ഇന്ന് മുതല് യുപിഐ ഇടപാടുകള് അതിവേഗം സാധ്യമാകും; ബാലന്സ് പരിശോധനയിലടക്കം കൂടുതല് മാറ്റങ്ങള് ഉടന്
Synopsis
രാജ്യത്ത് യുപിഐ സേവനങ്ങളില് ജൂണ് 16 മുതല് മാറ്റങ്ങള്, പണം അയക്കലും സ്വീകരിക്കലും കൂടുതല് വേഗത്തില് ഇന്ന് മുതല് സാധ്യമാകും
ദില്ലി: രാജ്യത്ത് യുപിഐ സേവനങ്ങളില് ഇന്നുമുതല് മാറ്റങ്ങള്. യുപിഐ ട്രാന്സാക്ഷനുകള് കൂടുതല് വേഗത്തില് ജൂണ് 16 മുതല് സാധ്യമാകും. മറ്റ് ചില മാറ്റങ്ങള് ഓഗസ്റ്റ് മാസത്തോടെ യുപിഐ ഇടപാടുകളില് വരും. ഉപഭോക്തൃ സേവനം മെച്ചപ്പെടുത്തുന്നതിന്റെ ഭാഗമായാണ് നാഷണല് പേയ്മെന്റ് കോര്പ്പറേഷന് ഓഫ് ഇന്ത്യ (എന്പിസിഐ) ഈ അപ്ഡേറ്റുകള് കൊണ്ടുവരുന്നത്.
ഇന്ത്യയിലെ ഓണ്ലൈന് പണമിടപാടുകള് വേഗത്തിലാക്കാനുള്ള നടപടികള് കൈക്കൊണ്ടിരിക്കുകയാണ് യൂണിഫൈഡ് പേയ്മെന്റ്സ് ഇന്റര്ഫേസ് (യുപിഐ). ഇന്ന് മുതല് യുപിഐ പണമിടപാടുകള് കൂടുതല് വേഗത്തില് സാധ്യമാകും. നേരത്തെ പണമിടപാടുകള് (Request Pay, Response Pay (Debit and Credit) പൂര്ത്തീകരിക്കാന് 30 സെക്കന്ഡ് സമയം എടുത്തിരുന്നെങ്കില് ഇനിയത് 15 സെക്കന്ഡുകളായി കുറയും. ട്രാന്സാക്ഷന് സ്റ്റാറ്റസ് പരിശോധിക്കാന് വേണ്ട സമയം 30 സെക്കന്ഡില് നിന്ന് 10 സെക്കന്ഡായി കുറയും. ട്രാന്സാക്ഷന് റിവേഴ്സലിനും ഇനിമുതല് 10 സെക്കന്ഡുകള് ധാരാളം, നേരത്തെ ഈ സേവനത്തിന് 30 സെക്കന്ഡ് സമയം ആവശ്യമായിരുന്നു. അക്കൗണ്ട്+ഐഎഫ്എസ്സി അടിസ്ഥാനത്തിലുള്ള ഇടപാടുകളുടെ ദൈര്ഘ്യം 15 സെക്കന്ഡില് നിന്ന് 10 സെക്കന്ഡുകളായി കുറയ്ക്കുകയും നാഷണല് പേയ്മെന്റ് കോര്പ്പറേഷന് ഓഫ് ഇന്ത്യ ചെയ്തിട്ടുണ്ട്.
ഓഗസ്റ്റ് മാസം മുതല് മറ്റ് ചില മാറ്റങ്ങളും രാജ്യത്തെ യുപിഐ ഇടപാടുകള് നിലവില് വരും. ഒരു ദിവസം യുപിഐ ആപ്പ് വഴി 50 തവണ വരെയാകും ബാലന്സ് പരിശോധിക്കാന് കഴിയുക. ഇതടക്കം ഏറെ പരിഷ്കാരങ്ങളാണ് രാജ്യത്തെ യുപിഐ ഇടപാടുകളില് വരാനിരിക്കുന്നത്. രാജ്യത്തെ ഓണ്ലൈന് പണമിടപാടുകള് കൂടുതല് സുരക്ഷിതവും ലളിതവുമാക്കുന്നതിന്റെ ഭാഗമായാണ് നാഷണല് പേയ്മെന്റ് കോര്പ്പറേഷന് ഓഫ് ഇന്ത്യ പുത്തന് പരിഷ്കാരങ്ങള് കൊണ്ടുവരുന്നത്.
ഏറ്റവും പുതിയ Technology News മലയാളത്തിൽ അറിയാൻ ഏഷ്യാനെറ്റ് ന്യൂസ് മലയാളം ഒപ്പമിരിക്കുക. Mobile Reviews in Malayalam, AI പോലുള്ള പുതുപുത്തൻ സാങ്കേതിക നവീകരണങ്ങൾ തുടങ്ങി ടെക് ലോകത്തിലെ എല്ലാ പ്രധാന അപ്ഡേറ്റുകളും അറിയാൻ Asianet News Malayalam