ഭാരം 56 കിലോയില്‍ നിന്ന് 49 കിലോ ആയി: അനുമോള്‍

പുതിയ കാര്‍ വന്നാലും പഴയത് വില്‍ക്കില്ലെന്നും അനുമോള്‍.

മൂന്നാഴ്‍ച മുൻപാണ് ബിഗ് ബോസ് മലയാളം സീസണ്‍ 7 ന് ഗ്രാന്‍ഡ് ഫിനാലെ കഴിഞ്ഞത്. സീരിയല്‍, ടെലിവിഷന്‍ താരം അനുമോള്‍ ആണ് കപ്പ് ഉയര്‍ത്തിയത്. അനുമോളെ അനുകൂലിച്ചും വിമർശിച്ചുമൊക്കെയുള്ള ചർച്ചകൾ ഇപ്പോഴും പുറത്ത് നടക്കുന്നുണ്ട്. ബിഗ്ബോസില്‍ നിന്ന് പുറത്തിറങ്ങിയതിന് ശേഷം തന്റെ യൂട്യൂബ് ചാനലുമായി വീണ്ടും സജീവമാണ് അനുമോൾ. ബിഗ്ബോസിൽ നിന്നുമിറങ്ങി എയര്‍പോര്‍ട്ടില്‍ എത്തിയതു മുതലുള്ള വിശേഷങ്ങൾ അനുമോൾ യൂട്യൂബിലൂടെ പങ്കുവെയ്ക്കുന്നുണ്ട്. ബിഗ് ബോസിനു ശേഷം ആദ്യമായി സുഹൃത്ത് അർജുനും അമ്മയും തന്നെ കാണാൻ എത്തിയ വിശേഷമാണ് അനുമോൾ ഏറ്റവുമൊടുവിൽ യൂട്യൂബിൽ പങ്കുവെച്ചിരിക്കുന്നത്.

ബിഗ് ബോസ് വിശേഷങ്ങളും അനുമോൾ സംസാരത്തിനിടെ പങ്കുവെയ്ക്കുന്നുണ്ട്. ഷോയിലേക്ക് പോകുമ്പോൾ 56 കിലോ ആയിരുന്നു ഭാരമെന്നും തിരിച്ചെത്തിയപ്പോൾ 49 ആയെന്നും ഇപ്പോൾ 50 ൽ എത്തിച്ചെന്നും അനുമോൾ വീഡിയോയിൽ പറയുന്നുണ്ട്.

സമ്മാനമായി കിട്ടാൻ പോകുന്ന കാറിനെക്കുറിച്ചും താരം സംസാരിച്ചു. ''പുതിയ കാര്‍ വൈകാതെ വരും. പഴയത് ഞാന്‍ എന്തായാലും ഒഴിവാക്കില്ല. അത്രയും കഷ്ടപ്പെട്ട് വാങ്ങിയതാണ്. കാര്‍ എടുക്കുന്നില്ലേയെന്ന് ചോദിച്ച് കുറേപേര്‍ എന്നെ കളിയാക്കിയിരുന്നു നേരത്തെ. ലോണ്‍ എടുക്കാതെയായിരുന്നു ഞാന്‍ കാറെടുത്തത്. വേറെ ലോണൊക്കെയുണ്ടായിരുന്നു. എങ്ങനെയൊക്കെയോ പൈസ സംഘടിപ്പിച്ചാണ് കാര്‍ എടുത്തത്. ആ കാര്‍ ഒരിക്കലും ഒഴിവാക്കില്ല'', എന്നാണ് അനുമോൾ ഇതേക്കുറിച്ച് പറഞ്ഞത്.

''ഷോയിലായിരുന്ന സമയത്ത് വീട്ടുകാര്‍ കാണുമെന്നോ, നാട്ടുകാര് കാണുമെന്നോ എന്നൊന്നുമുള്ള വിചാരം എനിക്ക് ഇല്ലായിരുന്നു. നമ്മളുടെ വീട്ടിലൊരു പ്രശ്‌നമുണ്ടായാല്‍ എന്താണോ ചെയ്യുന്നത്, അതങ്ങ് ചെയ്യും. ക്യാമറ ഉണ്ടെന്നു പോലും നോക്കില്ല. വീട്ടിലൊരു കാര്യം നടക്കുമ്പോള്‍ അപ്പുറത്തുള്ളവര്‍ അഭിപ്രായം പറഞ്ഞാല്‍ നമുക്ക് ഇഷ്ടപ്പെടുമോ, ഇല്ലല്ലോ, അതുപോലെ തന്നെയാണ് അവിടെയും'', എന്നും അനുമോൾ കൂട്ടിച്ചേർത്തു.

ഏഷ്യാനെറ്റ് ന്യൂസ് ലൈവ് കാണാന്‍ ഇവിടെ ക്ലിക് ചെയ്യുക