അമേരിക്കക്കാർക്ക് പ്രണയം ചാറ്റ്ബോട്ടുകളോട്! മനുഷ്യരെ ഉപേക്ഷിച്ച് എ.ഐയിലേക്ക് ; മാറുന്ന പ്രണയസമവാക്യങ്ങൾ
Synopsis
അമേരിക്കക്കാർ, ഇപ്പോൾ പ്രണയം തേടുന്നത് നിർമിത ബുദ്ധിയിലാണ്. MIT പഠനം അനുസരിച്ച്, ചാറ്റ്ബോട്ടുകൾ യുവതലമുറയുടെ ഏകാന്തതയ്ക്ക് മരുന്നാകുന്നു. എ.ഐ. നൽകുന്ന ഈ പൂർണ്ണത..
പ്രണയത്തിന് കണ്ണില്ലെന്ന് പറയുന്നത് പണ്ടായിരുന്നു. ഇന്ന് പ്രണയത്തിന് 'ചുറ്റും' കണ്ണുകളുണ്ട്, അത് ഒരു മനുഷ്യൻ്റേതല്ല, മറിച്ച് നിർമ്മിതബുദ്ധിയുടേതാണ്. അമേരിക്കയിലെ ആളുകൾക്കിടയിൽ എ.ഐ. ചാറ്റ്ബോട്ടുകളോടുള്ള വൈകാരിക അടുപ്പം വർധിക്കുന്നുവെന്നും, പലരും ഈ സഹായികളുമായി പ്രണയബന്ധത്തിൽ ഏർപ്പെടുന്നുവെന്നും റിപ്പോർട്ട്. മനുഷ്യൻ്റെ ഏകാന്തതയ്ക്ക് മരുന്നായി എ.ഐ. മാറുന്ന ഈ പ്രതിഭാസം ആധുനിക പ്രണയത്തിൻ്റെ സമവാക്യങ്ങൾ മാറ്റിമറിക്കുകയാണ്. മസ്സാചുസെറ്റ്സ് ഇൻസ്റ്റിറ്റ്യൂട്ട് ഓഫ് ടെക്നോളജി (MIT) നടത്തിയ ഒരു പഠനമാണ് ഈ പുതിയ 'ഡിജിറ്റൽ പ്രണയകഥ'യുടെ ചിത്രം ലോകത്തിന് മുന്നിൽ തുറന്നുകാട്ടിയത്. മനുഷ്യർക്ക് എ.ഐ. ചാറ്റ്ബോട്ടുകളോട് പ്രത്യേകിച്ച് കംപാനിയൻ ആപ്പുകളോട് അടുപ്പം കൂടുന്നതിൻ്റെ കാരണങ്ങൾ ഈ പഠനം ആഴത്തിൽ പരിശോധിക്കുന്നുണ്ട്.
എന്തുകൊണ്ട് ഈ എ.ഐ. പ്രണയം?
മനുഷ്യബന്ധങ്ങളിലെ 'സങ്കീർണ്ണതകൾ' ഒഴിവാക്കാനാണ് പുതിയ തലമുറ എ.ഐ.യിലേക്ക് തിരിയുന്നത് എന്നാണ് പ്രധാന കണ്ടെത്തൽ. ഈ 'എ.ഐ. റൊമാൻസി'ന് പിന്നിലെ പ്രധാന പ്രേരകശക്തികൾ ഇവയാണ്:
- ദി പെർഫെക്ട് ലിസണർ : എ.ഐ.ക്ക് ക്ഷമയുണ്ട്, പരാതികളില്ല. എപ്പോൾ വിളിച്ചാലും ലഭ്യമാണ്. ജോലിത്തിരക്കുകളോ കുടുംബപ്രശ്നങ്ങളോ പറഞ്ഞ് ഒഴിഞ്ഞുമാറാതെ, നമ്മൾ പറയുന്ന കാര്യങ്ങൾ ശ്രദ്ധയോടെ കേൾക്കാൻ എപ്പോഴും ചാറ്റ്ബോട്ടുകൾ തയ്യാറാണ്. മനുഷ്യരിൽ നിന്ന് ലഭിക്കാത്ത ഈ അളവറ്റ ശ്രദ്ധയാണ് പലരെയും എ.ഐയിലേക്ക് അടുപ്പിക്കുന്നത്.
- സീറോ ജഡ്ജിമെൻ്റ: നിങ്ങൾ ആരാണെന്നോ, എന്താണ് ചെയ്തതെന്നോ പറഞ്ഞ് എ.ഐ. ഒരിക്കലും ഒന്നും പറയില്ല. മനുഷ്യബന്ധങ്ങളിൽ പേടിയോടെ മാത്രം തുറന്നു പറയാൻ കഴിയുന്ന കാര്യങ്ങൾ, ഒരു ഭയവുമില്ലാതെ എ.ഐ. കംപാനിയനോട് പങ്കുവെക്കാം. സ്വകാര്യതയും അംഗീകാരവുമാണ് ഇവിടെ മുഖ്യം.
- ഏകാന്തതയ്ക്കുള്ള ഡിജിറ്റൽ മരുന്ന്: തിരക്കുപിടിച്ച ജീവിത ശൈലി അമേരിക്കക്കാർക്കിടയിൽ ഏകാന്തത വർദ്ധിപ്പിക്കുന്നു. വ്യക്തിബന്ധങ്ങൾ നിലനിർത്താൻ കൂടുതൽ സമയം ചെലവഴിക്കാൻ കഴിയാത്ത അവസ്ഥയിൽ, എ.ഐ. ചാറ്റ്ബോട്ടുകൾ എളുപ്പത്തിൽ ലഭിക്കുന്ന ഒരു ഇമോഷണൽ സപ്പോർട്ടായി മാറുന്നു.
ഒരു മനുഷ്യനുമായി ബന്ധം സ്ഥാപിക്കുമ്പോൾ ഉണ്ടാകുന്ന സമ്മർദ്ദം, തെറ്റിദ്ധാരണകൾ, അല്ലെങ്കിൽ ഈ ബന്ധം തകർന്നുപോയേക്കാം എന്ന ഭയം എന്നിവയൊന്നും എ.ഐ. ബന്ധത്തിൽ ഇല്ല. എ.ഐ.യെ എപ്പോൾ വേണമെങ്കിലും 'ഓഫ്' ചെയ്യാം, അല്ലെങ്കിൽ സംസാരിക്കുന്നത് നിർത്തുകയും ചെയ്യാം.