ചിരിച്ച് ചിരിച്ച് കണ്ണിറുക്കി മോഹൻലാല്, വീഡിയോ കണ്ട് ഒപ്പം ചിരിച്ച് ആരാധകരും
Synopsis
നടൻ മോഹൻലാലടക്കമുള്ള താരങ്ങളുടെ ചിരിയടക്കാനാകാതെയുള്ള വീഡിയോയാണ് ആരാധകര് ഏറ്റെടുത്തിരിക്കുന്നത്.
മലയാളികള്ക്ക് ഇഷ്ടമുള്ള ചിരിയാണ് മോഹൻലാലിന്റേത്. അപ്പോള് മോഹൻലാല് ചിരിക്കും പ്രാധാന്യമുള്ള ചിത്രത്തില് നായകനായാല് പറയുകയും വേണ്ട. കോമഡിക്ക് പ്രാധാന്യമുള്ള ഫീല് ഗുഡ് ചിത്രമായിരിക്കും മോഹൻലാലിനെ നായകനാക്കി സത്യൻ അന്തിക്കാട് സംവിധാനം ചെയ്യുന്ന ഹൃദയപൂര്വം എന്നാണ് ടീസര് നല്കിയ സൂചന. ഇപ്പോഴിതാ ഹൃദയപൂര്വം സെറ്റിലെ ചിരി മുഹൂര്ത്തങ്ങള് കോര്ത്തിണക്കി ഒരു വീഡിയോ പുറത്തുവിട്ടിരിക്കുന്നു. രസകരമായ നിരവധി നിമിഷങ്ങള് ഈ ചിത്രത്തില് ഉണ്ടാകും എന്നാണ് പുതിയ വീഡിയോയും നല്കുന്ന സൂചന. കണ്ണിറുക്കി ചിരിക്കുന്ന മോഹൻലാലിനെ ഈ വീഡിയോയില് കാണാം. സംഗീത് പ്രതാപ് അടക്കമുള്ള താരങ്ങളും വീഡിയോയില് ഉണ്ട്.
ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിക്കുന്ന ചിത്രത്തില് മാളവിക മോഹനനും ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്. ഇടവേളയ്ക്ക് ശേഷമാണ് ഒരു സത്യന് അന്തിക്കാട് സിനിമയുടെ ചിത്രീകരണം കേരളത്തിന് പുറത്ത് നടക്കുന്നത്. ബന്ധങ്ങളുടെ മാറ്റുരയ്ക്കുന്ന വളരെ പ്ലസന്റ് ആയ ഒരു ചിത്രമായിരിക്കും ഇതെന്ന് സംവിധായകൻ സത്യൻ അന്തിക്കാട് പറഞ്ഞിരുന്നു. സിദ്ദിഖ്, ബാബുരാജ്, സബിതാ ആനന്ദ് എന്നിവരും ഈ ചിത്രത്തിലെ പ്രധാന താരങ്ങളാണ്. സത്യൻ അന്തിക്കാട് എന്ന സംവിധായകൻ്റെ ട്രേഡ്മാർക്ക് എന്നു വിശേഷിപ്പിക്കാവുന്ന നർമ്മവും ഒപ്പം ഇമോഷനുമൊക്കെ ഈ ചിത്രത്തിലൂടെയും പ്രതീക്ഷിക്കാം. അഖിൽ സത്യന്റേതാണു കഥ. ടി പി സോനു എന്ന നവാഗതൻ തിരക്കഥ ഒരുക്കുന്നു. അനൂപ് സത്യനാണ് ചിത്രത്തിൻ്റെ പ്രധാന സംവിധാന സഹായി. ഗാനങ്ങൾ മനു മഞ്ജിത്ത്, സംഗീതം ജസ്റ്റിൻ പ്രഭാകർ. അനു മൂത്തേടത്ത് ഛായാഗ്രഹണവും കെ രാജഗോപാൽ എഡിറ്റിംഗും നിർവ്വഹിക്കുന്നു. കലാസംവിധാനം പ്രശാന്ത് നാരായണൻ, മേക്കപ്പ് പാണ്ഡ്യൻ, കോസ്റ്റ്യൂം ഡിസൈൻ സമീറ സനീഷ്, സഹ സംവിധാനം ആരോൺ മാത്യു, രാജീവ് രാജേന്ദ്രൻ, വന്ദന സൂര്യ, ശ്രീഹരി, പ്രൊഡക്ഷൻ മാനേജർ ആദർശ്, പ്രൊഡക്ഷൻ എക്സിക്യൂട്ടീവ് ശ്രീക്കുട്ടൻ, പ്രൊഡക്ഷൻ കൺട്രോളർ ബിജു തോമസ്, ഫോട്ടോ അമൽ സി സദർ.
എന്നും എപ്പോഴും എന്ന സിനിമയാണ് ഒടുവില് മോഹൻലാലിനെ നായക വേഷത്തില് എത്തിച്ച് സത്യൻ അന്തിക്കാട് സംവിധാനം ചെയ്തത്. സംവിധായകൻ സത്യൻ അന്തിക്കാടിന്റെ മോഹൻലാല് ചിത്രത്തില് മഞ്ജു വാര്യരായിരുന്നു നായികയായി എത്തിയത്. ഇന്നസെന്റും ഒരു പ്രധാന വേഷത്തില് ചിത്രത്തില് എത്തിയിരുന്നു. തിരക്കഥ രഞ്ജൻ പ്രമോദായിരുന്നു എഴുതിയിരുന്നത്.
ഏഷ്യാനെറ്റ് ന്യൂസ് ലൈവ് കാണാന് ഇവിടെ ക്ലിക് ചെയ്യുക