ജീവനക്കാർക്ക് സ്വയം പിരിഞ്ഞുപോകാം; അഞ്ച് രാജ്യങ്ങളിൽ പിരിച്ചുവിടൽ ആനുകൂല്യവുമായി ഗൂഗിൾ, ലക്ഷ്യം ചെലവ് കുറയ്ക്കൽ

നിർമിതബുദ്ധി മേഖലയിൽ നിക്ഷേപം വർധിപ്പിക്കുന്നതിന്റെ ഭാഗമായി ചെലവുകൾ നിയന്ത്രിക്കാൻ ഗൂഗിൾ ജീവനക്കാർക്ക് സ്വമേധയാ രാജിവെക്കാൻ അവസരം നൽകുന്നു. അഞ്ച് രാജ്യങ്ങളിലെ ജീവനക്കാർക്കാണ് ഈ ആനുകൂല്യം ലഭിക്കുക. എഐ നിക്ഷേപങ്ങൾ ടെക് കമ്പനികളുടെ തൊഴിൽ ഘടനയിൽ വലിയ മാറ്റങ്ങൾ സൃഷ്ടിക്കുന്നു.

നിർമിതബുദ്ധി (എഐ) മേഖലയിൽ കൂടുതൽ നിക്ഷേപം നടത്തുന്നതിനിടെ ചെലവുകൾ നിയന്ത്രിക്കാനുള്ള നീക്കവുമായി ഗൂഗിൾ. ഇതിന്റെ ഭാഗമായി അഞ്ച് രാജ്യങ്ങളിലെ ജീവനക്കാർക്ക് സ്വമേധയാ ജോലി രാജിവെച്ച് കമ്പനിയിൽനിന്ന് പിരിഞ്ഞുപോകാനുള്ള അവസരം നൽകുകയാണ് ഗൂഗിൾ. കമ്പനി വിടുന്നവർക്ക് സേവനകാലയളവിന് അനുസരിച്ചുള്ള സാമ്പത്തിക ആനുകൂല്യവും ലഭിക്കും. റോയിട്ടേഴ്സാണ് ഇക്കാര്യം റിപ്പോർട്ട് ചെയ്തത്. കാനഡ, ഫ്രാൻസ്, ജർമനി, ജപ്പാൻ, സ്വിറ്റ്സർലൻഡ് എന്നീ രാജ്യങ്ങളിലെ ജീവനക്കാർക്കാണ് പുതിയ പദ്ധതി ബാധകമാകുന്നത്. ജൂണിലാണ് ഗൂഗിൾ കൂടുതൽ രാജ്യങ്ങളിലേക്ക് പദ്ധതി വ്യാപിപ്പിച്ചത്. എത്ര ജീവനക്കാർ ഈ അവസരം പ്രയോജനപ്പെടുത്തിയെന്ന കാര്യം കമ്പനി വ്യക്തമാക്കിയിട്ടില്ല.

ഡീപ്‌മൈൻഡിനും ഗൂഗിൾ ക്ലൗഡിനും ഇളവ്

ഗൂഗിളിലെ എല്ലാ വിഭാഗം ജീവനക്കാർക്കും ഈ ഓഫർ ലഭ്യമല്ല. കമ്പനിയുടെ നിർമിതബുദ്ധി ഗവേഷണ വിഭാഗമായ ഡീപ്‌മൈൻഡിനെയും ഗൂഗിൾ ക്ലൗഡിനെയും പദ്ധതിയിൽനിന്ന് ഒഴിവാക്കിയിട്ടുണ്ട്. ഈ രണ്ട് വിഭാഗങ്ങളിലും കൂടുതൽ ജീവനക്കാരെ നിയമിക്കേണ്ടതുണ്ടെന്നാണ് കമ്പനിയുടെ വിലയിരുത്തൽ. നിർമിതബുദ്ധി, ക്ലൗഡ് കമ്പ്യൂട്ടിങ് മേഖലകളിൽ കൂടുതൽ ശക്തമാകാനുള്ള ശ്രമത്തിലാണ് ഗൂഗിൾ. അതിനാൽ ഭാവിയിലെ വളർച്ചയ്ക്ക് നിർണായകമെന്ന് കരുതുന്ന വിഭാഗങ്ങളിൽ നിയമനം വർധിപ്പിക്കുമ്പോൾ മറ്റ് ചില മേഖലകളിൽ ജീവനക്കാരുടെ എണ്ണം കുറയ്ക്കുകയോ പുനഃസംഘടിപ്പിക്കുകയോ ചെയ്യാനാണ് നീക്കം. ഗൂഗിളിന്റെ മാതൃകമ്പനിയായ ആൽഫബെറ്റ് നിർമിതബുദ്ധി മേഖലയിലെ നിക്ഷേപം ഗണ്യമായി വർധിപ്പിച്ചിട്ടുണ്ട്. ഇതോടെ നിക്ഷേപങ്ങൾക്കൊപ്പം പ്രവർത്തനച്ചെലവുകളും നിയന്ത്രിക്കേണ്ട സാഹചര്യമാണുള്ളത്.

