വീടിനടുത്ത് കളിച്ചുകൊണ്ടിരുന്ന ആറുവയസുകാരിയെ ആക്രമിച്ച് പുള്ളിപ്പുലി, വടിയെടുത്തോടിച്ച് അമ്മ
Synopsis
കാജല് എന്ന കുട്ടിയാണ് ആക്രമിക്കപ്പെട്ടത്. ആ സമയം കാജലിന്റെ അമ്മ റീന ദേവി മുറികൾ തൂത്തുവാരുകയായിരുന്നു. പെട്ടെന്ന് വീടിനടുത്തേക്ക് ചാടിയ പുലി പെൺകുട്ടിയെ ആക്രമിക്കുകയും പെൺകുട്ടിയെ വലിച്ചിഴയ്ക്കാൻ ശ്രമിക്കുകയും ചെയ്തു.
ഒരു അമ്മ(Mother) പുള്ളിപ്പുലി(Leopard)യില് നിന്നും തന്റെ ആറ് വയസുള്ള മകളെ രക്ഷിക്കാന് നടത്തിയ പോരാട്ടമാണ് ഇപ്പോള് വാര്ത്തയാവുന്നത്. ഉത്തർപ്രദേശിലെ ബഹ്റൈച്ച് ജില്ലയിലെ ഖൈരിഘട്ട് പൊലീസ് സ്റ്റേഷൻ പരിധിയിലെ ഗിർദ ഗ്രാമത്തിലാണ് സംഭവം. വീടിന് പരിസരത്ത് കളിച്ചുകൊണ്ടിരിക്കവെയാണ് കുട്ടിയെ പുലി ആക്രമിച്ചത് എന്നാണ് റിപ്പോര്ട്ടുകള് പറയുന്നത്. അമ്മ മകളുടെ കരച്ചില് കേട്ട് ഓടിയെത്തുകയായിരുന്നു. പിന്നീട്, ഒന്നും നോക്കാതെ ഒരു വടിയുമായി പുലിയെ ആക്രമിച്ചു.
അവസാനം പുള്ളിപ്പുലിക്ക് ഓടിപ്പോകേണ്ടി വന്നു. കുട്ടിക്ക് ഗുരുതരമായി പരിക്കേറ്റിരുന്നു. സംഭവത്തെ കുറിച്ചറിഞ്ഞ് വനം വകുപ്പിലെ ഉദ്യോഗസ്ഥര് സ്ഥലത്തെത്തി. വന്യജീവി റേഞ്ചർ റഷീദ് ജമീലും സ്ഥലത്തെത്തി. പെൺകുട്ടിയെ ഉടൻ തന്നെ ശിവ്പൂർ പ്രാഥമികാരോഗ്യ കേന്ദ്രത്തിലേക്ക് കൊണ്ടുപോയി, അവിടെ നിന്ന് ജില്ലാ ആശുപത്രിയിലേക്ക് റഫർ ചെയ്തു. പെൺകുട്ടിയുടെ നില ഗുരുതരമാണെന്നാണ് വിവരം. ബഹ്റൈച്ച് ഫോറസ്റ്റ് ഡിവിഷനിലെ നാൻപാറ റേഞ്ചില് നിന്നാണ് പുലി എത്തിയത് എന്നാണ് കരുതുന്നത്.
കാജല് എന്ന കുട്ടിയാണ് ആക്രമിക്കപ്പെട്ടത്. ആ സമയം കാജലിന്റെ അമ്മ റീന ദേവി മുറികൾ തൂത്തുവാരുകയായിരുന്നു. പെട്ടെന്ന് വീടിനടുത്തേക്ക് ചാടിയ പുലി പെൺകുട്ടിയെ ആക്രമിക്കുകയും പെൺകുട്ടിയെ വലിച്ചിഴയ്ക്കാൻ ശ്രമിക്കുകയും ചെയ്തു. റീന ഉടൻ തന്നെ ഒരു വടി എടുത്ത് പുള്ളിപ്പുലിയെ ആക്രമിക്കുകയായിരുന്നു. തുടര്ന്ന് അത് ഓടിപ്പോയി എന്നും പറയുന്നു. കുട്ടിയുടെ മുഖത്തും തലയിലുമാണ് പരിക്കേറ്റത്.
(ചിത്രം പ്രതീകാത്മകം)