ഇനി തർക്കം വേണ്ട, കോഴിയ്ക്കും മുട്ടയ്ക്കും മുമ്പ് മെഗാപോഡിയസ് റോക്കുസി! കോഴികളുമായി ബന്ധമുള്ള ഭീമൻ ചരിത്രാതീത പക്ഷിയുടെ ഫോസിൽ കണ്ടെത്തി

ഇന്തോനേഷ്യയിലെ ഗുഹയിൽ നിന്ന് കണ്ടെത്തിയ ഫോസിൽ വഴി കോഴികളുമായി ബന്ധമുള്ള ഭീമാകാരമായ ചരിത്രാതീത പക്ഷിയെ ഗവേഷകർ തിരിച്ചറിഞ്ഞു. ഏകദേശം 3.9 കിലോ ഭാരമുള്ള ഈ പക്ഷി, മെഗാപോഡിയസ് റോക്കുസി എന്ന പേരിൽ അറിയപ്പെടുന്നു. ഈ പക്ഷി നിലവിൽ ഉള്ള മറ്റ് മെഗാപോഡുകളേക്കാൾ വലിപ്പമുള്ളതാണ്.

ഇന്തോനേഷ്യയിലെ ഗുഹയിൽനിന്ന് കണ്ടെത്തിയ ഫോസിൽ, കോഴികളുമായി ബന്ധമുള്ള ഭീമാകാരമായ ചരിത്രാതീത പക്ഷിയുടെ പുതിയൊരു സ്പീഷീസിനെ തിരിച്ചറിയാൻ ഗവേഷകരെ സഹായിച്ചെന്ന് റിപ്പോർട്ട്. ഏകദേശം 3.9 കിലോഗ്രാം ഭാരമുണ്ടായിരുന്ന ഈ പക്ഷിക്ക് ഇന്ന് ജീവിച്ചിരിക്കുന്ന ഇതിന്‍റെ അടുത്ത ബന്ധുക്കളെക്കാൾ വലുപ്പവും ഭാരവും കൂടുതലായിരുന്നുവെന്നാണ് ഗവേഷകരുടെ വിലയിരുത്തൽ.

'മെഗാപോഡിയസ് റോക്കുസി' (Megapodius rokusi) എന്നാണ് പുതിയ പക്ഷിവർഗത്തിന് നൽകിയിരിക്കുന്ന പേര്. ഇന്തോനേഷ്യയിലെ ഫ്ലോറസ് ദ്വീപിലുള്ള ലിയാങ് ബുവ ഗുഹയിൽനിന്ന് കണ്ടെത്തിയ കാലെല്ലിന്‍റെ ഫോസിൽ ഭാഗമാണ് ഈ കണ്ടെത്തലിന് ആധാരം. 2009 -ലാണ് ഈ അസ്ഥി കണ്ടെത്തിയതെങ്കിലും, ഇതുവരെ തിരിച്ചറിയപ്പെടാത്ത ഒരു പക്ഷിവർഗത്തിന്‍റെതാണെന്ന് സ്ഥിരീകരിച്ചത് ഇപ്പോഴാണ്. 2026 ഒക്ടോബർ 22 -ന് അൽചെറിംഗ (Alcheringa) എന്ന ശാസ്ത്ര ജേണലിലാണ് ഇതുസംബന്ധിച്ച ഗവേഷണപ്രബന്ധം പ്രസിദ്ധീകരിച്ചത്.

വലുപ്പത്തിൽ ഏറെ മുന്നിൽ

ഏകദേശം 1,90,000 മുതൽ 1,20,000 വർഷം വരെ പഴക്കമുള്ള ഗുഹാനിക്ഷേപങ്ങളിൽ നിന്നാണ് ഫോസിൽ ലഭിച്ചത്. കോഴികളുമായി ബന്ധമുള്ളതും നിലത്ത് ജീവിക്കുന്നതുമായ മെഗാപോഡ് പക്ഷിവിഭാഗത്തിലാണ് ഈ പുതിയ സ്പീഷീസും ഉൾപ്പെടുന്നത്. ശക്തമായ കാലുകളും വലിയ പാദങ്ങളുമാണ് ഈ പക്ഷികളുടെ പ്രധാന സവിശേഷതകൾ.

