ഗാലക്സി S27-ൽ തട്ടിപ്പുകൾക്ക് പൂട്ട്; പുതിയ ഫീച്ചർ വരുന്നു

സാംസങിന്റെ ഗാലക്സി എസ്27, എസ്25 സീരീസുകളിലും പഴയ ഫോൾഡബിൾ ഫോണുകളിലും 'സ്കാം ഡിറ്റക്ഷൻ' ഫീച്ചർ എത്തിയേക്കുമെന്ന് റിപ്പോർട്ട്. വൺ യു.ഐ 9 ബീറ്റ കോഡിൽ നിന്നാണ് ഈ വിവരങ്ങൾ ലഭിച്ചത്. ഇത് കൂടാതെ, അടുത്ത തലമുറ എക്സിനോസ് 2700 ചിപ്പിനെക്കുറിച്ചുള്ള സൂചനകളും കോഡിൽ കണ്ടെത്തിയിട്ടുണ്ട്.

സാംസങിന്റെ അടുത്ത തലമുറ ഫ്ലാഗ്ഷിപ്പ് സ്മാർട്ട്ഫോണുകളായ ഗാലക്സി എസ്27 സീരീസിലും ‘സ്കാം ഡിറ്റക്ഷൻ’ ഫീച്ചർ എത്തിയേക്കുമെന്ന് റിപ്പോർട്ട്. ഗാലക്സി എസ്25 സീരീസിലെ ചില മോഡലുകൾക്കും പഴയ ഫോൾഡബിൾ ഫോണുകൾക്കും ഈ ഫീച്ചർ ലഭിച്ചേക്കുമെന്നാണ് പുതിയ സൂചനകൾ. സാംസങിന്റെ സോഫ്റ്റ്‌വെയർ കോഡിൽ നിന്നാണ് ഇതുസംബന്ധിച്ച വിവരങ്ങൾ പുറത്തുവന്നത്. എന്നാൽ ഫീച്ചർ എത്തുന്ന കാര്യത്തിൽ കമ്പനി ഇതുവരെ ഔദ്യോഗിക സ്ഥിരീകരണം നൽകിയിട്ടില്ല. വികസന ഘട്ടത്തിലുള്ള കോഡിൽ ഒരു ഫീച്ചറിന്റെ പരാമർശം ഉണ്ടെന്നത് അത് എല്ലാ മോഡലുകളിലും ലഭിക്കുമെന്ന് ഉറപ്പുനൽകുന്നില്ല.

ഗാലക്സി എസ്25 സീരീസിലേക്കും ഫീച്ചർ എത്തിയേക്കും

ഗാലക്സി എസ്26-നുള്ള വൺ യു.ഐ 9 ബീറ്റ 7 വിശകലനം ചെയ്യുന്നതിനിടെയാണ് ആൻഡ്രോയ്ഡ് അതോറിറ്റി നിർണായക വിവരങ്ങൾ കണ്ടെത്തിയത്. ഗാലക്സി എസ്25, ഗാലക്സി എസ്25 പ്ലസ്, ഗാലക്സി എസ്25 എഡ്ജ്, ഗാലക്സി എസ്25 അൾട്രാ എന്നീ മോഡലുകളുടെ വിവരങ്ങൾ സ്കാം ഡിറ്റക്ഷനുമായി ബന്ധപ്പെട്ട കോഡിൽ ഉൾപ്പെട്ടിട്ടുണ്ട്. ഗാലക്സി ഇസഡ് ഫോൾഡ് 7, ഗാലക്സി ഇസഡ് ഫ്ലിപ്പ് 7, ഗാലക്സി ഇസഡ് ട്രൈഫോൾഡ് എന്നീ ഫോൾഡബിൾ മോഡലുകളുടെയും വിവരങ്ങൾ കോഡിൽ കണ്ടെത്തിയിട്ടുണ്ട്.

എസ്27 സീരീസിലും സ്കാം ഡിറ്റക്ഷൻ

ഗാലക്സി എസ്27 സീരീസുമായി ബന്ധപ്പെട്ടതായി കരുതുന്ന നാല് മോഡൽ നമ്പറുകളും കോഡിൽ കണ്ടെത്തിയിട്ടുണ്ട്. എസ്952 ഗാലക്സി എസ്27, എസ്956 ഗാലക്സി എസ്27 പ്ലസ്, എസ്957 ഗാലക്സി എസ്27 പ്രോ, എസ്958 ഗാലക്സി എസ്27 അൾട്രാ എന്നിവയുമായി ബന്ധപ്പെട്ടതാകാമെന്നാണ് റിപ്പോർട്ട്. ഇതോടെ ഗാലക്സി എസ്27 സീരീസിലും സ്കാം ഡിറ്റക്ഷൻ ലഭിക്കാനുള്ള സാധ്യതയാണ് ഉയരുന്നത്. എന്നാൽ ഫീച്ചർ എപ്പോൾ ലഭ്യമാകുമെന്ന കാര്യത്തിൽ വ്യക്തതയില്ല.

