'മഴ പെയ്യുന്നു, ആരെങ്കിലും രക്ഷിക്കൂ'; ബെംഗളൂരുവിലെ രക്ഷാപ്രവർത്തനം, 70 ലക്ഷത്തിലേറെ പേർ കണ്ട വീഡിയോ

കനത്ത മഴയിൽ ബംഗളൂരുവിൽ ടെറസിൽ കുടുങ്ങിയ ഒരു കൂട്ടം പ്ലഷ് പാവകളുടെ വീഡിയോ സോഷ്യൽ മീഡിയയിൽ വൈറലായി. പാവകളെ രക്ഷിക്കാൻ തമാശരൂപേണ ആവശ്യപ്പെടുന്ന ഇൻസ്റ്റാഗ്രാം വീഡിയോ 70 ലക്ഷത്തിലധികം പേരാണ് കണ്ടത്. ഒടുവിൽ 10 മണിക്കൂർ നീണ്ട മഴയെ അതിജീവിച്ച് പാവകൾ സുരക്ഷിതരായി ഇരിക്കുന്ന വിവരവും പുറത്തുവന്നു.

കനത്ത മഴയിൽ ജനജീവിതം സ്തംഭിച്ച ബംഗളൂരുവിൽ നിന്നുള്ള വേറിട്ടൊരു കാഴ്ച സോഷ്യൽ മീഡിയയിൽ വൈറലായി. മഴയത്ത് ടെറസിൽ കുടുങ്ങിപ്പോയ ഒരു കൂട്ടം പ്ലഷ് പാവകളെ രക്ഷിക്കാനായി നെറ്റിസൺസ് തമാശരൂപേണ രംഗത്തിറങ്ങിയതാണ് ഇപ്പോൾ ഇൻസ്റ്റാഗ്രാമിലെ പ്രധാന ചർച്ചാവിഷയം.

മഴ നനഞ്ഞ പാവകൾ

ടെറസിലെ തുണി ഉണക്കാനിടുന്ന കയറിൽ തൂക്കിയിട്ടിരുന്ന ഏതാനും പഞ്ഞിനിറച്ച പാവകൾ മഴയിൽ കുതിർന്നു കിടക്കുന്ന വീഡിയോയാണ് സോഷ്യൽ മീഡിയയുടെ ശ്രദ്ധ കവർന്നത്. ഉണങ്ങാനായി പുറത്തിട്ട പാവകൾ കനത്ത മഴയിൽ പെട്ടുപോകുകയായിരുന്നു. ഈ കാഴ്ച കണ്ട ഇൻസ്റ്റാഗ്രാം ഉപയോക്താവായ സൂര്യകാന്ത് ശർമ്മ, മഴയോട് പോരാടുന്ന ഈ 'പാവ സംഘത്തെ' രക്ഷിക്കാൻ ഉടൻ തന്നെ ഒരു രക്ഷാപ്രവർത്തക സംഘത്തെ അയക്കണമെന്ന് തമാശയായി കുറിച്ചു.

"ഇന്ന് ബംഗളൂരു കാലാവസ്ഥ ഒരു മുന്നറിയിപ്പും നൽകിയില്ല. ഈ പാവകളുടെ ഉടമസ്ഥനോടാണ്; ജോലിസ്ഥലത്തെ മീറ്റിംഗ് ഒക്കെ മാറ്റിവെച്ച് ആദ്യം ഇവരെ പോയി രക്ഷിക്കൂ!" എന്നായിരുന്നു ശർമ്മ കുറിച്ചത്. "ഉടമസ്ഥൻ ബംഗളൂരു ട്രാഫിക്കിൽ കുടുങ്ങിക്കിടക്കുകയാവും, അതേസമയം ടെറസിൽ സംഭവിക്കുന്നത് നോക്കൂ," എന്നും "ഉടൻ രക്ഷാപ്രവർത്തകരെ അയക്കൂ, അവർക്ക് അധികനേരം നീന്താൻ കഴിയില്ല!" എന്നും വീഡിയോയ്ക്ക് മുകളിൽ കുറിച്ചിരുന്നു.

വീഡിയോ കണ്ടത് 70 ലക്ഷം പേർ

വീഡിയോ പങ്കുവെച്ച് ചുരുങ്ങിയ സമയത്തിനകം തന്നെ 70 ലക്ഷത്തിലധികം ആളുകളാണ് ഇത് കണ്ടത്. "രക്ഷാപ്രവർത്തകർ ബംഗളൂരു ട്രാഫിക്കിൽ കുടുങ്ങിയിട്ടുണ്ടാകും", "അവർ ഒറ്റ നൂലിലാണ് തൂങ്ങിനിൽക്കുന്നത്" തുടങ്ങി നിരവധി തമാശ കമന്‍റുകളാണ് വീഡിയോയ്ക്ക് താഴെ ഉയർന്നത്. തുടർന്ന്, 10 മണിക്കൂർ നീണ്ട കനത്ത മഴയ്ക്ക് ശേഷം ഈ പാവകൾ അതിജീവിച്ചുവെന്ന സന്തോഷവാർത്തയും ശർമ്മ പുതിയ വീഡിയോയിലൂടെ പങ്കുവെച്ചു. രാത്രി മുഴുവൻ പെയ്ത മഴയെ പ്രതിരോധിച്ച് പാവകൾ കയറിൽ തന്നെ പിടിച്ചുനിന്നതായി അദ്ദേഹം അറിയിച്ചു. പാവകൾ സുരക്ഷിതരാണെന്ന അപ്‌ഡേറ്റ് വന്നതോടെ, "ഇന്നലെ മുതൽ ഇതോർത്ത് വിഷമിക്കുകയായിരുന്നു, ഇപ്പോൾ വലിയ ആശ്വാസമായി" എന്ന പ്രതികരണങ്ങളുമായി സോഷ്യൽ മീഡിയ ഉപയോക്താക്കളും ആശ്വാസം പ്രകടിപ്പിച്ചു.