ഭാര്യയെ കളിയാക്കിയ രണ്ട് പേരെ വെട്ടി പരിക്കേൽപ്പിച്ചു, 55 കാരൻ കസ്റ്റഡിയിൽ

ഭാര്യയെ കളിയാക്കിയതില്‍ പ്രകോപിതനായാണ് ശിവന്‍ ബിനോയുടെ വീട്ടിലെത്തി ആക്രമണം നടത്തിയതെന്ന് പൊലീസ്

തൃശൂർ : തൃശൂർ വെള്ളിക്കുളങ്ങര മാരാങ്കോട് രണ്ടുപേര്‍ക്ക് വെട്ടേറ്റു. മാരാങ്കോട് പാല ജംഗ്ഷനു സമീപം താമസിക്കുന്ന പടിഞ്ഞാക്കര ബിനോയ്, സുഹൃത്ത്  വയലാത്ര സ്വദേശി സുനില്‍ എന്നിവരെയാണ് മാരാങ്കോട് കോടശേരി വീട്ടില്‍ ശിവന്‍(55) ആക്രമിച്ചു പരിക്കേല്‍പ്പിച്ചത്. വെള്ളിയാഴ്ച വൈകുന്നേരമാണ് സംഭവം. ഭാര്യയെ കളിയാക്കിയതില്‍ പ്രകോപിതനായാണ് ശിവന്‍ ബിനോയുടെ വീട്ടിലെത്തി ആക്രമണം നടത്തിയതെന്ന് പൊലീസ് പറഞ്ഞു. ബിനോയിയുടെ  കാലില്‍ ആഴത്തിലുള്ള മുറിവേറ്റിട്ടുണ്ട്. സുനിലിന് തലയ്ക്കാണ് പരിക്ക്. ചാലക്കുടി താലൂക്ക് ആശുപത്രിയില്‍ പ്രവേശിപ്പിച്ച ഇരുവരേയും പിന്നീട് തൃശൂര്‍ മെഡിക്കല്‍ കോളജാശുപത്രിയില്‍ പ്രവേശിപ്പിച്ചു. ശിവനെ വെള്ളിക്കുളങ്ങര പൊലിസ് കസ്റ്റഡിയില്‍ എടുത്തു.