പുതിയ പങ്കാളിത്തം പ്രഖ്യാപിച്ച് ഓപ്പൺഎഐയും ആമസോണും

മൈക്രോസോഫ്റ്റുമായുള്ള എക്സ്ക്ലൂസീവ് കരാർ അവസാനിച്ചതിന് പിന്നാലെ, നിർമ്മിത ബുദ്ധി (എഐ) രംഗത്ത് വലിയ മാറ്റങ്ങൾ സൂചിപ്പിക്കുന്ന വിധത്തിൽ ഓപ്പൺ എഐ പുതിയ കൂട്ടുകെട്ടുകളിലേക്ക് നീങ്ങുന്നു. അതിന്റെ ഭാഗമായി ഓപ്പൺ എഐയും ആമസോണും തമ്മിൽ ഒരു ദീർഘകാല തന്ത്രപ്രധാന പങ്കാളിത്തം പ്രഖ്യാപിച്ചു. ആമസോൺ വെബ് സർവീസ് (AWS) വഴി ഓപ്പൺ എഐയുടെ ഏറ്റവും പുതിയ എഐ മോഡലുകൾ ഉപഭോക്താക്കൾക്ക് ലഭ്യമാക്കുക എന്നതാണ് ഈ കരാറിന്റെ പ്രധാന ലക്ഷ്യം.

ഇതിനു മുൻപ് 2025 നവംബറിൽ ഇരുകമ്പനികളും തമ്മിൽ ഒരു കരാർ ഉണ്ടായിരുന്നു. പക്ഷേ അത് പ്രധാനമായും കമ്പ്യൂട്ടിംഗ് ശേഷി വർദ്ധിപ്പിക്കുന്നതിനായിരുന്നു. എന്നാൽ പുതിയ കരാർ അതിനേക്കാൾ വിപുലമാണ്. ഓപ്പൺ എഐയുടെ മുൻനിര എഐ മോഡലുകൾ എഡബ്ല്യുഎസ് ഉപഭോക്താക്കൾക്ക് ലഭ്യമാക്കുന്നതോടൊപ്പം, ഇരുവരും ചേർന്ന് പുതുതലമുറ എഐ പരിഹാരങ്ങൾ വികസിപ്പിക്കാനുള്ള പദ്ധതിയും ഇതിൽ ഉൾപ്പെടുന്നു.

ഈ കരാറിന്റെ ഭാഗമായി ആമസോൺ, ഓപ്പൺ എഐയിൽ ആകെ 50 ബില്യൺ ഡോളർ നിക്ഷേപിക്കും. ആദ്യം 15 ബില്യൺ ഡോളർ നിക്ഷേപിക്കുന്നതും ശേഷിക്കുന്ന 35 ബില്യൺ ഡോളർ നിശ്ചിത വ്യവസ്ഥകൾ നിറവേറ്റിയതിന് ശേഷം നൽകുന്നതുമാണ് പദ്ധതി. ഈ നിക്ഷേപം എഐ മേഖലയിലെ ഏറ്റവും വലിയ സാമ്പത്തിക ഇടപാടുകളിൽ ഒന്നായിരിക്കും.

പങ്കാളിത്തത്തിലെ പ്രധാന ആകർഷണം 'സ്റ്റേറ്റ്‌ഫുൾ റൺടൈം എൻവയോൺമെന്റ്' എന്ന പുതിയ സാങ്കേതിക സംവിധാനമാണ്. ഓപ്പൺ എഐയുടെ മോഡലുകൾ ഉപയോഗിച്ച് പ്രവർത്തിക്കുന്ന ഈ സംവിധാനം ആമസോൺ വെബ് സർവീസിലെ ആമസോൺ ബെഡ്‌റോക്ക് പ്ലാറ്റ്‌ഫോമിലൂടെ ലഭ്യമാകും. ഇത് എഐ മോഡലുകൾക്ക് മെമ്മറി, കമ്പ്യൂട്ട് തുടങ്ങിയ ഘടകങ്ങളുമായി നേരിട്ട് ഇടപഴകാൻ സഹായിക്കും. ഇതിലൂടെ കൂടുതൽ കാര്യക്ഷമവും സങ്കീർണ്ണമായ ജോലികൾ കൈകാര്യം ചെയ്യാൻ ശേഷിയുള്ളതുമായ എഐ ആപ്ലിക്കേഷനുകൾ സൃഷ്ടിക്കാൻ കഴിയും.

ഇതോടൊപ്പം ആമസോൺ വെബ് സർവീസ്, ഓപ്പൺ എഐയുടെ ഫ്രണ്ടിയർ മോഡലുകളുടെ എക്സ്ക്ലൂസീവ് തേർഡ്-പാർട്ടി ക്ലൗഡ് വിതരണക്കാരനും ആകും. ഓപ്പൺ എഐയുടെ എന്റർപ്രൈസ് സേവനങ്ങളിലേക്കുള്ള ആക്സസും ഇതിലൂടെ കൂടുതൽ വ്യാപിപ്പിക്കും. കൂടാതെ നിലവിലുള്ള കമ്പ്യൂട്ട് കരാർ 38 ബില്യൺ ഡോളറിൽ നിന്ന് 100 ബില്യൺ ഡോളറായി അടുത്ത എട്ട് വർഷത്തിനുള്ളിൽ വർദ്ധിപ്പിക്കാനാണ് തീരുമാനം.

കരാറിന്റെ ഭാഗമായി ട്രെയിനിയം (Trainium) ചിപ്പുകൾ ഉൾപ്പെടുന്ന ഉയർന്ന ശേഷിയുള്ള കമ്പ്യൂട്ടിംഗ് സംവിധാനങ്ങൾ ഓപ്പൺ എഐ ഉപയോഗിക്കും. 2027-ഓടെ പുറത്തിറങ്ങുന്ന ട്രെയിനിയം 4 ചിപ്പുകളും ഈ പദ്ധതിയിൽ ഉൾപ്പെടും. ഈ പുതിയ കൂട്ടുകെട്ട് എഐ മേഖലയിലെ മത്സരം കൂടുതൽ ശക്തമാക്കുമെന്ന് വിദഗ്ധർ വിലയിരുത്തുന്നു.