സ്വിറ്റ്സർലൻഡിൽ ജീവനക്കാർ കമ്പനി വിട്ടുതുടങ്ങി

പദ്ധതിയുടെ ഭാഗമായി സ്വിറ്റ്സർലൻഡിലെ ജീവനക്കാർക്ക് ജൂണിൽ ഓഫർ ലഭിച്ചിരുന്നു. ഇത് സ്വീകരിച്ചവർ ഓഗസ്റ്റ് മുതൽ കമ്പനി വിട്ടുതുടങ്ങിയതായി വിഷയവുമായി ബന്ധപ്പെട്ട വൃത്തങ്ങളെ ഉദ്ധരിച്ച് റിപ്പോർട്ടുകൾ പറയുന്നു. സ്വിറ്റ്സർലൻഡിൽ ഏകദേശം 5,000 ഗൂഗിൾ ജീവനക്കാരാണുള്ളത്. സൂറിച്ചിൽ കമ്പനിയുടെ പ്രധാന എൻജിനീയറിങ് കേന്ദ്രവും പ്രവർത്തിക്കുന്നുണ്ട്. ജോലിയിൽ ചെലവഴിച്ച ഓരോ വർഷത്തിനും ഒരു മാസത്തെ ശമ്പളം എന്ന കണക്കിലാണ് പിരിഞ്ഞുപോകുന്നവർക്ക് ആനുകൂല്യം വാഗ്ദാനം ചെയ്തത്. പരമാവധി 12 മാസത്തെ ശമ്പളമാണ് ലഭിക്കുക. ഏകദേശം 50 ജീവനക്കാരുള്ള ഒരു ടീമിൽനിന്ന് കുറഞ്ഞത് നാല് പേർ ഈ ഓഫർ സ്വീകരിച്ചതായും റിപ്പോർട്ടുകളുണ്ട്.

ജീവനക്കാർക്ക് സ്വമേധയാ പിരിഞ്ഞുപോകാൻ മൈക്രോസോഫ്റ്റും

നിർമിതബുദ്ധി മേഖലയിലെ ചെലവുകൾ വർധിക്കുന്ന സാഹചര്യത്തിൽ ജീവനക്കാരുടെ എണ്ണം പുനഃപരിശോധിക്കുന്ന മറ്റൊരു പ്രമുഖ ടെക് കമ്പനിയാണ് മൈക്രോസോഫ്റ്റ്. അമേരിക്ക, കാനഡ, ഇന്ത്യ, ബ്രിട്ടൻ എന്നീ രാജ്യങ്ങളിലെ ഏകദേശം 60,000 ജീവനക്കാരെ ഉൾക്കൊള്ളാൻ സാധ്യതയുള്ള സ്വമേധയാ പിരിഞ്ഞുപോകൽ പദ്ധതിയാണ് കമ്പനി പ്രഖ്യാപിച്ചിരിക്കുന്നത്. മൈക്രോസോഫ്റ്റിലെ 70-ാം ഗ്രേഡോ അതിൽ താഴെയോ ഉള്ള യോഗ്യരായ ജീവനക്കാർക്കാണ് പദ്ധതിയുടെ ആനുകൂല്യം ലഭിക്കുക. ഇതോടെ കമ്പനിയിലെ ആകെ 2,23,000 ജീവനക്കാരിൽ ഏകദേശം 27 ശതമാനം പേർക്ക് അവസരം ലഭിക്കും. ഓഫർ സ്വീകരിക്കുന്നവർക്ക് ഡിസംബർ അവസാനത്തോടെ കമ്പനിയിൽനിന്ന് പിരിഞ്ഞുപോകാം.

എഐ പ്രവർത്തനങ്ങൾക്കായി ഡാറ്റാ സെന്ററുകളിലും കമ്പ്യൂട്ടിങ് അടിസ്ഥാനസൗകര്യങ്ങളിലും മൈക്രോസോഫ്റ്റ് കോടിക്കണക്കിന് ഡോളറാണ് നിക്ഷേപിക്കുന്നത്. ഇതിന് പിന്നാലെയാണ് ജീവനക്കാർക്ക് സ്വമേധയാ വിരമിക്കാനുള്ള പദ്ധതി പ്രഖ്യാപിച്ചത്. ഏപ്രിലിൽ സ്വമേധയാ വിരമിക്കൽ പദ്ധതി പ്രഖ്യാപിച്ച മൈക്രോസോഫ്റ്റ് ജൂലൈയിൽ 4,800 ജീവനക്കാരെ ബാധിക്കുന്ന തൊഴിൽ വെട്ടിക്കുറയ്ക്കലും നടത്തിയിരുന്നു.

നിർമിതബുദ്ധി മേഖലയിലെ വൻ നിക്ഷേപങ്ങൾ ആഗോള ടെക് കമ്പനികളുടെ തൊഴിൽ ഘടനയിലും ജീവനക്കാരുടെ ആവശ്യകതയിലും വലിയ മാറ്റങ്ങൾ സൃഷ്ടിക്കുന്നതിന്റെ സൂചനയായാണ് ഈ നീക്കങ്ങൾ വിലയിരുത്തപ്പെടുന്നത്.