'എനിക്ക് പാക് ബന്ധം ഇല്ല': പ്രഭാസിന്‍റെ പുതിയ ചിത്രത്തിലെ നായികയ്ക്കെതിരെ സൈബര്‍ ആക്രമണം

പഹൽഗാം ഭീകരാക്രമണത്തിന് പിന്നാലെ നടിയായ ഇമാൻവിക്ക് നേരെ സൈബർ ആക്രമണം. പാകിസ്ഥാൻ ബന്ധമുണ്ടെന്ന ആരോപണങ്ങൾ താരം നിഷേധിച്ചു.

ഹൈദരാബാദ്: സംവിധായകൻ ഹനു രാഘവപുടിക്കൊപ്പം പ്രഭാസിന്റെ അടുത്ത ചിത്രം കഴിഞ്ഞ വർഷം ഔദ്യോഗികമായി പ്രഖ്യാപിച്ചത്. ഫൗജി എന്ന് പേരിട്ടിരിക്കുന്ന ചിത്രത്തില്‍ അതിൽ പ്രഭാസിന്‍റെ നായികയായി ഇമാൻ ഇസ്മയില്‍ എന്ന ഇമാൻവി എത്തും എന്നാണ് പ്രഖ്യാപിക്കപ്പെട്ടത്.  എന്നാല്‍ പഹൽഗാമിൽ അടുത്തിടെ നടന്ന ഭീകരാക്രമണത്തെത്തുടർന്ന് താരത്തിനെതിരെ ഇപ്പോള്‍ സൈബര്‍ ആക്രമണം നടക്കുകയാണ്. 

ഇമാൻവി പാകിസ്ഥാൻ വംശജയാണെന്നും അവരുടെ കുടുംബത്തിന് പാകിസ്ഥാൻ സൈന്യവുമായി ബന്ധമുണ്ടെന്നും നിരവധി കിംവദന്തികൾ ഓണ്‍ലൈനില്‍ പ്രചരിച്ചതോടെയാണ് ഇത്. ആരോപണങ്ങൾക്കെതിരെ നടി ഇപ്പോൾ തന്റെ ഇൻസ്റ്റാഗ്രാം അക്കൗണ്ടിൽ ഒരു നീണ്ട കുറിപ്പ് എഴുതിയിട്ടുണ്ട്. തന്നെക്കുറിച്ച് പ്രചരിക്കുന്നതെല്ലാം നുണയാണ് എന്നാണ് താരം പറയുന്നത്. 

പഹൽഗാം ഭീകരാക്രമണത്തിലെ ഇരകൾക്ക് അനുശോചനം അറിയിച്ചുകൊണ്ടാണ് ഇമാൻവി തന്‍റെ കുറിപ്പ് ആരംഭിച്ചത്. "പഹൽഗാമിൽ നടന്ന ദാരുണമായ സംഭവത്തിൽ മരണപ്പെട്ടവര്‍ക്ക് എന്‍റെ ആത്മാർത്ഥവും ഹൃദയംഗമവുമായ അനുശോചനം അറിയിക്കാൻ ഞാൻ ആഗ്രഹിക്കുന്നു. ജീവൻ നഷ്ടപ്പെട്ട എല്ലാവരോടും അവരുടെ പ്രിയപ്പെട്ടവരോടും എന്റെ ഹൃദയം ചേര്‍ന്നിരിക്കുന്നു. നിരപരാധികളുടെ ഏതൊരു മരണവും ദാരുണമാണ്, അത് എന്‍റെ മനസില്‍ ഭാരമുണ്ടാക്കും. അക്രമാസക്തമായ പ്രവൃത്തികളെ ഞാൻ ശക്തമായി അപലപിക്കുന്നു. 

കലയിലൂടെ വെളിച്ചവും സ്നേഹവും പകരുക എന്ന ദൗത്യം എപ്പോഴും ഏറ്റെടുത്തിട്ടുള്ള ഒരാളെന്ന നിലയിൽ, നമുക്കെല്ലാവർക്കും ഒന്നായി ഒന്നിക്കാൻ കഴിയുന്ന ഒരു ദിവസം ഉടൻ ഉണ്ടാകുമെന്ന് ഞാൻ പ്രതീക്ഷിക്കുന്നു." നടി പറഞ്ഞു. 

