ലോട്ടറിയടിച്ചു, മരണം വരെ മാസത്തിൽ മൂന്നുലക്ഷത്തിലധികം രൂപ അക്കൗണ്ടിൽ വരും!

'അതേ, എനിക്ക് സമ്മാനം കിട്ടിയിരിക്കുന്നു, ഞാൻ സമ്മാനം നേടിയിരിക്കുന്നു. രണ്ടോ മൂന്നോ വർഷത്തിനുള്ളിൽ എനിക്ക് ജോലിയിൽ നിന്നും വിരമിക്കാൻ സാധിക്കും' എന്നായിരുന്നു ഭാ​ഗ്യവാർത്തയോട് റീഡലിന്റെ പ്രതികരണം.

ലോട്ടറി അടിക്കണേ എന്ന് ആ​ഗ്രഹിക്കാത്ത മനുഷ്യരുണ്ടാവില്ല. ലോട്ടറിയടിക്കുന്നതിനെ മഹാഭാ​ഗ്യമായിട്ടാണ് ആളുകൾ കണുന്നത്. കാരണം പ്രത്യേകിച്ച് അധ്വാനം ഒന്നുമില്ലാതെ തന്നെ കുറച്ച് പണം മുടക്കി വലിയ തുകകൾ കിട്ടുന്നത് ആരെയാണ് സന്തോഷിപ്പിക്കാത്തത്. എന്നാൽ, ലോട്ടറിയടിച്ചാൽ ഒരു തുക കയ്യിൽ കിട്ടും. അല്ലാതെ എപ്പോഴും എപ്പോഴും ആ തുക കിട്ടില്ല അല്ലേ? കോടികൾ ലോട്ടറിയടിച്ചിട്ടും ഒന്നുമില്ലാതെ പാപ്പരായിപ്പോയ ആളുകളുടെ കഥകൾ നാം കേട്ടിട്ടുണ്ട്. എന്നാൽ, ഇവിടെ ഒരാൾക്ക് ലോട്ടറിയടിച്ചു. അതിന്റെ ഭാ​ഗമായി എല്ലാ മാസവും വലിയ ഒരു തുക ആളുടെ അക്കൗണ്ടിലേക്ക് വരും. സം​ഗതി സത്യമാണ്. 

റോബിൻ റീഡൽ എന്നയാൾക്കാണ് ലോട്ടറിയടിച്ചതിലൂടെ ഈ ഭാ​ഗ്യം വന്നിരിക്കുന്നത്. $1,000 (82,200 ഇന്ത്യൻ രൂപ) എല്ലാ ആഴ്ചയും ആളുടെ അക്കൗണ്ടിലേക്ക് വരുമത്രെ. അതായത് ഓരോ മാസവും മൂന്ന് ലക്ഷത്തിലധികം തുക ഇയാൾക്ക് കിട്ടും. 14 വർഷത്തിലേറെയായി ഒറിഗോൺ ലോട്ടറി ഗെയിം കളിക്കുന്ന ആളാണ് റീഡൽ. ശേഷം മെയ് 8 -നാണ് ഭാ​ഗ്യം റീഡലിനെ തുണച്ചത്. UNILAD -ന്റെ റിപ്പോർട്ട് അനുസരിച്ച്, വിൻ ഫോർ ലൈഫ് ഗെയിമിൽ അദ്ദേഹം ജാക്ക്പോട്ട് നേടി. അങ്ങനെയാണ് ഓരോ ആഴ്ചയും ഈ തുക കിട്ടുന്നത്. 

'അതേ, എനിക്ക് സമ്മാനം കിട്ടിയിരിക്കുന്നു, ഞാൻ സമ്മാനം നേടിയിരിക്കുന്നു. രണ്ടോ മൂന്നോ വർഷത്തിനുള്ളിൽ എനിക്ക് ജോലിയിൽ നിന്നും വിരമിക്കാൻ സാധിക്കും' എന്നായിരുന്നു ഭാ​ഗ്യവാർത്തയോട് റീഡലിന്റെ പ്രതികരണം. ട്രക്ക് ഡ്രൈവറായി ജോലി ചെയ്യുന്ന റീഡൽ രണ്ട് മൂന്ന് വർഷത്തിൽ വിരമിക്കാനും ലോട്ടറിയിൽ നിന്നും കിട്ടുന്ന തുക ഉപയോ​ഗിച്ച് പുതിയൊരു ജീവിതം നയിക്കാനുമാണ് പ്ലാൻ ചെയ്യുന്നത്. ബില്ലുകൾ അടയ്ക്കാനും വീട് പുതുക്കിപ്പണിയാനും റീഡൽ ഈ പണം ഉപയോ​ഗിക്കും. ഒപ്പം തന്റെ വിവാഹ വാർഷികം ആഘോഷിക്കാൻ സെന്റ് ലൂസിയയിലേക്ക് പോകാനും അവിടെ അവധിക്കാലം ആഘോഷിക്കാനും കൂടി റീഡൽ പ്ലാൻ ചെയ്യുന്നുണ്ട്.