ഇര്ഷാദിനൊപ്പം പുതുമുഖ നായികമാര്; ഒമര് ലുലുവിന്റെ 'നല്ല സമയം' ടീസര്
Synopsis
ഒറ്റ രാത്രിയിൽ നടക്കുന്ന സംഭവങ്ങള് ദൃശ്യവല്ക്കരിക്കുന്ന ചിത്രം
ഒമര് ലുലു സംവിധാനം ചെയ്യുന്ന ഏറ്റവും പുതിയ ചിത്രം നല്ല സമയത്തിന്റെ ടീസര് പുറത്തെത്തി. ഫണ് ത്രില്ലര് ഗണത്തില് പെടുന്ന ചിത്രം സ്റ്റോണര് വിഭാഗത്തില് പെടുന്ന ചിത്രം കൂടിയാണ്. ഇര്ഷാദ് അലി നായകനാവുന്ന ചിത്രത്തില് നാല് പുതുമുഖ നായികമാരാണ് എത്തുന്നത്. നീന മധു, നോറ ജോണ്, നന്ദന സഹദേവന്, ഗായത്രി ശങ്കര് എന്നിവരാണ് നായികാ കഥാപാത്രങ്ങളെ അവതരിപ്പിച്ചിരിക്കുന്നത്. 50 സെക്കന്ഡ് ദൈര്ഘ്യമുള്ള ടീസര് ആണ് പുറത്തെത്തിയിരിക്കുന്നത്.
ഒറ്റ രാത്രിയിൽ നടക്കുന്ന സംഭവങ്ങള് ദൃശ്യവല്ക്കരിക്കുന്ന ചിത്രമാണിത്. ഛായാഗ്രഹണം സിനു സിദ്ധാർഥ് ആണ് നിർവ്വഹിച്ചിരിക്കുന്നത്. ഒമർ ലുലുവിന്റെ അഞ്ചാമത്തെ ചിത്രമാണിത്. ഒമര് ലുലുവും ചിത്ര എസും ചേര്ന്ന് രചന നിര്വ്വഹിച്ചിരിക്കുന്ന ചിത്രം എഡിറ്റ് ചെയ്തിരിക്കുന്നത് രതിന് രാധാകൃഷ്ണന് ആണ്. ചീഫ് അസോസിയേറ്റ് ഡയറക്ടര് സ്വപ്നേഷ് കെ നായര്, സോംഗ് കട്ട് ഹേമന്ദ് കുമാര്, കാസ്റ്റിംഗ് ഡയറക്ടര് വൈശാഖ് പി വി, സെക്കന്റ് ക്യാമറ അജ്മല് ലത്തീഫ്. കെജിസി സിനിമാസിന്റെ ബാനറിൽ നവാഗതനായ കലന്തൂർ ആണ് നിര്മ്മാണം. നവംബര് 25 ന് തിയറ്ററുകളില് എത്തുന്ന ചിത്രത്തിന് എ സര്ട്ടിഫിക്കറ്റ് ആണ് ലഭിച്ചിരിക്കുന്നത്.
ALSO READ : വിസ്മയ വിജയമായി 'ദൃശ്യം 2'; ഈ വര്ഷത്തെ സൂപ്പര്ഹിറ്റുകളില് മൂന്നാം സ്ഥാനത്ത്
ബാബു ആന്റണി നായകനാവുന്ന പവര് സ്റ്റാറും ഒമറിന്റേതായി പുറത്തെത്താനുള്ള ചിത്രമാണ്. ആക്ഷന് ഹീറോ ആയി ബാബു ആന്റണിയുടെ തിരിച്ചുവരവ് എന്ന നിലയില് പ്രഖ്യാപന സമയം മുതല് പ്രേക്ഷകശ്രദ്ധയിലുള്ള ചിത്രമാണിത്. പ്രശസ്ത തിരക്കഥാകൃത്ത് ഡെന്നിസ് ജോസഫിന്റെ അവസാന തിരക്കഥ കൂടിയാണിത്. ഡ്രഗ് മാഫിയയുടെ പശ്ചാത്തലത്തിൽ കഥ പറയുന്ന ചിത്രമാണിത്. നായികയും പ്രണയവും കോമഡി രംഗങ്ങളും ഇല്ലാതെ ആക്ഷന് മാത്രം പ്രാധാന്യം നൽകി ചെറിയ പിരീഡിൽ നടക്കുന്ന കഥ പറയുന്ന ചിത്രമായിരിക്കും പവർസ്റ്റാർ എന്ന് ഒമർ ലുലു പറഞ്ഞിരുന്നു.