'അമ്പമ്പോ, ഇത് മാസും മാജിക്കും' A22XA6 വന്‍ പ്രഖ്യാപനം: അല്ലുവിന്‍റെ അടുത്ത പടം 'ഹോളിവുഡ് ലെവല്‍' !

അല്ലു അര്‍ജുന്‍റെ പുതിയ ചിത്രം അറ്റ്ലി സംവിധാനം ചെയ്യുന്നു. ചിത്രത്തിൽ സാമന്ത നായികയാകുമെന്ന അഭ്യൂഹങ്ങൾ പ്രചരിക്കുന്നു.

ചെന്നൈ: പുഷ്പയ്ക്ക് ശേഷം എത്തുന്ന അല്ലു അര്‍ജുന്‍റെ ചിത്രം പ്രഖ്യാപിച്ചു. അല്ലുവിന്‍റെ ജന്മദിനത്തിലാണ് അറ്റ്ലി സംവിധാനം ചെയ്യുന്ന ചിത്രത്തിന്‍റെ പ്രഖ്യാപനം നടന്നത്. സണ്‍ പിക്ചേര്‍സാണ് ചിത്രത്തിന്‍റെ നിര്‍മ്മാണം. A22XA6 എന്നാണ് ചിത്രത്തിന് താല്‍ക്കാലികമായി പേര് നല്‍കിയിരിക്കുന്നത്. 

ചിത്രത്തിന്‍റെ ഗിയര്‍ അപ് വീഡിയോയാണ് ഇപ്പോള്‍ പുറത്തുവിട്ടത്. ചിത്രത്തിന്‍റെ ജോലികള്‍ മാര്‍വല്‍ ചിത്രങ്ങള്‍ അടക്കം ചെയ്ത ഹോളിവുഡ് വിഎഫ്എക്സ് ടീമിന്‍റെ സഹകരണത്തോടെയാണ് ചെയ്യുന്നത്. ചിത്രത്തിന്‍റെ വീഡിയോ അപ്ഡേറ്റാണ് ഇപ്പോള്‍ പുറത്തുവിട്ടിരിക്കുന്നത്. 

അതേ സമയം ചിത്രത്തിലെ നായിക ആരാണെന്ന ചര്‍ച്ചയും സജീവമാണ്. ഏറ്റവും പുതിയ അഭ്യൂഹങ്ങള്‍ അനുസരിച്ച് ഈ ചിത്രത്തില്‍ സാമന്ത നായികയാകും എന്നാണ് വിവരം. ഇതിനകം ആമസോണ്‍ സീരിസുകളിലൂടെ പാന്‍ ഇന്ത്യന്‍ താരമായി അറിയപ്പെടുന്ന സാമന്ത ചിത്രത്തില്‍ നായികയായി എത്തും എന്നാണ് റിപ്പോര്‍ട്ട്. ചിത്രത്തിലെ മാറ്റ് കാസ്റ്റിംഗ് സംബന്ധിച്ച് ഇതുവരെ വിവരങ്ങള്‍ ഒന്നും ലഭ്യമല്ല. 

അതേ സമയം ആഗസ്റ്റ് 2025 ല്‍ ചിത്രത്തിന്‍റെ ഷൂട്ടിംഗ് ആരംഭിക്കാനാണ് പദ്ധതിയെന്നാണ് വിവരം. അടുത്ത വര്‍ഷം ആദ്യത്തിലോ മധ്യത്തിലോ ചിത്രം റിലീസ് ചെയ്യാനാണ് സാധ്യത. സണ്‍ പിക്ചേര്‍സ് ഏറ്റവും കൂടുതല്‍ തുക ചിലവാക്കി എടുക്കുന്ന ചിത്രമായിരിക്കും ഇതെന്നാണ് വിവരം.

നേരത്തെ സല്‍മാന്‍ ഖാനെ വച്ച് ഒരു ചിത്രം ചെയ്യാനായിരുന്നു അറ്റ്ലി ശ്രമം നടത്തിയത്. എന്നാല്‍ കൂടിയ ബജറ്റും പ്രധാന വേഷം ചെയ്യാന്‍ ദക്ഷിണേന്ത്യന്‍ സൂപ്പര്‍താരത്തിന്‍റെ ഡേറ്റ് ലഭിക്കാത്തതും തല്‍ക്കാലം ഈ പ്രൊജക്ട് ഉപേക്ഷിക്കാന്‍ വഴിയൊരുക്കുകയായിരുന്നു. സല്‍മാന്‍ ഖാന്‍ തന്നെ ഇത് തുറന്നു സമ്മതിക്കുകയും ചെയ്തു.