'വാട്സ്ആപ്പ് പ്ലസ്', ഇനി ചാറ്റിംഗ് പഴയപോലെയാവില്ല; സബ്സ്ക്രിപ്ഷന് സേവനത്തിന്റെ സവിശേഷതകള് ഇവ
Synopsis
മെറ്റയുടെ പുതിയ ഓപ്ഷണല് സബ്സ്ക്രിപ്ഷന് സേവനമായ 'വാട്സ്ആപ്പ് പ്ലസ്' വരുന്നു. കൂടുതല് ചാറ്റുകള് പിന് ചെയ്യാനും, കസ്റ്റം തീമുകള് ഉപയോഗിക്കാനും, ആപ്പ് ഐക്കണുകള് മാറ്റാനുമുള്ള സൗകര്യങ്ങള് ഈ പ്രീമിയം സേവനത്തില് ഉണ്ടാകും. ഉപഭോക്താക്കള്ക്ക് കൂടുതല് വ്യക്തിഗതമായ അനുഭവം നല്കാനാണ് ഇതിലൂടെ ലക്ഷ്യമിടുന്നത്.
കാലിഫോര്ണിയ: ലോകമെമ്പാടും വ്യാപകമായി ഉപയോഗിക്കുന്ന ഇന്സ്റ്റന്റ് മെസേജിംഗ് ആപ്ലിക്കേഷനായ വാട്സ്ആപ്പ് പുതിയ സബ്സ്ക്രിപ്ഷന് സേവനം ആരംഭിക്കുന്നതായി സ്ഥിരീകരിച്ച് മാതൃകമ്പനിയായ മെറ്റ. 'വാട്സ്ആപ്പ് പ്ലസ്' എന്നായിരിക്കും ഈ ഓപ്ഷനല് വാട്സ്ആപ്പ് സബ്സ്ക്രിപ്ഷന് സേവനത്തിന്റെ പേര്. വാട്സ്ആപ്പ് ഇന്റര്ഫേസ് കസ്റ്റമൈസ് ചെയ്യാമെന്നതും കൂടുതല് ഫീച്ചറുകള് ലഭിക്കുമെന്നതുമാണ് വാട്സ്ആപ്പ് പ്ലസിന്റെ പ്രത്യേകതകള്. വാട്സ്ആപ്പ് സബ്സ്ക്രിപ്ഷന് ലഭിക്കാനായി ഉപഭോക്താക്കള് മാസംതോറും എത്ര രൂപ മുടക്കണം എന്നും വ്യക്തമല്ല. യോഗ്യരായ ടെസ്റ്റര്മാര്ക്ക് വാട്സ്ആപ്പ് പ്ലസ് ഒരു മാസത്തേക്ക് സൗജന്യമായി മെറ്റ നല്കിയേക്കും.
'വാട്സ്ആപ്പ് പുതിയ ഓപ്ഷനല് സബ്സ്ക്രിപ്ഷന് സേവനമായ വാട്സ്ആപ്പ് പ്ലസ് പരീക്ഷിക്കുകയാണ്. ആപ്പ് ഉപഭോക്താക്കള്ക്ക് കൂടുതല് ക്രമീകൃതവും വ്യക്തിഗതവുമായ അനുഭവം നല്കുന്നതായിരിക്കും വാട്സ്ആപ്പ് പ്ലസ് സേവനം. കൂടുതല് ചാറ്റുകള് പിന് ചെയ്യാനുള്ള സൗകര്യം, കസ്റ്റം ലിസ്റ്റുകള്, പുതിയ ചാറ്റ് തീമുകള് തുടങ്ങിയ പ്രീമിയം ഫീച്ചറുകള് വാട്സ്ആപ്പ് പ്ലസിലുണ്ടാവും. ഇതിനായി കുറഞ്ഞ അളവില് ഉപഭോക്താക്കളെ വച്ചുള്ള ബീറ്റ ടെസ്റ്റിംഗ് മെറ്റ നടത്തിവരികയാണ്. ആളുകള്ക്ക് വളരെ ഉപകാരമുള്ള ഫീച്ചറുകളാണ് വാട്സ്ആപ്പ് പ്ലസിലുണ്ടാവുക എന്ന് ഉറപ്പിക്കാനാണ് കമ്പനി ശ്രമിക്കുന്നത്'- എന്നും മെറ്റ വക്താവ് വ്യക്തമാക്കി.
വാട്സ്ആപ്പ് പ്ലസിന്റെ പ്രധാന സവിശേഷതകള്
വാട്സ്ആപ്പിന്റെ സബ്സ്ക്രിപ്ഷന് മോഡലില് ലഭ്യമാവുന്ന എല്ലാ ഫീച്ചറുകളെയും കുറിച്ച് മെറ്റ വിശദീകരിച്ചിട്ടില്ല. എന്നാല് വാട്സ്ആപ്പ് അപ്ഡേറ്റ് ട്രാക്കറായ വാബീറ്റ ഇന്ഫോ പറയുന്നത് താഴെ പറയുന്ന ഫീച്ചറുകള് സബ്സ്ക്രിപ്ഷന് സേവനമായ വാട്സ്ആപ്പ് പ്ലസിലുണ്ടാകും എന്നാണ്.
1. വാട്സ്ആപ്പ് സബ്സ്ക്രൈബര്മാര്ക്ക് 20 ചാറ്റുകള് വരെ പിന് ചെയ്ത് വെക്കാനുള്ള സൗകര്യം. സൗജന്യ ഉപഭോക്താക്കള്ക്ക് മൂന്ന് സംഭാഷണങ്ങള് മാത്രമേ നിലവില് പിന് ചെയ്യാനാവൂ.
2. വാട്സ്ആപ്പ് പ്ലസ് ഉപഭോക്താക്കള്ക്ക് പുതിയ ചാറ്റ് തീമുകളും വ്യക്തിഗത ആപ്പ് ഐക്കണുകളും കൊണ്ട് ആപ്ലിക്കേഷന് പുത്തന് രൂപം നല്കാനാകും.
3. തെരഞ്ഞെടുത്ത കസ്റ്റം ലിസ്റ്റുകള്ക്കും വ്യക്തിഗത ചാറ്റുകള്ക്കും പ്രത്യേക നോട്ടിഫിക്കേഷനുകളും റിങ്ടോണുകളും ക്രമീകരിക്കാനുള്ള സൗകര്യം.
4. കോണ്ടാക്റ്റുകളും ഗ്രൂപ്പ് ചാറ്റുകളും മെച്ചപ്പെട്ട രീതിയില് ക്രമീകരിക്കാം.
ഏറ്റവും പുതിയ Technology News മലയാളത്തിൽ അറിയാൻ ഏഷ്യാനെറ്റ് ന്യൂസ് മലയാളം ഒപ്പമിരിക്കുക. Mobile Reviews in Malayalam, AI പോലുള്ള പുതുപുത്തൻ സാങ്കേതിക നവീകരണങ്ങൾ തുടങ്ങി ടെക് ലോകത്തിലെ എല്ലാ പ്രധാന അപ്ഡേറ്റുകളും അറിയാൻ Asianet News Malayalam