തട്ടിപ്പുകൾ തിരിച്ചറിയാൻ സഹായിക്കും

ഫോൺ കോളുകളിലൂടെയും മറ്റ് ആശയവിനിമയങ്ങളിലൂടെയും നടക്കുന്ന തട്ടിപ്പുകൾ തിരിച്ചറിയാൻ സഹായിക്കുന്ന സംവിധാനമാണ് സ്കാം ഡിറ്റക്ഷൻ. ഗൂഗിളിന്റെ പിക്സൽ 9 സീരീസിലാണ് ഈ ഫീച്ചർ ആദ്യമായി അവതരിപ്പിച്ചത്. പിന്നീട് സാംസങിന്റെ ഗാലക്സി എസ്26 സീരീസിലേക്കും ഇത് എത്തി. പുതിയ ഗാലക്സി ഇസഡ് 8 ഫോൾഡബിൾ ഫോണുകളിലും സാംസങ് ഫോൺ ആപ്പ് വഴി ഫീച്ചർ ലഭ്യമാക്കിയിട്ടുണ്ട്.

എക്സിനോസ് 2700 ചിപ്പിനും സൂചന

അതേസമയം, വൺ യു.ഐ 9 ബീറ്റയിലെ കോഡിൽ ‘എസ്5ഇ9975’ എന്ന ചിപ്പിന്റെ പരാമർശവും കണ്ടെത്തിയിട്ടുണ്ട്. ഇത് സാംസങിന്റെ അടുത്ത തലമുറ എക്സിനോസ് 2700 ചിപ്പായിരിക്കാമെന്നാണ് റിപ്പോർട്ട്. ക്വാൽകോം ചിപ്പുമായി ബന്ധപ്പെട്ട വിവരങ്ങളും കോഡിലുണ്ട്. ഇതോടെ 2027ലെ ഫ്ലാഗ്ഷിപ്പ് സ്മാർട്ട്ഫോണുകളിൽ എക്സിനോസ്, ക്വാൽകോം ചിപ്പുകൾ ഉപയോഗിക്കുന്നത് സാംസങ് തുടർന്നേക്കുമെന്ന സൂചനയാണ് ലഭിക്കുന്നത്.

ഗാലക്സി എസ്27 എങ്ങനെയായിരിക്കും?

പുറത്തുവന്ന സിഎഡി റെൻഡറുകൾ പ്രകാരം ഗാലക്സി എസ്27-ന് ഗാലക്സി എസ്26-നോട് സാമ്യമുള്ള ഡിസൈൻ തന്നെയായേക്കും. ഗുളികയുടെ ആകൃതിയിലുള്ള പിൻ ക്യാമറ മൊഡ്യൂളും ട്രിപ്പിൾ ക്യാമറ സജ്ജീകരണവും ഫ്ലാറ്റ് ഡിസ്പ്ലേയും ഫോണിൽ പ്രതീക്ഷിക്കുന്നുണ്ട്. ലാവെൻഡർ നിറത്തിലുള്ള പതിപ്പും ഗാലക്സി എസ്27 സീരീസിൽ എത്തിയേക്കുമെന്നാണ് റിപ്പോർട്ടുകൾ. എന്നാൽ ഫോണിന്റെ അന്തിമ ഡിസൈൻ, ഫീച്ചറുകൾ, പ്രോസസർ, വിപണി ലഭ്യത തുടങ്ങിയ കാര്യങ്ങളിൽ സാംസങ് ഔദ്യോഗിക പ്രഖ്യാപനം നടത്തിയിട്ടില്ല. സ്‍കാം ഡിറ്റക്ഷനുമായി ബന്ധപ്പെട്ട വിവരങ്ങൾ നിലവിൽ വികസന ഘട്ടത്തിലുള്ള സോഫ്റ്റ്‌വെയർ കോഡിൽ നിന്നുള്ളതാണെന്നതിനാൽ, ഫീച്ചർ ഭാവിയിൽ മാറ്റം വരുത്തുകയോ ഒഴിവാക്കുകയോ ചെയ്യാനുള്ള സാധ്യതയും നിലനിൽക്കുന്നുണ്ട്.