അമ്പയര്‍ ഔട്ട് വിളിക്കും മുമ്പെ ധോണിയുടെ റിവ്യൂ

ധര്‍മശാല: അമ്പയറുടെ തീരുമാനം റിവ്യൂ ചെയ്യുമ്പോള്‍ ധോണിക്ക് അപൂര്‍വമായെ പിഴക്കാറുള്ളു. റിവ്യൂ എടുക്കുന്നതിന് മുമ്പ് വിരാട് കോലി എപ്പോഴും ധോണിയുടെ അഭിപ്രായം തേടാറുമുണ്ട്. എന്നാല്‍ ധര്‍മശാലയില്‍ ശ്രീലങ്കക്കെതിരായ ഒന്നാം ഏകദിത്തില്‍ അമ്പയര്‍ ഔട്ട് വിളിക്കും മുമ്പ് തീരുമാനം റിവ്യൂ ചെയ്ത ധോണിയുടെ തീരുമാനമാണ് ക്രിക്കറ്റ് ലോകത്തെ ചര്‍ച്ച.

33-ാം ഓവറില്‍ ലങ്കയുടെ സചിത്ര പതിരിനയുടെ പന്തില്‍ വാലറ്റക്കാരന്‍ ജസ്പ്രീ‌ത് ബൂമ്ര വിക്കറ്റിന് മുന്നില്‍ കുടുങ്ങിയപ്പോഴായിരുന്നു ധോണിയുടെ നാടകീയ റീവ്യു. ലങ്കന്‍ താരങ്ങള്‍ എല്‍ബിഡബ്ല്യുവിനായി അപ്പീല്‍ ചെയ്യുകയും അമ്പയര്‍ വിരലുയര്‍ത്താന്‍ തുടങ്ങുകയും ചെയ്തപ്പോഴായിരുന്നു നോണ്‍ സ്ട്രൈക്കിംഗ് എന്‍ഡിലായിരുന്ന ധോണി നേരിട്ട് റിവ്യൂ ആവശ്യപ്പെട്ടത്.

റീപ്ലേകളില്‍ ധോണിയുടെ റിവ്യൂ ശരിയാണെന്ന് വ്യക്തമായി. ലൈനിന് പുറത്ത് പിച്ച് ചെയ്ത പന്തായതിനാല്‍ അമ്പയര്‍ക്ക് ഔട്ട് വിളിച്ച തീരുമാനം പിന്‍വലിക്കേണ്ടി വന്നു. ധോണിയുടെ റിവ്യൂ തീരുമാനത്തിലൂടെ ജീവന്‍ ലഭിച്ചെങ്കിലും അധികം വൈകാതെ പരിനിതയുടെ പന്തില്‍ കൂറ്റനടിക്ക് ശ്രമിച്ച് ബൂമ്ര ബൗള്‍ഡായി.