42 കിലോമീറ്റർ മാരത്തണിലുടനീളം സി​ഗരറ്റ് വലിച്ച് 50 -കാരൻ!

ഇതാദ്യമായിട്ടല്ല അങ്കിൾ ചെൻ ഇങ്ങനെ ഒരു കാര്യം ചെയ്യുന്നത്. 2018 -ൽ, ഗ്വാങ്‌ഷു മാരത്തൺ, 2019 -ലെ സിയാമെൻ മാരത്തൺ എന്നിവയിൽ ഓടുമ്പോൾ അദ്ദേഹം നിരവധി സിഗരറ്റുകൾ കത്തിക്കുകയും വലിക്കുകയും ചെയ്തിരുന്നു.

സി​ഗരറ്റ് വലി ആ​രോ​ഗ്യത്തിന് ഹാനികരമാണ് എന്ന് എല്ലാവർക്കും അറിയാം. എന്നാൽ, അതേ സമയം നാം ഓടുന്നത് ആരോ​ഗ്യ സംരക്ഷണത്തിന് വേണ്ടിയും. എന്നാൽ, സി​ഗരറ്റ് വലിച്ചുകൊണ്ട് കിലോമീറ്ററ് കണക്കിന് ഓടുന്ന ആളെ കുറിച്ച് സങ്കൽപ്പിക്കാൻ സാധിക്കുമോ? അങ്ങനെ ഒരാൾ ഓടി. ഇവിടെയൊന്നും അല്ല, അങ്ങ് ചൈനയിൽ. 

ചൈനയിൽ ഒരു 50 വയസുകാരനാണ് സി​ഗരറ്റ് വലിച്ചുകൊണ്ട് 42 കിലോമീറ്റർ മാരത്തൺ ഓടിയത്. 'അങ്കിൾ ചെൻ' എന്നാണ് ഈ ചൈനീസ് ഓട്ടക്കാരൻ അറിയപ്പെടുന്നത്. ചൈനയിലെ ജിയാൻഡെയിൽ സിനാൻജിയാങ് മാരത്തണിലുടനീളമാണ് അങ്കിൾ ചെൻ സി​ഗരറ്റ് വലിച്ചത്. ആ ദൃശ്യങ്ങൾ പിന്നീട് വൈറലായി. 

അമ്പതുകാരനായ ചെന്നിന്റെ ചിത്രങ്ങൾ അനേകം പേരാണ് സോഷ്യൽ മീഡിയകളിൽ പോസ്റ്റ് ചെയ്തിരിക്കുന്നത്. അവസാനം ഫിനിഷിം​ഗ് സർട്ടിഫിക്കറ്റും അങ്കിൾ ചെന്നിന് കിട്ടി. ഗ്വാങ്‌ഷൂവിൽ നിന്നുമുള്ള ചെൻ 3:28 എന്ന സ്‌കോറിലാണ് ഫിനിഷിംഗ് ലൈൻ കടന്നത്. ഈ ഓട്ടത്തിലുടനീളം ചെൻ സിഗരറ്റ് കത്തിക്കുകയും വലിക്കുകയും ചെയ്‌തിരുന്നു. പക്ഷേ, എന്നിട്ടും മാരത്തണിൽ പങ്കെടുത്ത 1500 ഓളം ഓട്ടക്കാരിൽ മൊത്തത്തിൽ 574 -ാം സ്ഥാനത്ത് ചെൻ എത്തി. 

ഇതാദ്യമായിട്ടല്ല അങ്കിൾ ചെൻ ഇങ്ങനെ ഒരു കാര്യം ചെയ്യുന്നത്. 2018 -ൽ, ഗ്വാങ്‌ഷു മാരത്തൺ, 2019 -ലെ സിയാമെൻ മാരത്തൺ എന്നിവയിൽ ഓടുമ്പോൾ അദ്ദേഹം നിരവധി സിഗരറ്റുകൾ കത്തിക്കുകയും വലിക്കുകയും ചെയ്തിരുന്നു. ആ ദൃശ്യങ്ങളും പുറത്ത് വന്നിരുന്നു. ഇങ്ങനെ മാരത്തണുകൾക്കിടയിൽ സി​ഗരറ്റ് വലിക്കുന്നത് കൊണ്ട് തന്നെ സ്മോക്കിം​ഗ് ബ്രദർ എന്നൊരു നിക്ക്നെയിം കൂടി ചെന്നിനുണ്ട്. 

ഏതായാലും ചൈനയിൽ മാരത്തണിനിടയിൽ സി​ഗരറ്റ് വലിക്കുന്നതിന് വിലക്കൊന്നും ഇല്ല. സാമൂഹിക മാധ്യമങ്ങളിൽ സമ്മിശ്ര പ്രതികരണമാണ് ചെന്നിന്റെ വീഡിയോയ്ക്കും ചിത്രങ്ങൾക്കും ലഭിക്കുന്നത്. ചിലർ അദ്ദേഹം ഹീറോ ആണ് എന്നാണ് പറയുന്നത്. എന്നാൽ, മറ്റ് ചിലർ ഇതത്ര ആരോ​ഗ്യകരമായ കാര്യമല്ല എന്ന് വിലയിരുത്തി. 

(ആദ്യചിത്രം പ്രതീകാത്മകം)