ചാംപ്യൻസ്‌ ലീഗ് പ്രീക്വാര്‍ട്ടര്‍ ലൈനപ്പായി; ബാഴ്‌സ-ചെൽസി പോരാട്ടം വരുന്നു

ലണ്ടൻ: ഈ വര്‍ഷത്തെ യുവേഫ ചാംപ്യൻസ് ലീഗ് പ്രീക്വാര്‍ട്ടര്‍ ലൈനപ്പായി. ബാഴ്‌സലോണ-ചെൽസി പോരാട്ടവും റയൽമാഡ്രിഡ്-പാരിസ്‌ സെന്റ് ജെ‍ർമെയ്ന്‍ മൽസരവുമാണ് ഏറെ ആകര്‍ഷണീയം. ക്രിസ്റ്റ്യാനോ റൊണാള്‍ഡോയും നെയ്‌മറും നേര്‍ക്കുനേര്‍ വരുന്നു എന്നതാണ് റയൽമാഡ്രിഡ്-പാരിസ്‌ സെന്റ് ജെ‍ർമെയ്ന്‍ മൽസരത്തിന്‍റെ സവിശേഷത. ജര്‍മ്മൻ ശക്തികളായ ബയേണിന് ബെസിക്‌റ്റസും മാഞ്ചസ്റ്റര്‍ യുണൈറ്റഡിന് സെവിയ്യയുമാണ് എതിരാളികള്‍. യുവന്റൻസ്-ടോട്ടൻഹാം പോരാട്ടമാണ് മറ്റൊരു സവിശേഷത. ഇംഗ്ലീഷ് പ്രീമിയര്‍ ലീഗിലെ വമ്പൻമാരായ മാഞ്ചസ്റ്റര്‍ സിറ്റിയെ നേരിടുന്നത് ബേസലായിരിക്കും. എഫ് സി പോര്‍ട്ടോയും ലിവര്‍പൂളും തമ്മിലാണ് മറ്റൊരു മൽസരം. റോമ-ഷാക്‌തര്‍ ഡോണെറ്റ്‌സ്‌ക് പോരാട്ടവും യുവേഫ ചാംപ്യൻസ് ലീഗ് പ്രീ ക്വാര്‍ട്ടറിൽ കാണാം.