വിവാഹ ഘോഷയാത്രയ്ക്കായി അണിനിരന്നത് ഒന്നും രണ്ടുമല്ല, ഒമ്പത് സെപ്റ്റിക് ടാങ്ക് ലോറികൾ; വരന്‍റെ ആഗ്രഹത്തിന് ഒപ്പം നിന്ന് വധുവും

ചൈനയിലെ അൻഹുയി പ്രവിശ്യയിൽ, പാൻ ഹാവോനാൻ എന്ന വരൻ തന്‍റെ തൊഴിലിനോടുള്ള ആദരസൂചകമായി ഒൻപത് സെപ്റ്റിക് ടാങ്ക് ലോറികളിൽ വധുവിനെ കൂട്ടിക്കൊണ്ടുപോകാനെത്തി. വധുവായ ലി യാക്കിംഗിന്‍റെ പൂർണ്ണ പിന്തുണയോടെ നടന്ന ഈ വ്യത്യസ്തമായ വിവാഹ ഘോഷയാത്ര സമൂഹ മാധ്യമങ്ങളിൽ ഏറെ ശ്രദ്ധ നേടി.

സാധാരണയായി വിവാഹ ഘോഷയാത്രകൾക്കായി ആഡംബര കാറുകളും പൂക്കളാൽ അലങ്കരിച്ച വാഹനങ്ങളുമാണ് നാം കണ്ടുവരുന്നത്. എന്നാൽ ചൈനയിലെ അൻഹുയി പ്രവിശ്യയിൽ നടന്ന ഒരു വിവാഹം ഇതിൽ നിന്നെല്ലാം വ്യത്യസ്തമായി ലോകശ്രദ്ധ പിടിച്ചുപറ്റുകയാണ്. തന്‍റെ തൊഴിലിനോടുള്ള ആദരസൂചകമായി ഒൻപത് സെപ്റ്റിക് ടാങ്ക് ലോറികളുമായാണ് വരൻ പാൻ ഹാവോനാൻ വധുവിനെ കൂട്ടിക്കൊണ്ട് പോകാൻ എത്തിയത്.

ജോലി തെരഞ്ഞെടുപ്പും പാനിന്‍റെ ഇഷ്ടം

മുപ്പതുകാരനായ പാൻ ഹാവോനാൻ ഫിലിം എഡിറ്റിംഗിൽ ബിരുദധാരിയാണ്. സ്വന്തമായി തുടങ്ങിയ സ്റ്റാർട്ടപ്പ് പരാജയപ്പെട്ടതോടെയാണ് 2023 -ൽ അദ്ദേഹം പിതാവിന്‍റെ സെപ്റ്റിക് ടാങ്ക് ക്ലീനിംഗ് ബിസിനസ്സിൽ പങ്കുചേരാൻ തീരുമാനിച്ചു. മലിനജല സംസ്‌കരണ മേഖലയിൽ 20 വർഷത്തിലേറെ പരിചയ സമ്പത്തുള്ള തന്‍റെ പിതാവിനെ സഹായിക്കാൻ പാൻ എത്തിയപ്പോൾ, ഈ തൊഴിലിലെ കഷ്ടപ്പാടുകൾ ഓർത്ത് മാതാപിതാക്കൾ ആദ്യം എതിർപ്പുകൾ പ്രകടിപ്പിച്ചിരുന്നു. എന്നാൽ തന്‍റെ ജോലിയിൽ അഭിമാനം കണ്ടെത്തിയ പാൻ അവരെ പറഞ്ഞ് സമ്മതിപ്പിക്കുകയായിരുന്നു.

സെപ്റ്റിക് ടാങ്കറും പാനിന്‍റെ തീരുമാനം

തന്‍റെ വിവാഹത്തിന് സെപ്റ്റിക് ടാങ്ക് ലോറികൾ ഉപയോഗിക്കണമെന്ന പാനിന്‍റെ ആഗ്രഹം കേട്ട് വധു ലി യാക്കിംഗ് അത്ഭുതപ്പെട്ടില്ല. പകരം, ആ ആശയത്തെ അവർ പൂർണ്ണമായി പിന്തുണച്ചു. കഠിനാധ്വാനത്തിലൂടെ പണം സമ്പാദിക്കുന്ന പാനിന്‍റെ ജോലി മറ്റേതൊരു പ്രൊഫഷനെയും പോലെ മാന്യമാണെന്നും ഈ യാത്ര തനിക്ക് വളരെ മനോഹരമായി തോന്നിയെന്നും ലി പറഞ്ഞു. പാനിന്‍റെ മാതാപിതാക്കൾക്ക് ആദ്യം ഈ കാര്യത്തിൽ മടിയുണ്ടായിരുന്നെങ്കിലും വധുവിന്‍റെയും വരന്‍റെയും ഉറച്ച തീരുമാനം അവർ അംഗീകരിക്കുകയായിരുന്നു.

തൊഴിലിന്‍റെ മഹത്വം

മാർച്ച് 28-ന് നടന്ന വിവാഹത്തിനായി ഒൻപത് ലോറികളാണ് ഒന്നിന് പുറകെ ഒന്നായി അണിനിരന്നത്. രണ്ട് ലോറികൾ സ്വന്തം കമ്പനിയിലേതും ബാക്കിയുള്ളവ സഹപ്രവർത്തകരുടേതുമായിരുന്നു. വാഹനങ്ങൾ എല്ലാം നന്നായി കഴുകി വൃത്തിയാക്കി ചുവന്ന കടലാസ് പൂക്കൾ കൊണ്ട് അലങ്കരിച്ചിരുന്നു. "ജോലിയിൽ അഴുക്ക് പുരളുന്നുണ്ടെങ്കിലും അതിൽ നിന്നുള്ള വരുമാനം തികച്ചും സത്യസന്ധമാണ്. മറ്റ് പല ജോലികളെക്കാളും സുരക്ഷിതവുമാണ് ഈ മേഖല," എന്ന് പാൻ അഭിമാനത്തോടെ പറയുന്നു. സമൂഹ മാധ്യമങ്ങളിൽ പ്രചരിച്ച ഈ വാർത്തയ്ക്ക് വലിയ രീതിയിലുള്ള പിന്തുണയാണ് ലഭിച്ചുകൊണ്ടിരിക്കുന്നത്. തൊഴിലിന്‍റെ മഹത്വം ഉയർത്തിപ്പിടിച്ച പാനിനെയും അദ്ദേഹത്തിന് പിന്തുണ നൽകിയ ലിയെയും നിരവധിപ്പേർ അഭിനന്ദിച്ചു.