ക്ലീനിം​ഗെന്നാൽ ജീവനാണ്, ഉണ്ടായിരുന്ന ജോലിയുപേക്ഷിച്ച് സൗജന്യമായി വീട് വൃത്തിയാക്കി നൽകുന്ന യുവതി

യുഎസ്എ -യിലും യുകെ -യിലും ഒക്കെ പോയി അവളിപ്പോൾ ആളുകൾക്ക് വീട് വൃത്തിയാക്കി നൽകുന്നു. ഓൺലൈനിലാണ് ആളുകൾ അവളോട് വീട് വൃത്തിയാക്കി നൽകാൻ ആവശ്യപ്പെടാറ്.

മിക്കവർക്കും ഒട്ടും ചെയ്യാനിഷ്ടമില്ലാത്ത ജോലിയാണ് വീട് വൃത്തിയാക്കുക എന്നത്. ആരെങ്കിലും വന്ന് ഇതെല്ലാം ഒന്ന് വൃത്തിയാക്കി തന്നെങ്കിൽ എന്ന് ആ​ഗ്രഹിക്കാത്ത ആരും കാണില്ല. എന്നാൽ, ഇവിടെ ഒരു സ്ത്രീക്ക് വീട് വൃത്തിയാക്കലാണ് എല്ലാം. വൃത്തിയാക്കലോളം ഇഷ്ടപ്പെടുന്ന മറ്റൊരു കാര്യവും അവളുടെ ജീവിതത്തിലില്ല എന്ന് വേണമെങ്കിൽ പറയാം. 

ഫിൻലാൻഡുകാരിയായ ഓറി കാതറീനയ്ക്ക് ക്ലീനിം​ഗ് വളരെ ഇഷ്ടമാണ്. അതിനാൽ തന്നെ ഉണ്ടായിരുന്ന ജോലി പോലും കളഞ്ഞ് വിവിധയിടങ്ങളിൽ സഞ്ചരിച്ച് ആളുകളുടെ വീടുകൾ സൗജന്യമായി വൃത്തിയാക്കി കൊടുക്കുകയാണ് ഇപ്പോൾ അവൾ ചെയ്യുന്നത്. 

2021 -ലെ വേനൽകാലത്താണ് ഒരു ക്ലീനിം​ഗ് കമ്പനിയിലെ സർവീസ് മാനേജർ ജോലി 29 -കാരിയായ ഓറി ഉപേക്ഷിച്ചത്. ഇപ്പോൾ ലോകത്താകമാനം സഞ്ചരിച്ച് ആളുകളുടെ വൃത്തികേടായിരിക്കുന്ന വീടുകൾ വൃത്തിയാക്കാൻ സഹായിക്കുകയാണ് അവളിപ്പോൾ. 

വിധവയായ ഒരു സിം​ഗിൾ മദറിനെ അവരുടെ വീട് വൃത്തിയാക്കാൻ സഹായിച്ചു ഒരിക്കൽ ഓറി. മാസങ്ങളോളം അവളുടെ കയ്യിൽ കാശില്ലായിരുന്നു. എന്നാൽ, ആ സമയം മുതലാണ് അവൾ ക്ലീനിം​ഗിനെ സ്നേഹിച്ച് തുടങ്ങിയത്. എന്നാൽ, ടിക്ടോക്കിലൂടെ കാര്യങ്ങളെല്ലാം പങ്കുവച്ചപ്പോൾ എല്ലാം മാറി. ഇപ്പോൾ അവൾക്ക് സ്പോൺസർമാരെ ലഭിക്കുന്നു. അതുകൊണ്ട് തന്നെ വൃത്തിയാക്കുന്ന വീടുകളുടെ ഉടമകളോട് ഒരു രൂപ പോലും വാങ്ങേണ്ടതില്ല. 

യുഎസ്എ -യിലും യുകെ -യിലും ഒക്കെ പോയി അവളിപ്പോൾ ആളുകൾക്ക് വീട് വൃത്തിയാക്കി നൽകുന്നു. ഓൺലൈനിലാണ് ആളുകൾ അവളോട് വീട് വൃത്തിയാക്കി നൽകാൻ ആവശ്യപ്പെടാറ്. ആ അപേക്ഷകളിൽ നിന്നും വൃത്തിയാക്കാനുള്ള വീടുകൾ അവൾ തെരഞ്ഞെടുക്കുന്നു. കൂടുതൽ വൃത്തികേടായി കിടക്കുന്ന വീടുകളുള്ള, കൂടുതൽ ആവശ്യമുള്ള ആളുകളെയാണ് അവൾ പലപ്പോഴും തെരഞ്ഞെടുക്കുന്നത്. 

ഈ വീഡിയോകളെല്ലാം അവൾ ടിക്ടോക്കിൽ പങ്ക് വയ്ക്കുന്നു. 7.8 മില്ല്യൺ ഫോളോവേഴ്സാണ് അവൾക്ക് ടിക്ടോക്കിൽ ഉള്ളത്. എനിക്കിഷ്ടമുള്ള കാര്യം സൗജന്യമായി ചെയ്ത് കൊടുത്ത് ആളുകളെ സന്തോഷിപ്പിക്കാൻ താനിഷ്ടപ്പെടുന്നു. ലോകമെമ്പാടും ഇങ്ങനെ ആളുകളെ സഹായിക്കണം എന്നാണ് ഞാൻ ആ​ഗ്രഹിക്കുന്നത് എന്നും അവൾ പറയുന്നു.