വ്യാജ​ഗർഭം, മരിച്ച ഭർത്താവ്; ട്രാഫിക് ഫൈൻ കിട്ടാതിരിക്കാൻ ചെയ്യുന്ന 'തട്ടിപ്പുകൾ', വെളിപ്പെടുത്തലുമായി യുവതി

കാറിൽ ഒരു ചിതാഭസ്മം പോലെ തോന്നിക്കുന്ന എന്തെങ്കിലും സൂക്ഷിക്കുക, ട്രാഫിക് പൊലീസ് ചോദിക്കുമ്പോൾ അടുത്തിടെയാണ് ഭർത്താവ് മരണപ്പെട്ടത് എന്ന് പറയുക.

ട്രാഫിക് നിയമങ്ങൾ ലംഘിച്ചാൽ അതിനുള്ള പിഴയും നാം ഒടുക്കേണ്ടി വരും. എന്നാൽ, യുഎസ്സിൽ നിന്നുള്ള ഒരു ഇൻഫ്ലുവൻസർ ട്രാഫിക് ഫൈനുകൾ ഒഴിവാക്കാൻ താൻ സ്വീകരിക്കുന്ന ടിപ്പുകൾ പരസ്യമായി സോഷ്യൽ മീഡിയയിൽ പോസ്റ്റ് ചെയ്തു. അതിന്റെ പേരിൽ നല്ല പരിഹാസവും യുവതി ഏറ്റുവാങ്ങുന്നുണ്ട്.

യുഎസ്സിൽ നിന്നുള്ള ഐവി ബ്ലൂം എന്ന ഇൻഫ്ലുവൻസറാണ് എങ്ങനെയാണ് താൻ ട്രാഫിക് ടിക്കറ്റിൽ നിന്നും രക്ഷപ്പെടാറുള്ളത് എന്നതിനെ കുറിച്ച് സോഷ്യൽ മീഡിയയിൽ വീഡിയോ ഷെയർ ചെയ്തിരിക്കുന്നത്. ​ഗർഭിണിയാണെന്ന് അഭിനയിക്കുക, ഭർത്താവ് മരിച്ചുവെന്ന് കള്ളം പറയുക തുടങ്ങിയ കാര്യങ്ങളാണ് താൻ ചെയ്യാറുള്ളത്. അത് പലപ്പോഴും തന്നെ സഹായിച്ചിട്ടുണ്ട് എന്നാണ് യുവതി പറയുന്നത്. 

താൻ സ്വീകരിക്കുന്ന മാർ​ഗങ്ങൾ കേൾക്കുമ്പോൾ മറ്റുള്ളവർ എന്നെ നോക്കി ചിരിച്ചേക്കാം. എന്നാൽ, സത്യമെന്താണെന്നാൽ ഇതെപ്പോഴും തന്നെ രക്ഷിക്കാറുണ്ട്. തനിക്ക് ഇപ്പോൾ ട്രാഫിക് ടിക്കറ്റുകൾ അടക്കാനുള്ള നിർവാഹമില്ല. അതിനാൽ, മറ്റ് മാർ​ഗങ്ങളില്ലാത്തതിനാൽ ഒറ്റ ട്രാഫിക് ടിക്കറ്റ് പോലും കിട്ടാതിരിക്കാൻ വേണ്ടതെല്ലാം താൻ ചെയ്യുന്നു എന്നാണ് അവൾ പറയുന്നത്. 

കാറിൽ ഒരു ചിതാഭസ്മം പോലെ തോന്നിക്കുന്ന എന്തെങ്കിലും സൂക്ഷിക്കുക, ട്രാഫിക് പൊലീസ് ചോദിക്കുമ്പോൾ അടുത്തിടെയാണ് ഭർത്താവ് മരണപ്പെട്ടത് എന്ന് പറയുക. എപ്പോഴും ഒരു വ്യാജ വയർ വച്ചുകൊണ്ട് ഡ്രൈവ് ചെയ്യുക, പൊലീസ് കാണുമ്പോൾ ​ഗർഭിണിയാണ് എന്ന് തോന്നണം. അതുപോലെ എപ്പോഴും സങ്കടം തോന്നുന്ന മിഴികളോടെ വേണം പൊലീസിനെ നോക്കാൻ. ഇനി ഇതൊന്നും കൊണ്ടും പ്രയോജനമുണ്ടായില്ലെങ്കിൽ ഞാൻ പ്രസവവേദന വന്നത് പോലെ നിലവിളിക്കുമെന്നും അത് തന്നെ സഹായിക്കാറുണ്ട് എന്നുമാണ് യുവതി പറയുന്നത്. 

അതും പോരാഞ്ഞ് നിയമ സംവിധാനവുമായി ബന്ധപ്പെട്ട അനേകം സ്റ്റിക്കറുകൾ വണ്ടിയിൽ ഒട്ടിക്കുക. പൊലീസ് പിടിക്കുമ്പോൾ തന്റെ കുടുംബത്തിലും പൊലീസുകാർ ഉണ്ട് എന്ന് പറയുക എന്ന മാർ​ഗവും യുവതി സ്വീകരിക്കുന്നുണ്ടത്രെ. 

എന്തായാലും, യുവതിയുടെ പോസ്റ്റ് പെട്ടെന്നാണ് ശ്രദ്ധിക്കപ്പെട്ടത്. യുവതിയെ പരിഹസിച്ചുകൊണ്ട് ഒരുപാട് പേരാണ് കമന്റ് നൽകിയത്. ശ്രദ്ധിച്ച് വാഹനമോടിക്കാൻ ശ്രമിച്ചൂടെ എന്ന് ചോദിച്ചവരും ഒരുപാടുണ്ട്. 

ഏഷ്യാനെറ്റ് ന്യൂസ് ലൈവ് കാണാം