Contoh lain: Spesies burung megapode purba Megapodius rokusi dari Flores dinamai untuk menghormati Rokus Awe Due, arkeolog senior Indonesia yang wafat tahun 2015. Beliau juga tokoh penting yang terlibat di penelitian-penelitian di Liang Bua https://t.co/FM77z6NTzR

— Davin A. N 🇮🇩 (@nirwasita_arya) November 4, 2026

ഏകദേശം 3.9 കിലോഗ്രാം ഭാരമുണ്ടായിരുന്ന മെഗാപോഡിയസ് റോക്കുസി, ഇന്ന് ഫ്ലോറസ് ദ്വീപിൽ കാണപ്പെടുന്ന ഓറഞ്ച്-ഫൂട്ടഡ് മെഗാപോഡിനെക്കാൾ വളരെ വലുതായിരുന്നു. മെഗാപോഡിയസ് എന്ന ജനുസ്സിൽ ഫ്ലോറസ് ദ്വീപിൽ ഇന്ന് ജീവിച്ചിരിക്കുന്ന ഏക സ്പീഷീസ് കൂടിയാണിത്. മുട്ട വിരിയിക്കുന്ന രീതിയിലും മെഗാപോഡുകൾ മറ്റ് പക്ഷികളിൽനിന്ന് വ്യത്യസ്തരാണ്. മുട്ടകൾക്ക് മുകളിൽ അടയിരുന്ന് ചൂടുനൽകുന്നതിന് പകരം ഇവ മണ്ണിനടിയിൽ കുഴിച്ചിടുകയാണ് ചെയ്യുന്നത്. മണ്ണിൽനിന്നും ചുറ്റുമുള്ള സസ്യാവശിഷ്ടങ്ങളിൽനിന്നും ലഭിക്കുന്ന ചൂടുപയോഗിച്ച് മുട്ടകൾ സ്വയം വിരിയുന്നു.

📣NEW DISCOVERY FROM INDONESIA

Megapodius rokusi, a new species of large extinct megapod bird from the Pleistocene of Flores island (Liang Bua site). At 3.9kg, this bird is the largest know Megapodius species. Congratulation to Hanneke Meijer & colleagues for the publication🌟 https://t.co/BfCER050Le

— Davin A. N 🇮🇩 (@nirwasita_arya) October 24, 2026

ഇന്തോനേഷ്യൻ ഗവേഷകന്‍റെ പേര്

ഇന്തോനേഷ്യൻ ഗവേഷകനായ റോക്കസ് ഡ്യൂ ആവെയുടെ (Rokus Due Awe) പേരാണ് പുതിയ പക്ഷിവർഗത്തിന് നൽകിയിരിക്കുന്നത്. ലിയാങ് ബുവ ഗുഹയിൽനിന്ന് കണ്ടെത്തിയ മൃഗങ്ങളുടെ അവശിഷ്ടങ്ങൾ പഠിക്കുന്നതിൽ അദ്ദേഹം പ്രധാന പങ്കുവഹിച്ചിട്ടുണ്ട്. 'ഹോബിറ്റ്' എന്നറിയപ്പെടുന്ന, ശരീരവലുപ്പം കുറഞ്ഞ പുരാതന മനുഷ്യബന്ധുവായ ഹോമോ ഫ്ലോറസിയൻസിസിന്‍റെ (Homo floresiensis) കണ്ടെത്തലിന് വഴിയൊരുക്കിയ മനുഷ്യ അസ്ഥികളുടെയും പല്ലുകളുടെയും തിരിച്ചറിയലിലും അദ്ദേഹം പങ്കാളിയായിരുന്നു.

എന്നാൽ, ലഭിച്ച ഫോസിൽ അപൂർണമായതിനാൽ ഈ പക്ഷിയെക്കുറിച്ച് ഇനിയും നിരവധി കാര്യങ്ങൾ വ്യക്തമാകാനുണ്ടെന്നും പഠനത്തിൽ പറയുന്നു. കാലെല്ലിന്‍റെ ഒരു ഭാഗം മാത്രമാണ് കണ്ടെത്തിയിട്ടുള്ളത്. അതിനാൽ ഈ പക്ഷിക്ക് പറക്കാൻ കഴിയുമായിരുന്നോയെന്ന കാര്യത്തിൽ ഗവേഷകർക്ക് വ്യക്തതയില്ല. ഈ സ്പീഷീസ് കൃത്യമായി എപ്പോഴാണ് വംശനാശം സംഭവിച്ചതെന്നോ, ഇന്ന് ഫ്ലോറസ് ദ്വീപിൽ കാണപ്പെടുന്ന ചെറിയ മെഗാപോഡുകൾക്കൊപ്പം ഇവ ജീവിച്ചിരുന്നെന്നോ കണ്ടെത്താനായിട്ടില്ല. പുരാതന മനുഷ്യർ ഈ പക്ഷിയുടെ മുട്ടകൾ ഭക്ഷിച്ചിരുന്നിരിക്കാമെന്ന സാധ്യതയും ഗവേഷകർ മുന്നോട്ടുവെക്കുന്നു. എന്നാൽ, മുട്ടകൾ ഭക്ഷിച്ചിരുന്നതായി തെളിയിക്കുന്ന നേരിട്ടുള്ള തെളിവുകളൊന്നും ഇതുവരെ ലഭിച്ചിട്ടില്ല.