പൂട്ടിയിട്ട വീട് തകര്ത്ത് കവർന്നത് 13 പവനും കൂളിംഗ് ഗ്ലാസും, പ്രതി അറസ്റ്റില്
Synopsis
ഓഗസ്റ്റ് രണ്ടിന് അക്ബർ എന്ന വ്യക്തിയുടെ വീട്ടിലാണ് ഈ വൻ മോഷണം നടന്നത്. അദ്ദേഹത്തിന്റെ സഹോദരി നൽകിയ പരാതിയുടെ അടിസ്ഥാനത്തിൽ കേസെടുത്ത കുന്നംകുളം പോലീസ് നടത്തിയ ഊർജ്ജിതമായ അന്വേഷണത്തിലാണ് പ്രതി പിടിയിലായത്.
തൃശൂര്: കുന്നംകുളം പെരുമ്പിലാവില് പൂട്ടിയിട്ട വീട് തകര്ത്ത് വന് കവര്ച്ച നടത്തിയ കേസില് പ്രതിയെ അറസ്റ്റ് ചെയ്തു. കര്ണാടക ഭദ്രാവതി സ്വദേശി ഷാഹിദ് (24) നെയാണ് കുന്നംകുളം സ്റ്റേഷന് ഹൗസ് ഓഫീസര് അനില്കുമാര് ടി. മേപ്പിള്ളിയുടെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്. പെരുമ്പിലാവ് സ്വദേശിയായ അക്ബറിന്റെ ഉടമസ്ഥതയിലുള്ള വീട്ടിലാണ് മോഷണം നടന്നത്. ഓഗസ്റ്റ് രണ്ടിന് വൈകീട്ട് ആറിനും രാത്രി 8.30നും ഇടയിലാണ് സംഭവം നടന്നത്. വീടിന്റെ മുന്വശത്തെ വാതിലിന്റെയും അലമാരയുടെയും പൂട്ടുകള് തകര്ത്താണ് മോഷ്ടാക്കള് അകത്തുകടന്നത്. അലമാരയില് സൂക്ഷിച്ചിരുന്ന ബാഗില്നിന്ന് 13.5 പവന് സ്വര്ണാഭരണങ്ങള്, 10,000 രൂപ, 2,000 രൂപ വിലമതിക്കുന്ന സണ്ഗ്ലാസ് എന്നിവ കവര്ന്നു. കൂടാതെ വാഹനത്തിന്റെ ആര്.സി. ബുക്ക്, ആധാര് കാര്ഡ്, എ.ടി.എം. കാര്ഡ്, പാന് കാര്ഡ് തുടങ്ങിയ സുപ്രധാന രേഖകളും മോഷ്ടാവ് അപഹരിച്ചു. ഏകദേശം 13,62,000 രൂപയുടെ നഷ്ടമാണ് ഉണ്ടായത്. സംഭവവുമായി ബന്ധപ്പെട്ട് അക്ബറിന്റെ സഹോദരി സുഹറ ഷംസുദ്ദീന് കുന്നംകുളം പോലീസ് സ്റ്റേഷനില് നല്കിയ പരാതിയുടെ അടിസ്ഥാനത്തിലാണ് കേസ് രജിസ്റ്റര് ചെയ്തത്. തുടര്ന്നുള്ള അന്വേഷണത്തിലാണ് പ്രതിയെ അറസ്റ്റ് ചെയ്തത്.
ഇന്ത്യയിലെയും ലോകമെമ്പാടുമുള്ള എല്ലാ Crime News അറിയാൻ എപ്പോഴും ഏഷ്യാനെറ്റ് ന്യൂസ് വാർത്തകൾ. Malayalam News തത്സമയ അപ്ഡേറ്റുകളും ആഴത്തിലുള്ള വിശകലനവും സമഗ്രമായ റിപ്പോർട്ടിംഗും — എല്ലാം ഒരൊറ്റ സ്ഥലത്ത്. ഏത് സമയത്തും, എവിടെയും വിശ്വസനീയമായ വാർത്തകൾ ലഭിക്കാൻ Asianet News Malayalam