവ. ഈ ഉപകരണങ്ങൾ ഉപയോഗിച്ച് തരംഗങ്ങളുടെ മാഗ്നറ്റിക്, ഇലക്ട്രിക് ഘടകങ്ങൾ വിശദമായി അളക്കുന്നു. ഓരോ തരംഗത്തിന്‍റെ ശക്തിയും ദിശയും കണ്ടെത്തി, ഭൂമിയിലെ മിന്നൽ നിരീക്ഷണങ്ങളുമായി താരതമ്യം ചെയ്യുമ്പോൾ, ലോകമെമ്പാടുമുള്ള വിഎൽഎഫ് തരംഗങ്ങളുടെ മോഡലുകളെ പഠിക്കാൻ കഴിയും.

കാൻവാസ് ദൗത്യത്തിന്‍റെ പ്രധാന ലക്ഷ്യം പ്രകൃതിദത്തവും മനുഷ്യനിർമിതവുമായ വിഎൽഎഫ് (VLF) സിഗ്നലുകൾ ബഹിരാകാശത്തെ എങ്ങനെ സ്വാധീനിക്കുന്നു എന്നതാണ്. ഈ തരംഗങ്ങൾ മാഗ്നറ്റോസ്‍ഫിയറിലേക്ക് പ്രവേശിച്ച് ഭൂമിയെ ചുറ്റിപ്പറ്റിയുള്ള വാൻ അലൻ റേഡിയേഷൻ ബെൽറ്റുകളിൽ ഉള്ള ഇലക്‌ട്രോണുകളെ ചിതറിക്കുന്നു. ബഹിരാകാശ കാലാവസ്ഥയ്ക്ക് അനുയോജ്യമായ മികച്ച മോഡലുകൾ വികസിപ്പിക്കുന്നതിന് ഈ കണ്ടെത്തലുകൾ സഹായിക്കും. ഭ്രമണപഥത്തിലെ ഉപകരണങ്ങൾ സംരക്ഷിക്കാനും ബഹിരാകാശയാത്രികരുടെ സുരക്ഷ ഉറപ്പാക്കാനും ഇത് നമ്മെ സഹായിക്കും. ഒരു വർഷത്തെ ദൗത്യ സമയത്തിനുള്ളിൽ, കാൻവാസ് ലോകമെമ്പാടുമുള്ള വിഎൽഎഫ് തരംഗങ്ങളെക്കുറിച്ചുള്ള ഡാറ്റ ശേഖരിക്കും.