തെലുങ്ക് ഒടിടി പ്ലാറ്റ്ഫോം ആയ അഹ വീഡിയോയിലൂടെ ഈ മാസം 18ന് സിരീസ് പ്രീമിയര്‍ ചെയ്യും
'ബാഷ'യും 'അണ്ണാമലൈ'യും മലയാളത്തില്‍ മോഹന്‍ലാല്‍ നായകനായ 'ദി പ്രിന്‍സ്' ഉള്‍പ്പെടെയുള്ള ചിത്രങ്ങള്‍ സംവിധാനം ചെയ്‍ത സുരേഷ് കൃഷ്‍ണ നിര്‍മ്മാതാവാകുന്നു. എന്നാല്‍ സിനിമയല്ല, ഒരു ക്രൈം വെബ് സിരീസ് ആണ് അദ്ദേഹം നിര്‍മ്മിക്കുന്നത്. അതും തെലുങ്കില്‍. 'ഇന്‍ ദി നെയിം ഓഫ് ഗോഡ്' എന്നു പേരിട്ടിരിക്കുന്ന ലിമിറ്റഡ് സിരീസിന് ഏഴ് എപ്പിസോഡുകള്‍ മാത്രമാണ് ഉള്ളത്.
പ്രിയദര്‍ശി, നന്ദിനി റായ്, പൊസാനി കൃഷ്‍ണ മുരളി എന്നിവര്‍ പ്രധാന വേഷങ്ങളിലെത്തുന്ന സിരീസിന്‍റെ ട്രെയ്‍ലര്‍ പുറത്തെത്തി. സംവിധായകന്‍ രംഗ യാലി ഷോ റണ്ണര്‍ ആവുന്ന സിരീസിന്‍റെ രചനയും സംവിധാനവും വിദ്യാസാഗര്‍ മുത്തുകുമാര്‍ ആണ്. വരുണ്‍ ഡി കെ ആണ് ഛായാഗ്രഹണം. രാജാമുണ്ഡ്രി, മരേഡുമില്ലി, ഹൈദരാബാദ് എന്നിവിടങ്ങളിലായിരുന്നു ചിത്രീകരണം. തെലുങ്ക് ഒടിടി പ്ലാറ്റ്ഫോം ആയ അഹ വീഡിയോയിലൂടെ ഈ മാസം 18ന് സിരീസ് പ്രീമിയര്‍ ചെയ്യും. പ്രമുഖ തെലുങ്ക് നിര്‍മ്മാതാക്കളായ ഗീത ആര്‍ട്‍സിന്‍റെ സംരംഭമാണ് അഹ വീഡിയോ. നിരവധി മലയാളചിത്രങ്ങളുടെ തെലുങ്ക് മൊഴിമാറ്റ പതിപ്പുകള്‍ അഹ വീഡിയോയിലൂടെ പ്രേക്ഷകരിലേക്ക് എത്തിയിരുന്നു.
കൊവിഡ് മഹാമാരിയുടെ രണ്ടാംവരവിന്‍റെ ഈ കാലത്ത്, എല്ലാവരും മാസ്‌ക് ധരിച്ചും സാനിറ്റൈസ് ചെയ്തും സാമൂഹ്യ അകലം പാലിച്ചും വാക്‌സിന്‍ എടുത്തും പ്രതിരോധത്തിന് തയ്യാറാവണമെന്ന് ഏഷ്യാനെറ്റ് ന്യൂസ് അഭ്യര്‍ത്ഥിക്കുന്നു. ഒന്നിച്ചു നിന്നാല്‍ നമുക്കീ മഹാമാരിയെ തോല്‍പ്പിക്കാനാവും. #BreakTheChain #ANCares #IndiaFightsCorona