താര സമ്പന്നമായ ത്രില്ലര്: കുബേര ട്രാന്സ്, ധനുഷ് ചിത്രത്തിന്റെ ടീസര് പുറത്ത്
Synopsis
ധനുഷ്, നാഗാർജുന, രശ്മിക മന്ദാന എന്നിവർ പ്രധാന വേഷങ്ങളിൽ എത്തുന്ന കുബേര എന്ന ത്രില്ലർ ചിത്രത്തിന്റെ ടീസർ പുറത്തിറങ്ങി.
ചെന്നൈ: തമിഴ് സൂപ്പര്താരം ധനുഷിന്റെ വരാനിരിക്കുന്ന തെലുങ്ക് ചിത്രം കുബേരയുടെ ടീസര് പുറത്തിറങ്ങി. ശേഖർ കമ്മുല സംവിധാനം ചെയ്യുന്ന ചിത്രം താരനിബിഢമാണ്. അതിന് അനുസരിച്ച രീതിയില് തന്നെ ഗംഭീരമാണ് ട്രാന്സ് ഓഫ് കുബേര എന്ന പേരില് പുറത്തിറക്കിയിരിക്കുന്ന ടീസര്.
ധനുഷ്, നാഗാർജുന, രശ്മിക മന്ദാന എന്നിവർ പ്രധാന വേഷങ്ങളിൽ എത്തുന്ന ചിത്രം ഒരു ത്രില്ലറാണ് എന്ന് വ്യക്തമാക്കുന്നതാണ് ടീസര്. പാൻ ഇന്ത്യ ചിത്രമായി ഒരുക്കുന്ന കുബേര മുംബൈ പാശ്ചത്തലമാക്കിയുള്ള ഒരു കഥയാണ്. ചിത്രം ജൂൺ 20ന് തിയറ്ററുകളിൽ എത്തും.
ശ്രീ വെങ്കിടേശ്വര സിനിമാസ് എൽഎൽപി, അമിഗോസ് ക്രിയേഷൻസ് പ്രൈവറ്റ് ലിമിറ്റഡ് എന്നീ ബാനറുകളിൽ സുനിൽ നാരംഗ്, പുസ്കൂർ റാം മോഹൻ റാവു എന്നിവർ ചേർന്നാണ് കുബേര നിർമ്മിക്കുന്നത്. ബഹുഭാഷാ ചിത്രമായി ഒരുങ്ങുന്ന കുബേര തമിഴ്, തെലുങ്ക്, ഹിന്ദി ഭാഷകളിൽ ഒരേ സമയം ചിത്രീകരിക്കുകയാണ്. ദേവി ശ്രീ പ്രസാദാണ് ചിത്രത്തിന്റെ സംഗീതം നിര്വഹിക്കുന്നത്.
മാര്ച്ചില് ധനുഷിന്റെ ചിത്രത്തിലെ ഫസ്റ്റ്ലുക്ക് പുറത്തുവിട്ടിരുന്നു. ഒരു പാവപ്പെട്ടവനായാണ് ധനുഷിനെ കാണിച്ചിരിക്കുന്നത്. പിന്നലെ നാഗാര്ജ്ജുനയുടെയും രശ്മികയുടെയും ഫസ്റ്റ്ലുക്ക് പുറത്തുവിട്ടു. ചിത്രം പണം അടിസ്ഥാനമാക്കിയ ഒരു ത്രില്ലറാണ് എന്നാണ് വിവരം. ഒരു പെട്ടി കുഴിച്ചെടുക്കുന്ന രശ്മികയുടെ ഫസ്റ്റ്ലുക്ക് ഏറെ ശ്രദ്ധനേടിയിരുന്നു.
അതേ സമയം ബോളിവുഡ് താരം ജിം സര്ഭ് ചിത്രത്തില് പ്രധാന വേഷത്തില് എത്തുന്നുണ്ട് എന്നാണ് ടീസര് ദൃശ്യങ്ങള് നല്കുന്ന സൂചന. അതേ സമയം ചിത്രത്തിന് മികച്ച ഒടിടി ഡീല് നടന്നുവെന്നും വിവരമുണ്ട്. ഡെക്കാൻ ക്രോണിക്കിളിൽ പ്രസിദ്ധീകരിച്ച റിപ്പോര്ട്ട് അനുസരിച്ച് നിർമ്മാതാക്കൾക്ക് ഒടിടി അവകാശങ്ങളിൽ നിന്ന് 50 കോടി രൂപ മുൻകൂർ നല്കി. എന്നാല് ഇത് ഏത് ഒടിടിയാണ് എന്ന് വ്യക്തമാക്കിയിട്ടില്ല.