തന്‍റെ വ്യക്തിത്വത്തെക്കുറിച്ച് പ്രചരിക്കുന്ന നുണകൾ ചൂണ്ടിക്കാണിച്ചുകൊണ്ടാണ് പിന്നീട് കുറിപ്പ് തുടരുന്നത്, "വിഭജനം സൃഷ്ടിക്കുന്നതിനും വിദ്വേഷം പ്രചരിപ്പിക്കുന്നതിനുമായി എന്നെക്കുറിച്ചും എന്റെ കുടുംബത്തെക്കുറിച്ചും എന്റെ വ്യക്തിത്വത്തെക്കുറിച്ചും ഓണ്‍ലൈനിലും മറ്റും തെറ്റായി പ്രചരിപ്പിച്ച കിംവദന്തികളെയും നുണകളെയും അഭിസംബോധന ചെയ്യാനും ഞാൻ ആഗ്രഹിക്കുന്നു. 

ഒന്നാമതായി, എന്റെ കുടുംബത്തിലെ ആരും പാകിസ്ഥാൻ സൈന്യവുമായി ഒരു തരത്തിലും ബന്ധപ്പെട്ടിട്ടില്ല. വിദ്വേഷം പ്രചരിപ്പിക്കുക എന്ന ഏക ലക്ഷ്യത്തോടെ വരുന്ന ഇതുമായി ബന്ധപ്പെട്ട ഓൺലൈൻ ട്രോളുകൾ കെട്ടിച്ചമച്ചതാണ്. നിരാശാജനകമായ കാര്യം വാർത്താ ഏജൻസികളും പത്രപ്രവർത്തകരും സോഷ്യൽ മീഡിയയിലുള്ളവരും ഈ വ്യാജപ്രചാരത്തിന്‍റെ സത്യം മനസിലാക്കാന്‍ പരാജയപ്പെട്ടു എന്നതാണ്. പകരം ഈ അപവാദ പ്രസ്താവനകൾ ആവർത്തിക്കപ്പെടുകയും ചെയ്തു" ഇമാൻവി പറയുന്നു. 

"ഹിന്ദി, തെലുങ്ക്, ഗുജറാത്തി, ഇംഗ്ലീഷ് എന്നിവ സംസാരിക്കുന്ന അഭിമാനിയായ ഒരു ഇന്ത്യൻ അമേരിക്കക്കാരനാണ് ഞാൻ. എന്റെ മാതാപിതാക്കൾ ചെറുപ്പത്തിൽ അമേരിക്കയിലേക്ക് നിയമപരമായി കുടിയേറിയതിനുശേഷം കാലിഫോർണിയയിലെ ലോസ് ഏഞ്ചൽസിലാണ് ഞാൻ ജനിച്ചത്. താമസിയാതെ അവർ അമേരിക്കൻ പൗരന്മാരായി. 

യുഎസ്എയിലെ എന്റെ യൂണിവേഴ്സിറ്റി വിദ്യാഭ്യാസം പൂർത്തിയാക്കിയ ശേഷം, നടി, നൃത്തസംവിധായിക, ഡാന്‍സര്‍ എന്നീ നിലകളിൽ ഞാൻ കലാരംഗത്ത് ഒരു കരിയർ ഉണ്ടാക്കിയതാണ്. ഈ മേഖലയിൽ വളരെയധികം പ്രവർത്തിച്ചതിന് ശേഷമാണ് ഇന്ത്യൻ ചലച്ചിത്രമേഖലയിൽ പ്രവർത്തിക്കാനുള്ള അവസരങ്ങൾ ലഭിച്ചത്. അതേ ചലച്ചിത്ര വ്യവസായം എന്റെ ജീവിതത്തിൽ വലിയ സ്വാധീനം ചെലുത്തിയിട്ടുണ്ട്, എന്റെ രക്തത്തിൽ ആഴത്തിൽ പതിഞ്ഞിരിക്കുന്ന ഇന്ത്യൻ സ്വത്വവും സംസ്കാരവും ഉള്ള ഒരാളെന്ന നിലയിൽ, ഐക്യത്തിന് വേണ്ടി എന്നും നിലകൊള്ളും" നടി തന്‍റെ കുറിപ്പ് അവസാനിപ്പിക്കുന്നു. 

ഹനു സംവിധാനം ചെയ്യുന്ന ഒരു പീരിയഡ് ഡ്രാമയിലാണ് ഇമാൻവി അഭിനയിക്കാൻ ഒരുങ്ങുന്നത്. മൈത്രി മൂവി മേക്കേഴ്‌സ് ആണ് ചിത്രം നിർമ്മിക്കുന്നത്. മിഥുൻ ചക്രബർത്തിയും ജയപ്രദയും ഈ ചിത്രത്തില്‍ പ്രധാന വേഷങ്ങളിൽ അഭിനയിക്കും. 1940 കളിലെ കഥയാണ് ഈ ചിത്രം പറയുന്നത്.